{idkey=7101b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5846-dangui-oduber-mep-fraccion-di-avp-a-tranca-e-cambionan-di-ley-electoral-intencionalmente%3FItemid%3D101][title=Dangui+Oduber+%28MEP%29%3A+Fraccion+di+AVP+a+TRANCA+e+cambionan+di+ley+electoral+intencionalmente%21][desc=]}
For di anja pasa December 2016 mi persona a cuminsa e proceso pa trece cambio den e kiesverordening (ley electoral). Dia 28 maart 2017 e ley di iniciativa a wordo entrega cu e cambionan di e kiesverordening. E ley cu a wordo entrega lo a hacie posibel pa e candidato/politico cu mas voto drenta parlamento di Aruba. Cu esaki nos ta kibra e tradicion cu ta a base di numeracion of sequencia di number bo ta drenta parlamento.

E deseo di pueblo ta pa mira cual ta e parlamentario cu ta bai CONTRA nan deseo. E cambionan cu a wordo haci ta lo mas husto cu un politico por haci y esaki ta e fundeshi di un democracia. Un democracia ta funciona a base di mayoria y di mesun manera un miembro di parlamento mester wordo escohi. No por ta asina cu tin miembro di parlamento tin 47 voto y ta yama su mes representante di pueblo. Ora bo ta yama bo mes representante di pueblo ta pasobra realmente bo ta representa voz di pueblo den parlamento. E cambionan aki ta elimina por completo e fenomeno di politiconan sin voto cu ta drenta parlamento.

E momento di berdad a yega pa parlamentarionan di AVP pa wak si nan ta para pa cambiona progresivo cu ta na biniestar di nos democracia of ta para pa haya lift pa drenta den parlamento.
E proceso aki a tuma hopi tempo y nos a yega den e etapa culminante.

Lamentablemente nos tin cu informa communidad di Aruba cu durante un reunion di comision central di parlamento fraccion di AVP a TRANCA e proceso di ley aki y dicidi di wanta e ley aki y hinke den lachi pa asina e no wordo trata promer cu eleccion.  Sin por a argumenta y sin ningun rason a pone un paro na deseo di pueblo. Durante e reunion di comision central mi persona a propone pa pone fecha 28 juni 2017 pa miembronan di parlamento por haci pregunta riba e ley y asina e ley lo ta cla pa wordo trata den un reunion publico. Fraccion di AVP NO a bai di acuerdo cu esaki y a bisa cu nan kier scucha opinion di gobierno y nan kier conseho di SER. Fraccion di AVP sea no ta presenta na trabou of no ta haci nan trabou pasobra for di anja pasa 19 december 2017 un carta a wordo manda pa promer minister Mike Eman pa puntra gobierno riba su gevoelensnan y opinion referente e ley aki. Pa e ultimo 4 anjanan aki ningun ley cu wordo trata den parlamento un conseho a wordo puntra na SER. Simplemente Mike Eman a instrui su parlamentarionan pa tranca e proceso aki y pone un paro na dje pa asina e ley aki no bira un realidad. Tur 12 parlamentario di AVP tin miedo di e ley aki pasobra nan sa cu si e ley aki bira un realidad ningun di nan lo por regresa den parlamento.

Pueblo lo sa di huzga e partido AVP durante eleccion 22 september pasobra ora como partido bo ta ta bai linja recta contra deseo di pueblo, bo lo wordo huzga!
Esaki ta un otro motibo valido pakiko NO mester vota pa partido AVP!  

Expresionnan haci den e articulo aki no necesariamente ta refleha opinion di ArenaPoliti.co