{idkey=655b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6424-benny-nisbet-ppa-un-guera-di-bandera-stickers-drinks-y-snacks-versus-un-vision-cu-idea-concreto-inovativo-di-ppa-upp%3FItemid%3D101][title=Benny+Nisbet+%28PPA%29%3A+%E2%80%98Un+guera+di+bandera%2C+stickers%2C+drinks+y+snacks%2C+versus+un+vision+cu+idea+concreto%2Finovativo+di+PPA%2FUPP%21%E2%80%99][desc=]}
Pueblo ta completamente envolvi den e proceso democratico pa elehi e proximo parlamento di Aruba. Esaki despues cu Aruba a conoce un gobierno cu un maneho fatal y un parlamento sumamente ‘zwak’ na unda ni e oposicion no tabata locual por a spera di nan. 

Un eleccion su meta realmente ta pa partidonan politico presenta nan vision, programa y projectonan pa asina convence e pueblo cu nan participacion realmente lo hiba nos pueblo den un direccion distincto y pa mejora bida di henter un sociedad.

Mester anota cu e eleccion aki tabatatin algun debate publico …pero notable tambe ta cu e debatenan a kaba varios siman prome cu e fecha cu realmente tin un eleccion. Notable tambe ta cu esnan cu na voz halto tabata pone accento den pasado di e futuro y progreso di San Nicolas y tabata organisa debate riba futuro di San Nicolas e viaha aki a briya cu nan silencio y ningun esfuerzo pa ningun debate riba future di San Nicolas!

Nos democracia arubano su nivel a desaroya su mes den un contienda unda e supuesto grandinan ta den un lucha di bandera, stickers, drinks y snacks pa no lubida e ‘borchinan gigantesco’ No di programa vision of idea pero di e kara di un of otro candidato ta worde publica …….versus e vision, programa y ideanan di e.o. e lista combina di PPA/UPP. Tanto partido AVP, MEP y POR nan campanja ta concentra nan mes riba ponemento di bandera na cas di ciudadano y si ta posibel 2,3 of 4 bandera na un cas. Na momento cu becinja pone bandera di un otro… ainda ta worde poni dos of 3 bandera aserca….pa NO papia di e tantisimo stickeracties cu ta tuma lugar entre e tres partidonan aki.

Nos por a tuma masha poco nota accionan unda e programa/vision y/of maneho di e partidonan aki ta worde projecta ..e atencion maximo ta keda na e bandera, sticker, drinks, snacks y e borchinan gigantesco.

Apesar di TUR esaki y e lucha menciona e meta na final di e proceso democratico ta e pregunta …den ki direccion ta desea di hiba nos pais.

E lista combina di PPA/UPP tin algun ponencia hopi cla e.o:

• E ser humano ta central….!
  1. Inverti 6.5% di nos GDP/entrada nacional den Ensenansa.
  2. Patient su derechonan lo worde accentua e.o. - Periodo cu huisarts y specialista mester atende cu e patient. - Derecho riba un ‘second opinion’ mester worde respeta.
• Introduccion di e principionan di ‘good governance’.
• Pasa e Ley di un ‘mededinginsauthoriteit’.
• Un moratorium riba construccion di hotel unda e excepcion ta basa riba inovacion y expancion di nos producto turistico y cu ta dentro di e espacio di nos mercadlo laboral.
• Plataforma Nacional basa riba Ley unda tin derecho y deber di e participantenen bon regla.
• Stimula inversion den un Aruba World Trade Center combina Universidad.
• Funda un compania di Real Estate pa desaroya un Education Village y Education Free Zone.
• Inverti den modernisacion di e haf di Oranjestad y expande e sitio pa barco Crusero for di 3 pa 6 !
• Inverti den diferente Museum pa projecta historia di nos pais.
• Inverti den un ‘international Golf Course’ na Seroe Colorado.
• Inverti den San Nicolas Our Caribbean Town etc etc.

E pregunta ta si despues di 31 anja di gobernacion cu e signaturanan conoci di AVP y MEP ….y despues di un periodo di gobernacion fatal y un parlamento superzwak cu pueblo lo bolbe cai pa e partidonan cu ta culpable na varios segmento di e crisis sea financiero sea economico o social.

PPA conhuntamente cu UPP ta spera cu nos sociedad y nos ciudadania lo tuma tempo pa analisa e situacion di crisis/caos/disaster cu nos ta den y realisa cu door di elehi e mesun partido y actornan cu ta responsabel pa e situacion na Aruba cu ta AVP/POR y parcialmente MEP …nos NO ta inicia un direccion pa hiba Aruba dilanti. PPA a scoge wowo habri pa un ARUBA…….PA E PROXIMO NIVEL y nos ta hasi un apelacion riba nos pueblo di Aruba pa no cai pa e ‘powerplay’ di e partidonan cu mas fondo financiero, esaki lo nifica simpelmente kizas cambio di algun actor pero e maneho cu a contribui na e crisis lo continua. 

Vota pa cambio real….cambio berdadero…vota pa e lista combina di PPA/UPP !!

Aruba, 8 di September 2017
BENNY NISBET
SECRETARIO GENERAL DI PPA

Expresionnan haci den e articulo aki no necesariamente ta refleha opinion di ArenaPoliti.co