{idkey=3241b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5825-benny-nisbet-ppa-aruba-pa-e-proximo-nivel%3FItemid%3D101][title=Benny+Nisbet+%28PPA%29%3A+%E2%80%98Aruba%E2%80%A6%E2%80%A6Pa+e+proximo+nivel%21%E2%80%98][desc=]}
Na september proximo pueblo ta worde jama pa bai urna electoral pa elehi e proximo constellacion di nos parlamento y indirectamente e proximo gobernacion di nos pais. No kabe duda cu nos sociedad ta consciente di e crisis financiero economico cu nos pais ta den y e reto cu nos pais tin den futuro. Pa duna contesta riba e problematica aki PPA a jama nos vision, nos maneho di e posibel soluccionan como e caminda pa hiba ‘Aruba ……pa e Proximo Nivel’ ! PPA a scoge e titulo aki pa e pakete di topico cu tur hunto ta forma nos programa pa eleccion 2017 – 2021 como un titulo positivo ‘Aruba …pa e Proximo Nivel !’ esaki riba tereno di gobernacion….pero tambe riba tereno financiero- economico, social, educativo, cultural, deportivo di nos pais. 

Awor naturalmente e pregunta di pueblo lo por ta: Kiko ta e.o. contenido di e nos Programa ‘Aruba pa e Proximo Nivel !! ? E trabao pa compila nos programa ta tumando lugar pa lunas kaba den seno di partido PPA. Nos directiva, nos conseho di partido y esnan cu ta forma parti di nos ‘ThinkTank’ ta trahando mas duro mes pa por ofrece nos pueblo e miho programa posibel. PPA a anuncia cu nos Programa ta worde presenta den asina jama Masterplan y documento. Mientras cu nos lo publica nan cu tempo nan lo ta presente riba nos web page….. ‘ppa-aruba.org’. 

PPA tabata e prome organisacion pa presenta un Masterplan pa eleva nos Siguridad riba nos Isla. E contenido ta e.o. cu PPA ta desea di pone un ‘Politiewacht’ na Sabana Basora/Pos Chikito y nos lo desea di pone un post di ‘strandpolitie’ na Seroe Colorado combina cu un Toren di vigilancia pa limita e entrada continuo di illegal. Na mes momento PPA ta desea di bini cu un Cuerpo di sosten estilo VKC na Corsow pa sostene Cuerpo di Polis den nan tarea. Tambe PPA ta duna contesta riba un maneho mas amplio pa stimula nos jovennan pa scoge pa bira polis den Futuro. Na Oranjestad PPA ta boga pa e xJFK scol bira e proximo warda di polis pa Oranjestad y Dakota. E salida di polis den tur direccion lo ta mucho mas efficiente. Esaki basa riba un sitio ‘strategico’, proteccion pa nos Ontvanger der Belastingen, miho control riba desaroyo den vecindario y un sitio strategico ora di Carnaval etc. y mucho mas pa juda Eleva nos Cuerpo di Polis pa e sigiente nivel. Den e masterplan pa siguridad PPA ta presenta tambe nos maneho pa mehora funcionamento di Cuerpo di Brandweer riba nos Isla. En vez di depende riba dos ‘post’ esta San Nicolas y Tanki Flip…. Esun na Aeropuerto tin su tarea pa cumpli cu aviacion Internacional pa cu nos Isla… PPA ta propone pa pone un Post di Brandweer na Balashi tambe y usa e infra-structura pa prepara y mantene nos Cuerpo di Brandweer den e sigiente nivel! 

Mientras tanto PPA a termina tambe cu nos Masterplan pa hiba ‘Oranjestad nos capital’ pa e Proximo Nivel. Apesar cu esaki NO a worde publica ainda …algun projecto specifico a worde menciona pa pueblo. Iniciando cu e ‘x JFK scol’ como proximo warda di polis pero tambe PPA a menciona cu nos deseo ta pa e edificio di x DOW bira un MUSEUM NACIONAL di Aruba basa riba un concepto mucho mas amplio di locual Museums aki na Aruba ta projecta te na e momento aki. E concepto di PPA lo ta un atraccion pa turistanan pero lo por worde usa tambe pa scolnan ora ta duna les di historia di pais Aruba….durante un bishita pa e Museum. Esaki lo bira mucho mas interesante pa e studiantenan ora nan ta ricibi nan les di historia dentro di un Museum unda e historia ta presenta mas amplio y mas interesante posibel. PPA ta kere fielmente den e potencial cu ‘nos historia y nos cultura’ta ofrece y por conclui cu esaki ta un ‘untapped potencial’ di nos pais. 

