{idkey=9569b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5746-julie-de-cuba-red-partido-red-ta-para-pa-derechonan-humano-di-arubiano%3FItemid%3D101][title=Julie+de+Cuba+%28ReD%29%3A+Partido+ReD+ta+para+pa+derechonan+humano+di+Arubiano][desc=]}
ReD Democratico ta un partido cu vision amplio basa riba derechonan humano cu ta e fundeshi di un comunidad sano, educa y den balance. 

Na Aruba continuamente ta pidi e Arubiano pa adapta na   turista. Pa no ofende ni descrimina stranhero. ReD ta completamente di acuerdo cu esey. Pero ReD ta spera    exactamente igual trato for di turista y stranhero tambe pa e Arubiano.

Nos pueblo a hiba un lucha largo y continuo pa ta baas den nos mes cas. Contra dominio di Corsow antes y ultimo añanan contra colonialismo moderno. Contra cultura di miedo. Contra inhusticia. Contra persecusion. Contra criminalidad y contra autoridad cu ta manda Riot Comando riba su mes pueblo. 

Ultimo decadanan a bin aserca cu nos pueblo mester lucha tambe continuamente pa su identidad. Pues contra menosprecio pa nos idioma y nos costumbernan. Anto tur esaki riba nos propio suela. Pueblo nunca a pidi pa nos isla wordo invadi cu hendenan cu ta nenga di papia papiamento y ta nenga di adapta na nos cultura Caribense Europeo. Tur hende ta bonbini aki, riba nos pida baranca, tanten cu nan ta legal, ta traha honestamente pa nan pan, ta papia nos idioma y a adapta na nos costumbernan. Si e stranhero kier biba aki, di nos e mag pero e mester integra. Ta inacceptabel pa nos adapta na nan. Acaso ta verwacht di nos cu anos mester bira stranhero riba nos propio isla y adapta na otro pueblonan?

Instancianan cu ta duna les na trahadornan di afo con pa atende cu turista ta duna les con pa atende cu Arubianonan tambe? Pa tin respet pa nos y siña papia nos idioma?

Segun mi e Arubiano humilde ta hincá den un skina. Hopi biaha e ta wordo trata como menos. Y tur caminda e ta tende idiomanan stranhero so ta wordo papia: den pacus, den supermarket, den shopping malls, den bus, riba caya, na docter, na SVB, na radio. Tur esaki mientras cu e no ta na vakantie den exterior, e ta den su propio cas cu yama Aruba. Caminda ela lanta cu Papiamento y Hulandes, cu diciplina y cordialidad. Caminda su idioma ta su identidad y su orguyo. No subestima e patriotismo cu ta biba den e Arubiano. Gobernantenan sea conciente cu cada permiso di trabao y di estadia cu boso firma mester ta mará na integracion di e persona.

E Arubiano ta bibando bao stress y no por expresa su mes pa no wordo tilda di descriminacion. Pero e si ta wordo descrimina tur dia. E ta den “survival mode”.

Nos ta biba riba un isla cu ta pertenece na Reino Hulandes. Nos no ta latino. Nos ta Hulandes Caribense. Nos tabata un isla caminda semper a obedece autoridad y leynan. Nos tabata un isla sin caos y cu poco criminalidad. Nos tabata conoce trankilidad. Nos estilo di bida ta diferente. Nos educacion ta diferente. Nos idioma y costumbernan ta diferente. E diferencia aki mes ta atrae e stranhero. Pues sea bonbini pero adapta. Pa den futuro boso jiunan tambe sinti nan mes orguyoso di yama nan mes Arubiano. Duna respet pa haya respet bek. Derechonan humano di e Arubiano ya ta bayendo pa e segundo lugar. Esaki ta un situacion inacceptabel pa partido ReD.

Julie de Cuba – Candidata pa ReD Democratico – eleccion 2017

Expresionnan haci den e articulo aki no necesariamente ta refleha opinion di ArenaPoliti.co