{idkey=264b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5541-upp-debate-den-parlamento-tocante-di-posicion-di-paul-croes-a-subraya-e-desigualdad-bou-di-nos-ciudadanonan-un-ta-mas-cu-otro%3FItemid%3D101][title=UPP%3A+Debate+den+Parlamento+tocante+di+posicion+di+Paul+Croes+a+subraya+e+desigualdad+bou+di+nos+ciudadanonan%21+Un+ta+mas+cu+otro%21][desc=Relaciona+cu+e+reunion+di+Parlamento+tocante+e+posicion+di+Paul+Croes%2C+UPP+mester+bisa+di+a+keda+totalmente+desapunta+den+henter+e+reunion%2C+tanto+di+parti+di+gobierno+y+e+parlamentarionan.+Desde+comienzo+di+e+reunion%2C+na+momento+cu+fraccion+di+AVP+a+bin+cu+un+di+dos+punto+di+agenda%2C+di+cual+e+procedura+pa+pone+e+di+dos+punto+aki+ta+cuestionabel%2C+tambe+di+parti+di+Presidente+di+Parlamento%2C+tabata+mustra+di+lo+a+bira+un+reunion+di+tiramento+di+lodo.+E+resultado+di+e+reunion+aki+mas+bien+ta+cu+nos+]}
Relaciona cu e reunion di Parlamento tocante e posicion di Paul Croes, UPP mester bisa di a keda totalmente desapunta den henter e reunion, tanto di parti di gobierno y e parlamentarionan. Desde comienzo di e reunion, na momento cu fraccion di AVP a bin cu un di dos punto di agenda, di cual e procedura pa pone e di dos punto aki ta cuestionabel, tambe di parti di Presidente di Parlamento, tabata mustra di lo a bira un reunion di tiramento di lodo. E resultado di e reunion aki mas bien ta cu nos gobierno y e parlamentarionan cu ta sostene gobierno, ta fomenta  desigualdad entre ciudadanonan aki na Aruba.

E curso di e reunion a bira predicibel na momento cu e promer orador di AVP a trece su puntonan, dor di bisa cu e no ta bay papia riba e caso di sr. Paul Croes pasobra e ta bou di investigacion, pero si kier a bay papia riba un otro caso cu TAMBE ta bou di investigacion. Esaki nos yama falta di consistencia politico of un politica di dobbel standard. Esaki a haci tambe cu nos Parlamento a bira un circo completo unda a bay over na gritamento y insulto uno na otro. Mientras cu e topico mes no a haya e atencion debido, cu e resultado cu awe nos comunidad ta cu e mesun dudanan pa loke ta trata e posicion di sr. Paul Croes.
Responsabilisacion no a bin tampoco di parti di gobierno pa su posicion tuma pa cu e minister en cuestion. Minister Mike Eman, pa 5 minuut a bay riba un tour estatal, pero usando ehempel di St. Maarten, cu hustamente tin un KB aworaki y un Camara di Integridad impone riba dje.
Sr. Mike Eman a bay sconde tras di un peticion haci na DWJZ pa propone cambio di ley den e tipo di asunto aki a la St. Maarten. Di e manera aki sr. Eman a trata na hustifica e decision di gobierno pa permiti sr. Paul Croes keda den funccion, pero na cas.

Pregunta di UPP ta: pakico awor kier cambia esaki? Pakico no a haci di 7 aña pasa? Kizas ta pasobra cu awor un minister a haya su mes meti den cosnan cu ta anti-constitucional segun nos leynan y cu ta contra di nos codigo penal? Cambionan cu bini asina, nos ta yama “gelegenheidswetgeving”. Y esaki no ta na bienestar di nos democracia, nos estado di derecho, ni tampoco nos normanan di fatsoen. Sr. Paul Croes mester a tuma su retiro, y punto.
Si esaki no tabata e caso, anto Gabinete Mike Eman II, cu na cabes e minister responsabel esta Mike Eman, mester a convence e minister di esaki. Of, den e ultimo trayecto, Parlamento di Aruba, e guardian di nos constitucion y di nos sistema legal di un pais drechi, mester a percura pa duna sr. Paul Croes su retiro. Pero nos sistema ta keda faya, danki na un Parlamento cu a degrada su mes na un instrumento poltico di sr. Mike Eman y su gobierno. Esaki ta e tristesa mas grandi cu nos por a mira ayera como resultado. E tipo di actitud aki di complacencia, ta haci tambe cu nos ciudadanonan mas y mas no ta kere den nos sistema. Nan no tin confianza mas, y por trece cu ne cu nos sistema ta wordo uza segun antoho di esnan na mando, particularmente ora bo tin un mayoria absoluto, e hegomonia di un solo partido. Di e forma aki creando un sistema arbitrario, na unda ta depende cu ken bo ta, y ki posicion bo tin, bo ta haya bo trato. E pueblo comun si lo no haya un trato asina. Pues nos ta crea un trato discriminatorio y desigual. Pesey UPP ta para pa un cambio fundamental  den nos sistema di representacion y eleccion, mescos tambe di gobernacion.

Bo tin cualkier remarca, sugerencia, pregunta etc., por tuma contacto cu partido UPP na This email address is being protected from spambots. You need JavaScript enabled to view it..


Partido UPP/4 di  mei 2017

Expresionnan haci den e articulo aki no necesariamente ta refleha opinion di ArenaPoliti.co