{idkey=9048b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5732-red-rudy-lampe-lo-ta-e-ultimo-riba-e-lista-di-red-pa-eleccion-2017%3FItemid%3D101][title=ReD%3A+Rudy+Lampe+lo+ta+e+ultimo+riba+e+lista+di+ReD+pa+eleccion+2017][desc=]}
Mi persona na tres ocasion tabata e prome riba e lista di ReD, e biaha aki riba 22 di september 2017 mi lo ta e ultimo riba e lista, si haya aprobacion di e reunion di membrecia cu lo tuma lugar dia 2 di juli proximo. Mi ta pidi pueblo huzga mi pa mi obranan. Si un hende tin prueba cu mi a enriquese mi mes inhustamente riba custia di pueblo, lo mi retira de inmediato di politica. Si un hende por demostra cu mi ta hiba un bida di luho sin cu por hustifica di mi entrada, mi ta retira de inmediato di politica. Si un hende por demostra cu mi tin negoshinan, manera television, radio, uitzendbureau, you name it, of un bida di luho den un suit di 2 miyon, of cas na Malmok, sin cu mi entrada ta hustifica un bida di luho asina, mi ta retira de inmediato di politica. Ma hiba un bida honesto y humilde, pa 25 anja mi a traha como sacerdote sin cu mi a cobra salario pa mi trabao sacerdotal. Pesei mi ta pidi pueblo huzga mi pa mi obranan, pasobra Aruba mester di lidernan cu no ta stima placa.

E lema di mi campanja ta: “Voz di pueblo den parlamento”. Si mi haya e confianza lo mi tin consulta permanente cu pueblo pa tur votacion cu mester keda hasi den parlamento. Mi por garantiza e votador cu no ta esnan cu ta hinca placa bruto lo disidi den parlamento, pasobra nos partido blanco no ta permiti esei, sino e votador lo haya voz den tur decision cu cai den parlamento. Mi lo duna e poder bek na e pueblo den parlamento.

E votador sa cu hopi di mi ideanan tabata kizas demasiado dilanti di tempo. Por ehempel ta awor ta discuti e tema cu esun cu haya mas voto lo mester drenta parlamento independiente di e secuencia di e lista. Mi por cita di e gentlemen's agreement cu tur candidato di ReD mester a firma ya na juni 2005: “Pa medio di esaki mi candidato riba lista di Partido Red Democratico pa eleccion na september 2005 ta declara y ta priminti cu mi ta bon na altura  cu segun nos leynan pa eleccion pa parlamento di Aruba (Kiesverordening, AB, 1987, 110) e secuencia di lista ta determinante pa disidi kende ta drenta parlamento si acaso un partido hanja suficiente voto pa un of mas asiento. Sin embargo RED a ser lanta pa bini cu cambionan fundamental pa asina a lo largo Aruba haya bon gobernacion, intengridad den gobernacion y un democracia bibo. Den un democracia bibo ta esun cu pueblo a duna  confianza directamente/personalmente pa medio di su voto, mester tuma asiento den parlamento … Pa RED e secuencia riba lista no ta di importancia. Cual sea e posicion riba lista, ta e candidato(nan) cu logra mas voto (cu un diferencia substancial di voto) lo cubri asiento den parlamento. Mi ta priminti for di awor cu despues di eleccion ta conoci, lo mi respeta e declaracion firma aki, aunke cu pa ley mi por tin derecho riba e asiento, aunke si mi a haya por ehempel un (1) voto so.”

Esaki nos a introdusi na juni 2005, despues di esei tabata tin tanto anja di gobernacion di MEP y di AVP y ningun por a regla e cambio aki cu nos a propone na 2005. Y awe na 2017 nos ta bolbe bai eleccion sin cu e cambio aki a tuma lugar. E ta hopi tristo cu voz di pueblo no ta wordo respeta, pesei si bo kier un cambio di berdad unda ta duna pueblo ek su valor y dignidad, segun mi humilde opinion, no tin otro alternativa cu vota pa ReD,e partido blanco. Tambe ta priminti e candidato na 2005 caba cu e ta candidato pa parlamentario, no pa minister. Y te awe mi ta kere cu Aruba mester di un zakenkabinet, awe mas cu nunca.

Rudy Lampe, lijstduwer di ReD

Expresionnan haci den e articulo aki no necesariamente ta refleha opinion di ArenaPoliti.co