{idkey=5782b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5827-benny-nisbet-ppa-diamars-20-di-juni-2017-ppa-ta-recorda-cu-ta-55-anja-pasa-cu-todopoderoso-a-jama-juan-e-yrausquin-ilustre-arubiano-y-estadista-ministro-di-antiyas-neerlandes-di-finanzas-y-fomento-fundador-y-lider-di-ppa-den-su-reino%3FItemid%3D101][title=Benny+Nisbet+%28PPA%29%3A+%E2%80%9CDiamars%2C+20+di+juni+2017%E2%80%A6%E2%80%A6..+PPA+ta+recorda+cu+ta+55+anja+pasa+cu+todopoderoso+a+jama+Juan+E+Yrausquin+ilustre+Arubiano+y+estadista%E2%80%A6+Ministro+di+Antiyas+Neerlandes+di+finanzas+y+fomento%2C+fundador+y+lider+di+PPA+den+su+Reino%21%21%E2%80%9D][desc=]}
Diaranzon anochi 20 di juni 1962 Aruba henter Antiyas Neerlandes y Reino Hulandes a worde sacudi ora e noticia a sali cu Ministro sr. Juan E. Yrausquin a bira malo y a fayece na Corsow…..e momento ey Ministro di Finanzas y Fomento di Antiyas Neerlandes y presidente di su partido PPA.

Juan E Yrausquin un arubiano humilde cu a crece pa bira un di e figuranan mas prominente di e tempo ey y ora cu el a drenta politica pa sirbi su pueblo despues di un periodo cortico E a bandona partido AVP y a funda partido PPA bao di e palabranan ‘pa pueblo y pa libertad’. Su diferencianan di opinion den seno di partido AVP tabata grandemente basa riba e falta di un vision amplio di e organisacion politico AVP pa confronta e reto di e tempo ey un Aruba cu hopi hende sin trabao. E druppel di awa cu a pone sr. Juan E Yrausquin bandona partido AVP tabata e posicion caprichoso cu Lider di AVP sr. Henny Eman q.e.p.d. a tuma den e proceso estatal cual segun Juancho lo a perjudica interes di aruba profundamente. Historia ta duna Juancho razon y pa motibo di e posicion tuma pa partido AVP Aruba a perde e representacion di 8-8 cual a worde cambia den 12 asiento pa Corsow mientras cu Aruba a keda cu 8. Esaki y mas a pone cu Aruba mester a forma parti di un Antiyas uni durante un periodo di 34 anja. 

Juan E Yrausquin q.e.p.d. a splica su pueblo despues di e ‘traicion’ aki cu lo bin un temporada otro unda Aruba lo mester continua cu su lucha pa logra mas ‘autonomia’ y pa cambia e structura di Reino na fabor di e libertad di pais Aruba. Juancho a splica acerca cu durante e periodo nos dilanti PPA lo presenta un ‘plan di diez’ anja den cual lo worde presenta e vision di PPA pa desaroyo economico, social, educacional etc cual su meta principal lo ta pa lucha contra pobreza riba nos isla, duna e arubiano digno e oportunidad cu nan merece, bin cu un maneho cu lo crea Ensenansa rond di nos Isla basa riba e pensamento cu Ensenansa lo mester ta liber y pa tal motibo e ‘schoolgeld’ cu tabata un estorbo pa famia grandi a worde elimina pa partido PPA.

Den e periodo 1955- 1959 cu PPA a bin na poder riba teritorio Insular di nos Isla y e periodo 1959 te cu 1962 na momento di fayecimento di e ilustre arubiano sr. Juan E. Yrausquin un equipo di arubiano cu kizas menos educacion cu awe a dedica nan mes ‘alma y cuerpo’ pa duna contenido na e ‘plan di diez anja aki’. Den e periodo aki PPA a anuncia su plan pa desaroyo di turismo….construccion di e infra-structura necesario pa por jega na ‘Palm Beach’ unda inicia cu construccion di e prome Hotel Internacional di nos pais esta Aruba Caribbean Hotel cual hotel a worde sigui cu planificacion y despues ejecucion di Aruba Sheraton Hotel y ainda mas leeuw door di PPA e hotel Americana. Mester a moderniza nos planta di Awa y corriente cu e WEIR units ..pa hasi expancion economico posibel y pa tur hende den tur districto rond di Aruba por ricibi awa y corriente na nan cas. Na mes momento otro inversionista a inicia cu otro hotel ‘low rise’ cu consecuencia cu e fundeshi cu PPA a larga atras tabata ensera un 2600 kamber. E ponencia di sr. Juan E. Yrausquin tabata ‘nos ta inverti den turismo pasobra lo jega e dia cu Lago lo por sera su porta y Aruba mester tin un alternativa’ un declaracion cu a causa hilaridad cerca contricantenan politico cu NO tabata kere den turismo…..’kabritonan di Noord lo bai druma den e hotelnan’ y ki mishi LAGO sera su portanan Juancho lo ta loco.

