{idkey=5273b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F807-mep-e-grito-di-baas-den-nos-mes-cas-di-18-di-maart-1948-a-muri-na-oktober-1949%3FItemid%3D101][title=MEP%3A+E+grito+di+%E2%80%98Baas+den+nos+mes+cas%E2%80%99+di+18+di+maart+1948+a+muri+na+oktober+1949][desc=Nos+no+por+celebra+Aruba+su+autonomia+dia+18+di+maart%21+%28Part+1%29%26amp%3Bnbsp%3BDurante+e+celebracion+di+nos+Dia+di+Himno+y+Bandera+diaranson+ultimo+Minister+President+Mike+Eman+un+biaha+mas+a+manipula+y+falsifica+e+historia+di+nos+lucha+pa+Status+Aparte+y+tambe+el+a+haci+como+sifuera+cu+ta+su+welo+Henny+y+su+tata+Shon+A+tabata+e+gran+autornan+di+e+logro+di+Status+Aparte.+Mirando+cu+Mike+Eman+kier+rebiba+historia%2C+nos+di+MEP+un+biaha+mas+ta+haya+nos+obliga+pa+trece+e+historia+den+e+version+corecto+pa+puebl]}
Nos no por celebra Aruba su autonomia dia 18 di maart! (Part 1) 

Durante e celebracion di nos Dia di Himno y Bandera diaranson ultimo Minister President Mike Eman un biaha mas a manipula y falsifica e historia di nos lucha pa Status Aparte y tambe el a haci como sifuera cu ta su welo Henny y su tata Shon A tabata e gran autornan di e logro di Status Aparte. Mirando cu Mike Eman kier rebiba historia, nos di MEP un biaha mas ta haya nos obliga pa trece e historia den e version corecto pa pueblo.

Discriminacion di alto grado
Na aña 1947 partido AVP a colecta firma den varios districto di Aruba pa sostene e lucha pa Separacion for di Antiyas. Un gran cantidad di ciudadano humilde a kere cu sigur e politiconan cu a pidi nan firma lo para fuerte bao tur circumstancia pa e Separacion y prueba di esaki ta cu 2147 persona a firma. Remarcabel di e lista cu 2147 firmantenan tabata e practica di discriminacion ya cu ningun hende muher por a firma, pasobra pa AVP nan no tabata tin derecho y no tabata tin valor. Fuera di esaki e lista cu e 2147 firmantenan ta prueba di e politica di AVP contra tur hende cu a bin for di Corsou, Boneiro, Isla Riba, Surinam etc., pasobra no tabata tin ningun fam riba e lista cu ta duna indicacion cu e hendenan aki tambe tabata tin derecho. Tur esnan presente diaranson ultimo riba Plaza 12-8 por a mira cu nan mesun wowonan cu riba e monumento e famnan manera Herde, Dowers, Abath, Varlack, de Meza, Velasquez, Dammers, Winklaar etc. no tabata aparece entre tur e 2147 firmantenan. Motibo tabata e politica antaño di AVP cu tabata discriminatorio contra tur e hendenan cu e famnan aki.

Baas den nos mes cas
Dia 18 Maart 1948 Shon A Eman a entrega na la Reina Wilhelmina un peticion cu 2147 firma pa mas autonomia pa Aruba, e asina yama ‘Baas den nos mes cas.’ Alavez a ser acepta pa studia e deseo di Aruba pa tin un posicion special den Reino Hulandes y a nombra un comision consistiendo di ciudadanonan di Aruba, islanan cu tabata cay bao Corsou y di Hulanda.
Durante e eleccion di 1948 AVP a core un campaña a base di e peticion aki y nan a logra haña 5 asiento y partido UNA 3. Na mei 1948 Aruba a haña un igualdad (8-8) cu Corsou na momento di cambio di e Staatsregeling. Den formacion di e gobierno di e tempo ey Dr. Fulgencio Da Costa Gomez, lider di Partido Nacional (NVP) di Corsow di e mesun ideologia cu AVP, no tabata contento cu Corsou siendo mas grandi cu Aruba tin e mesun cantidad di asiento den Staten cu tabata 8. Door di discusion ey Hulanda a manda Prof. van Poelje pa Antiyas pa regla e asunto aki.

Interimregeling versus Plan di Poelje
Prof. van Poelje a bin cu dos concepto di ley. Un tabata yama Interim Regeling y e otro Plan van Poelje. E diferencia di nan dos ta cu Plan van Poelje ta regarda cu cada isla ta dicidi pa su mes cual departamentonan di gobierno nan lo kier traha hunto cu otro, mientras cu Interim Regeling tabata papia di e isla cu mas voto ta haña mas asiento. Henny Eman tabata inclina pa e deseo di Dr. Da Costa Gomez cu tabata kier e Interim Regeling. Na mei 1949 AVP a forma un gobierno cu NVP y Shon A Eman a haña un puesto di ministro sin cartera.

Traicion di AVP
Dia 13 di oktober 1949 den Staten di Antiyas tres miembro di AVP a vota hunto cu Da Costa Gomez pa e Interim Regeling, mientras cu Juancho Yrausquin, Fichi Croes y partido UNA cu tabata kier e Plan van Poelje a vota contra. E tempo ey un Arubiano, sr. Juan Eusebio Croes cu a firma pa Separacion y cu a sinti cu nan tur a ser traiciona como forma di protesta durante e reunion den Staten a tira sr. Henny Eman cu webo, locual nunca a yega di sosode den Reino Hulandes. Resultado di e traicion di AVP tabata cu Hulanda a duna Corsou 12 asiento y Aruba a keda cu 8 asiento. Cu e votacion aki AVP a vota contra pa Aruba por a haña mas autonomia y a traciona e 2147 firmantenan malamente. Di su regreso na Aruba e lider di AVP, Henny Eman sin ningun tiki di berguensa a tuma henter pueblo haci spektakel bisando cu “Aruba no a perde nada, pero ta Corsou a haya 12”.

Humiliacion di 12-8
Na mei 1950 Tweede Kamer a acepta e Interim Regeling cu e cambio di e 8-8 cu a ser logra na 1948. Pues esaki a bira 12-8. E tempo ey AVP no a reacciona y no a protesta, al contrario a bin fiesta na Aruba, pero pueblo Arubano si no a keda contento.
Na Augustus 1950 e Interim Regeling a ser trata den Eerste Kamer, unda e partidonan politico UNA y PPA cu a lanta pa motibo di e traicion di AVP a pidi pa rechaza e “Interimregeling”. Enbez cu AVP a sostene UNA y PPA, nan a keda keto, pasobra ya nan mes a acepta e areglo aki pa hinca Aruba bao di Antiyas. Cu e votacion tanto den Tweede Kamer como Eerste Kamer e humiliacion di 12-8 a bira realidad. Pues e hecho cu Mike Eman ta bisa awe cu Status Aparte a wordo logra dia 18 Maart 1948 ta un mentira flagrante. Eynan e grito a nace pa ta ‘Baas den nos mes cas’ y e grito ey a muri na oktober 1949 ora cu Henny Eman y dos mas den AVP a vota cu Da Costa Gomez pa Interim Regeling, traicionando asina e 2147 firmantenan.

Expresionnan haci den e articulo aki no necesariamente ta refleha opinion di ArenaPoliti.co