{idkey=5849b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5862-jacky-van-putten-por-mamanan-soltero-mester-di-un-man-urgentemente%3FItemid%3D101][title=Jacky+van+Putten+%28POR%29%3A+Mamanan+soltero+mester+di+un+man+urgentemente][desc=]}
Otro fin di siman exitoso na unda E Plataforma Nobo, POR a sali pa encontra cu e ciudadanonan. Mi persona tabatin e privilegio  pa drenta e bario di de Vuyst y vecindario. Mi a haya e oportunidad di combersa y scucha e precupacionnan cu tin cerca nos hendenan. Loke a impresionami hopi ta e situacion di mamanan soltero cu ta luchando nan so of cu poco ayuda pa asina sobrevivi.  E placa cu nan ta haya di gobierno no ta suficiente, ademas e placa no ta yega pa cumpra loke mester den cas pa asina e muchanan por tin un bida digno y respeta. Trabou ta difícil (aunke mayoria kier traha), pasobra no tin unda pa laga nan yiunan. E costo di creche ta demasiado halto y nan no por pague.  Hopi di e mamanan soltero aki ta biba den casnan di gobierno y e muchanan no tin ningun facilidad adecuado pa recrea. Canchanan di deporte cu nunca a haya atencion desde ultimo elección. No tin ningun opvang trai merdia pa nan yiunan cual ta laga e porta hancho habri pa  por scohe e mal caminda.

Den nos Plan di Accion, nos a identifica e necesidad grandi aki pa duna apoyo na nos mamanan soltero cu no tin trabou y tambe esnan cu menos recurso.

Un di nos meta ta duna importancia na asuntonan social como fundeshi di nos sociedad, esaki pa medio di e.o:

• Stimula cobradonan di onderstand cu por traha pa subi mercado laboral.

• Adaptacion y modernisacion di e areglo di canasta basico

• Reforsa e posicion di centro di barionan como pilar di convivencia dentro di nos comunidad

• Crèchenan cu ta cumpli cu normanan di calidad lo por wordo subsidia cu un maximo di 10 cupo pa crèche pa asina crea un tarifa social pa esnan di menos recurso.

• Enfoca riba prevencion di abuso di mucha y hende muher, embaraso hubenil y adiccion di droga y alcohol y tambe conscientisacion di esnan vulnerabel den nos comunidad di nan derechonan y posibilidadnan di sosten y ayudo social.

• Reforsa y duna atencion na Voogdijraad pa asina e instancia aki por eherece su funcion na un forma mas efectivo.  

• Reforsa posicion di Departamento di Asunto Social pa inclui punto di sosten bek den barionan como tambe promove sinergia cu Departamento di Labor y DPL.

E problematica aki di mama soltero ta toca mi masha, especialmente pasobra mi mes tabata un mama soltero cu mi prome yiu pa basta aña. Mi a sinti loke nan ta papia cu mi di nan situacion. Danki na mi mama stima Rinolfa Wiersma (d.f.m) cu a apoyami cu mi por a traha. Como candidato muher riba E Plataforma Nobo POR nos lo bay percura cu mamanan soltero haya e debido atencion y solucionnan real wordo brinda. E ta rekeri esfuerso di e mama pa ta parti di su solucion door di educa su mes y tuma pasonan concreto cu apoyo di gobierno pa asina mehora su situacion.


Pa mas informacion di nos Plan di Accion por subi nos website di POR www.forsanobo.com y download esaki.

Expresionnan haci den e articulo aki no necesariamente ta refleha opinion di ArenaPoliti.co