Historia a bolbe demonstra cu e ilustre figura sr. Juan E Yrausquin tabatatin razon ora na 1985 e momento cu Juancho den number di PPA a visualisa e jega…..ora LAGO a sera su portanan na Aruba. Realidad di bida ta cu e vision di Juan E Yrausquin q.e.p.d a salba Aruba 30 anja prome cu e sierra real a tuma lugar.

Juancho a demonstra cu su maneho economico den e periodo ey di a crea un economia basa riba tanto turismo y crudo pero tambe e desaroyo grandi na haf di Barcadera. Un haf cu a worde crea y coba riba instruccion di Juancho como Ministro y un haf cu a worde destina pa desaroyo nobo di industria cu e fundacion di Aruba Chemical Industries…compania cu a funciona pa 16/17 anja.

Juancho su maneho pa cu nos ensenansa a conduci cu un cantidad enorme di scol riba diferente nivel a worde construi rond Aruba. Un maneho di becado moderno a worde introduce pa studiante arubiano por a viaha pa exterior pa studia pa asina cuminsa crea e ‘brain y professional’ arubiano necesario pa desaroyo di nos pais.

Juancho Yrausquin a corda riba esnan cu menos entrada ora el a introduci e maneho di onderstand pa asina por juda tur esnan cu no tabatatin un entrada acceptable. Pa nos grandinan cu pa biba mester kana rond pa pidi e ‘shonnan’ den playa pa un judanza ….Juancho a hanja esaki un capitulo inhumano cu tabata trapa e dignidad arubiano y el a inicia cu un esfuerzo pa presenta un Ley cu lo regla pensioen pa nos grandinan. Atrobe su contrincantenan berde a declare pa loco …algo asina no por….Juancho a inicia cu e proceso di compila un Ley cu a bira e fundeshi di ‘pensioen’ pa nos grandinan….na edad di 62 anja. Awe ainda e Ley crea pa e ilustre arubiano sr. Juan E. Yrausquin ta na vigor riba nos isla …judando nos grandinan ….esey nos ta jama sirbi un pueblo.

Juancho Yrausquin Arubiano ilustre……awe PPA ta recorda cu ta 55 anja pasa cu todopoderoso a tumabo den su Reino. Sinembargo bo nomber ta worde scirbi cu ‘letternan’ di oro den historia di nos pais. Hopi esfuerza ta worde hasi te awe pa contrincante pa purba raya e contribuiccion di Juancho Yrausquin(PPA) for di historia. Pero su contribuiccion ta asina grandi y impactante cu simpelmente e esfuerzonan aki NO lo logra. Juan Enrique Yrausquin …arubiano humilde……a worde batisa door di pueblo di Aruba como ‘Sirbidor di pueblo’ su contribuiccion na otro isla di Antiyas Neerlandes e tempo ey tabata asina impactante cu su nomber ta worde encontra riba tur isla …como nomber di caya of nomber di aeropuerto (SABA) y parti di nan historia….orda un arubiano humilde a larga su contribuccion pa futuro generacionan.

Tempo ta pasa ….pero e nomber di e ilustre arubiano gran estadista arubiano…cu Todopoderoso a tuma trempan den su Reino…..su contribuiccion na desaroyo di su pueblo arubiano ta grandi pa esun cu kier wak e realidad aki y hasta pa esun cu kizas no ta desea di reconoce esaki. Aruba te awe ta biba y desaroya riba e vision y trabao di e ilustre arubiano aki…!!

PPA como e organisacion politico funda pa sr. Juan E Yrausquin q.e.p.d. lo mantene nos tradiccion y un delegacion di nos directiva/conseho di PPA lo deposita un ‘krans’ diamars, 20 di juni 2017 na estatua di e gran ilustre arubiano y estadista sr. Juan Enrique Yrausquin….!! E estatua di sr. Juan E. Yrausquin na Postkantoor na Oranjestad ta un muestra di e reconocimento y e hecho cu pueblo a dunele e titulo di ‘sirbidor di pueblo’ ta bisa suficiente. Todopoderoso a tuma Juancho den su Reino …pero su nomber ta keda scirbi den historia di nos pais cu letternan di oro. Juan Enrique Yrausquin…sosega na paz !!


Aruba, 18 di juni 2017.
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co