{idkey=8848b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5633-eromil-bakmeyer-por-lansamento-como-candidato-nobo-den-partido-por%3FItemid%3D101][title=POR%3A+Eromil+Bakmeyer+-+Lansamento+como+candidato+nobo+den+partido+POR][desc=ORANJESTAD+-+POR%2C+E+Forsa+Nobo+tin+e+gran+placer+di+introduci+Eromil+Bakmeyer+como+su+candidato+nobo+riba+su+lista+pa+eleccion+venidero.+Como+hoben+profesional+den+sector+di+cuido%2C+Eromil+kier+duna+su+aporte+den+arena+politico+riba+terenonan+di+hubentud%2C+asuntonan+social+y+salubridad+publico.+Palabranan+clave+den+su+mision+ta+prevencion%2C+inovacion+y+bon+gobernacion.Eromil+Bakmeyer+ta+un+profesional+den+salubridad%2C+un+esposo+y+un+tata.+For+di+chikito+el+a+si%C3%B1a+e+balor+di+sirbi+su+pais+y+su+hende]}
ORANJESTAD - POR, E Forsa Nobo tin e gran placer di introduci Eromil Bakmeyer como su candidato nobo riba su lista pa eleccion venidero. Como hoben profesional den sector di cuido, Eromil kier duna su aporte den arena politico riba terenonan di hubentud, asuntonan social y salubridad publico. Palabranan clave den su mision ta prevencion, inovacion y bon gobernacion.

Eromil Bakmeyer ta un profesional den salubridad, un esposo y un tata. For di chikito el a siña e balor di sirbi su pais y su hendenan. Pa Eromil, Aruba ta un pais digno di un futuro yena cu prosperidad. Su conviccion ta cu politica mester ta un servicio na bo pais y no un posishon di poder na unda por eherce patronahe. Como hoben politico, Eromil kier sali na vanguardia di e derechonan di nos muchanan y lucha pa mas oportunidad pa nos hobennan y un miho calidad di bida pa nos grandinan. 

Eromil ta haya cu mester duna hobennan e balor cu nan merece, cu apoyo fiho serca tur instancianan cu t'ey pa yuda net nan. 18 aña no mester ta e limite di considera un hoben como un hoben. Un hoben cu a pasa e edad ey y mester di sosten, mester por haya aceso na esaki tambe. Mester percura pa tin mihor programanan di desaroyo pa hubentud. Un hoben mester por siña biba segun e potencial cu el a nace cu ne y haya e yabinan di educacion y entrepeneurship den su man. Tin diferente aspectonan social cu a keda atras durante e desaroyo economico di Aruba y hobennan a wordo perhudica pa via di esaki. Mester trece e factornan aki bek den balansa. 

Alavez, Eromil kier contribui activamente den crea un clima sano pa e lidernan nobo di pais Aruba. E ta kere den un politica nobo di cooperacion, respet y transparencia, na unda tin checks and balances pa responsabilisa esnan na poder.

Na cualkier momento, cada un di nos por haya nos mes confronta cu abuso. E por ta corupcion y abuso di poder den tur forma, pero tambe bullying, te cu traficacion humano of abuso sexual. Yabinan pa combati e fenomenonan aki ta educacion y guia na prome luga, pero tambe e oportunidad y modo pa victimanan por sana y recupera for di loke nan a pasa aden atravez di terapia. Eromil su plan ta pa para duro pa victimanan dor di pusha pa update legislacion contra bullying, acoso, violencia sexual y violencia na scol, trabou, e hogar y riba caya.  

Un grupo hopi importante den nos comunidad ta nos grandinan. Nan a construi e pais cu nos ta biba y goza di dje. Pesey ta di lamenta cu net nan no ta haya e cuido, atencion y oportunidadnan cu nan ta merece. Eromil Bakmeyer kier para fuerte pa nos grandinan y nan derecho riba no solamente un cuido adecua y un calidad di bida digno, pero tambe e derecho di por participa den mercado laboral sin wordo discrimina pa nan edad. 

Hopi di e politica na Aruba ta consisti di decisionnan reactivo. E baca mester hoga prome cu algo wordo haci. Esaki ta particularmente e caso den sector di cuido. Eromil Bakmeyer ta kere den solucionnan pro-activo den forma di por ehempel prevencion di malesanan cronico manera diabetes. Combatimento di esaki pero tambe di obesidad cual ta causa tur tipo di malesa incluyendo diabetes mester cuminsa cu conscientisacion y promocion di practica deporte y un mihor dieta na cas, pero tambe por ehempel na scol. Eromil tambe ta un fuerte proponente di campañanan pa yuda hende stop di huma y pa hobennan no cuminsa mes cu e adiccion aki y pa mustra riba e peligernan di uzo excesivo di alcohol. Pa loke ta cuido di adictonan, Eromil ta kere den identificacion di e problemanan complica tras di e uzo di droga. Malesanan mental, abuso sexual den pasado cu nunca a wordo adresa adecuadamente. Eromil kier mira un mihor cuido mental na Aruba, ya cu e falta di esaki sigur tin su impacto den nos comunidad. Ademas, e diferencia entre un 'choller' y un persona adicto of cu problemanan mental ta cu un choller no tin un hogar. Sinembargo, nan tambe tin derecho riba sosten y un mihor calidad di bida. 

Eromil Bakmeyer tin e conocemento, e hermentnan y e trayectoria profesional pa berdaderamente aporta na un Aruba cu si POR. E ta prepara pa e tarea su dilanti y e t'ey cla pa yuda, manera famia. 

Expresionnan haci den e articulo aki no necesariamente ta refleha opinion di ArenaPoliti.co