{idkey=306b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F811-mep-e-cadena-di-12-8-a-ser-rementa-for-di-otro-den-apenas-15-ana-1971-1986%3FItemid%3D101][title=MEP%3A+E+cadena+di+12-8+a+ser+rementa+for+di+otro+den+apenas+15+a%C3%B1a%2C+1971-1986%21][desc=Nos+no+por+celebra+Aruba+su+autonomia+dia+18+di+maart%21+%28Part+2%29%26amp%3Bnbsp%3BDespues+cu+dia+13+di+october+1949+tres+miembro+di+AVP+a+vota+hunto+cu+Da+Costa+Gomez+di+NVP+pa+e+Interim+Regeling+y+cu+nan+a+laga+e+lucha+di+e+2147+personanan+cu+a+firma+pa+Separacion+cay%2C+nada+pero+net+nada+mas+a+sosode+riba+tereno+estatal.+Hecho+ta+durante+%26amp%3Bnbsp%3Bhenter+e+periodo+di+1949+te+1971%2C+esta+22+a%C3%B1a+largo+e+lidernan+di+AVP+no+a+papia+mas+riba+structura+estatal+y+Separacion%2C+corda+pa+nan+a+lucha+y+sacrifica+pa+liberta]}
Nos no por celebra Aruba su autonomia dia 18 di maart! (Part 2) 

Despues cu dia 13 di october 1949 tres miembro di AVP a vota hunto cu Da Costa Gomez di NVP pa e Interim Regeling y cu nan a laga e lucha di e 2147 personanan cu a firma pa Separacion cay, nada pero net nada mas a sosode riba tereno estatal. Hecho ta durante  henter e periodo di 1949 te 1971, esta 22 aña largo e lidernan di AVP no a papia mas riba structura estatal y Separacion, corda pa nan a lucha y sacrifica pa libertad di pueblo aki. E tempo ey nan lucha cu nan tabata yama “Lucha Arubano” tabata dirigi solamente contra partido PPA, ya cu den nan concepto  PPA tabata un partido di inmigrantenan (stranheronan) cu pa gran parti tabata consisti di  gruponan di Corsou, Boneiro, Isla Riba, Hulanda, Surinam  cu nan respectivo representantenan riba e lista aki. Asina por mira cu AVP a hiba un politica discriminatorio y racista caminda nan tabata agita contra tur e hendenan cu a bin for di exterior, mescos cu nan a haci tempo cu nan a busca firma pa peticion pa Separacion, esta e lista di 2147 firmantenan.

Division y segregacion
Siguramente esaki a conduci na un division y segregacion grandi den nos pueblo y cual no a yuda crea un consciensa den un pueblo cu mester ta uni pa logra su idealnan. Ta pesey mes historia ta comproba cu durante e periodo aki ningun prueba di documento, carta, relato, mocion, peticion, encuesta, referendum, manifestacion, conferencia por ser encontra  caminda AVP a insisti y vocifera nan deseo pa Aruba haña su libertad, su Status Aparte. Alavez ambos lider di AVP a fayece den e epoca ey, esta Henny Eman na 1957 y Shon A Eman na 1967. Den e periodo ey di 1954 te cu 1967 partido PPA so tabata den gobierno y nan a traha grandemente riba e base economico, apesar cu e instrumentonan pa por desaroya nos economia tabata den man di gobierno di Antiyas.

Union di pueblo Arubano
Dia 9 di februari 1971 a ser funda bao liderazgo di Betico Croes e partido MEP cu su meta principal tabata pa trece husticia social, unda e ser humano ta central y pa trece claridad riba tereno estatal, unda Aruba lo mester ta un pais autonomo den Reino Hulandes. Pa por logra esaki mester a caba primeramente cu e division y segregacion den pueblo y trece union entre tur esnan cu ta biba riba e pida baranca aki. Na varios ocasion Betico a declara cu tur esnan cu a nace aki y otronan cu a bin Aruba y haci e isla aki nan hogar y cu ta traha y stima e isla aki ta Arubiano.
Dia 16 di maart 1976 nos himno nacional “Aruba dushi tera” y nos bandera a ser acepta den Eilandsraad di Aruba y pa cual partido AVP a vota contra e simbolonan aki di union y libertad. Te hasta tabata tin hende di AVP cu a menosprecia, trapa y kibra e bandera di Aruba. Sin wordo demoraliza pa cu esaki partido MEP a lucha den gobierno insular y gobierno Central pa e dia di 18 di maart ser reconoci oficialmente como nos Dia di Himno y Bandera.

Plaza Libertad
Semper desde 1976 nos pueblo a celebra e dia aki na grandi, pasobra e himno y bandera no ta di un partido politico, pero di henter e pueblo Arubano. No ta pornada cu AVP desde 1976 nunca a celebra e fecha di 18 di maart, pasobra esaki ta rebiba momentonan amargo. Nunca nan tabata presente dia 18 di maart na e ceremonia protocolar riba Plaza Libertador Betico Croes, esta e antes yama Plaza Libertad. Hecho ta cu mester a warda te cu 1986 cu AVP a drenta gobierno, pa e ora ey numa nan bin reconoce nos himno y bandera y su celebracion dia 18 di maart. E realidad cu partido AVP tin cu biba cune ta cu e persona cu a inspira y guia henter e proceso pa nos tin nos propio himno y bandera y su dia oficial 18 di maart ta nos Libertador Betico Croes. Pero kico nos ta mira awe? AVP kier converti nos dia oficial di 18 maart den un dia pa haci politica partidario y pa honra hende cu no a logra nada significante pa nos pueblo. E wega politico aki a rebiba momentonan tristo den historia di nos pueblo, unda cu 2147 persona a vota pa Separacion y nan a ser hinca hunto cu e pueblo den e 12-8 di Antiyas. Un cadena di 12-8 cu den apenas 15 aña (1971-1986) a ser rementa for di otro door di nos inolvidabel lider y estadista Betico Croes.

Expresionnan haci den e articulo aki no necesariamente ta refleha opinion di ArenaPoliti.co