Tambe PPA a hasi un apelacion public na gobierno di AVP pa NO basha x hotel Bushitiri abao. Esaki PPA ta considera ‘kapitaalsvernietiging’’ !! Si gobierno di AVP durante di 8 anja NO tabatatin alternativa di uso pa e sitio aki PPA si tin. PPA tin intencion di establece un instancia cu lo ofrece un parti di e Edificio di Bushiri como A. ‘sitio di vacacion pa nos grandinan’ unda TUR grandi/pensionado pa cuminsa esnan den cas di Anciano pero tambe esnan na cas pa nan por pasa un vacacion di un siman te diez dia na e sitio aki !! B. Parti di e sitio aki lo por worde destina pa un instancia cu lo funciona parcialmente como ‘creche’ y parcialmente como ‘opvang’ di mucha despues di scol na unda lo por ofrece tambe ‘huiswerkbegeleiding’ etc cu nan majornan p.e. ta trahando den e sector di Turismo pero naturalmente otro tambe. E beach pabow di Bushiri lo ricibi su infra-structura cu e por worde usa pa nos pueblo !! 

Diversificacion di nos Economia: Hibando Aruba pa e proximo Nivel !! 

Na prome lugar PPA por sostene un ‘moratorium’ riba Hotel cu dos excepcion ! Na prome lugar e excepcion ta ora cu tin un posibel Aruba Word Trade Center cu lo mester worde accompanja pa ‘dos’ business hotels y ora cu ta trata inversion den un Hotel na Seroe Colorado pero TUR esaki dentro di un periodo di diez anja !! Un hotel como excepcion mester ensera logro di un sector turistico cu Aruba NO tin y cu por worde considera como expacion di nos producto turistico. PPA no ta kere den mas ‘ALL INCLUSIVE HOTELS’ pero si p.e. den un Hotel di 4/5 streya of un Hotel SPA den cuadra di un maneho pa crea un sector di ‘Health & Wellness’ cu PPA ta kere den. Kada inversion den Hotel cu ta excepcion mester tene cuenta cu e cantidad di hende cu Aruba su sisteme escolar ta produci cu tempo …y no mester worde basa riba busca hende den exterior pa bin traha na Aruba…esaki cu tur respet !!

PPA ta kere den ‘diversificacion’ di e producto turistico di nos pais !! Si nos keda depende riba ‘all inclusive’ nos lo paga un prijs pa esaki den futuro. PPA ta kere den ‘Convention tourism, Golfersdestination y un Health & Wellness seccion. Pero esaki bon planifica cu ta tene cuenta cu e mercado di labor disponibel localmente y door di stimula regreso di e arubiano for di exterior.

Na di dos lugar: PPA ta kere den diversificacion di nos Economia p/a di pilar economico nobo!

PPA ta kere den un Aruba World Trade Center combina cu un Universidad International y dos Business Hotels…cual su spin-off economico lo ta impactante. PPA ta kere den hasi Aruba un HUB riba tereno di Telecomunicacion. PPA ta kere den un planta di Television pa region…basa riba e concepto di manda informacion regional pa tur isla cu ta desea esaki !! Y PPA ta kere den expacion di San Nicolas cu nos vision ‘San Nicolas Our Caribbean Town’ tur esaki lo crea cupo di trabao di valor y mester ta destina pa nos pueblo den su totalidad na prome lugar y pa nos arubianonan biba den exterior cu mester worde stimula pa regresa nos pais. Esaki ta algun di e varios vision y idea di partido PPA. Nos lo bin bek cu mas den futuro cercano…..!! Aruba ……pa e Proximo Nivel !!


Aruba, 18 di juni 2017
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co