{idkey=3573b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F341-dangui-oduber-gobierno-di-avp-ta-entregando-nos-autonomia-mientras-ta-conmemora-60-ana-di-statuut%3FItemid%3D101][title=Dangui+Oduber%3A+Gobierno+di+AVP+ta+entregando+nos+autonom%C3%ADa+mientras+ta+conmemora+60+a%C3%B1a+di+Statuut+][desc=Dialuna+15+december+2014+e+Statuut+di+Reino+Hulandes+ta+cumpli+60+a%C3%B1a.+Ariba+e+dia+aki+ni+Gobierno%2C+ni+Parlamento%2C+ni+Universidad+di+Aruba+ta+dedica+un+momento+pa+analisa+y+reflexiona+ariba+e+importancia+di+e+decreto+aki+pa+tur+Partner+den+Reino.+Como+Parlamentario+di+Fraccion+di+M.E.P.+y+como+bon+Arubiano%2C+ami+si+kier+a+duna+mi+visi%C3%B3n+ariba+topiconan+cu+tin+di+haber+cu+Statuut.+Na+varios+ocacion+ora+di+tencion+politico+entre+diferente+Organonan+y+Partnernan+den+Reino%26amp%3Bnbsp%3B+ta+referi+y+discuti]}Dialuna 15 december 2014 e Statuut di Reino Hulandes ta cumpli 60 aña. Ariba e dia aki ni Gobierno, ni Parlamento, ni Universidad di Aruba ta dedica un momento pa analisa y reflexiona ariba e importancia di e decreto aki pa tur Partner den Reino. Como Parlamentario di Fraccion di M.E.P. y como bon Arubiano, ami si kier a duna mi visión ariba topiconan cu tin di haber cu Statuut. Na varios ocacion ora di tencion politico entre diferente Organonan y Partnernan den Reino  ta referi y discuti ariba Statuut. Mientras ora a crea e Statuut e razon tabata pa e Gobierno di Antias yuda cada gobierno di e 6 islanan hiba un maneho responsabel y independientemente cada gobierno internamente atende cu nan asunto interno. Den un nota di ‘Raad van State’ a keda comproba cu e Statuut tin suficiente instrumento pa desaroyo di e país y su pueblo. Y ta habri  caminda pa oportunidadnan social, cultural y económico cu mundo ta ofrece na cada isla. Tur esaki den e cuadra di igualdad, unión y hermandad den Reino Hulandes.

Pa awe nos compronde e Statuut di Reino Hulandes ta bon pa analisa y reflexiona ariba e temporada Prome cu Statuut mihor conoci como e tempo Kolonial. Caminda e Gobernador Kolonial y Ministronan di Kolonianan  tabata tin tur poder. Tur Departamento ta duna cuenta na nan so. Caminda e Eilandsraad of Parlamento no tabata tin ningun contacto cu e hefe di Departamentonan.Pa nos compronde awe e Statuut di Reino Hulandes, mester a lesa varios buki, documento y e discurso di ex Prome Ministro Nelson Oduber, na ocacion di conmemoracion di  50 aña di Statuut na aña 2004.   Loke a resalta ta e lucha con nos a bira bas den nos mesun cas y Libertador Betico Croes a logra nos Status Aparte na 1986 y Aruba a bira un Partner den Reino Hulandes. Despues mi a lesa con tur Gobierno a traha pa conserva nos autonomía. Y e desaroyonan cu a conduci cu Gobierno di Antias a wordo desolvi  caminda Korsou y Sint Maarten a haya nan autonomía dia 10-10-2010. Ademas e islanan Boneiru, Sint Eustasius y Saba a bira BES –eilanden cu ta un municipio di Hulanda. Pues hopi cambio di poder tabata tin den e desaroyo di Structura Estatal. Cu e cambionan aki Gobierno di Reino a haya mas poder. Hopi ta papia di Kolonialismo den Reino. Pa nos ta importante pa para keto y reflexiona ariba e relacionnan di estado den nos Reino awe na aña 2014. Nos ta hopi precupa y desapuntapa e ultimo desaroyonan. Specialmente pa loke ta e repartición y entrega di poder. Notable ta cu enbes cu pais Aruba y pais Curacao  a haya mas poder e Gobierno di Reino a kita poder di nos. Ta pesey nos ta boga pa pone den nos enseñanza mas atencion ariba varios punto den cuadra di emancipación di nos pueblo. Aki nos ta referi na entre otro: pa nos pueblo condena manipulación político, condena persecución político, exihi integridad, tin conocimento di nos derecho humano, exihi transparencia, garantisa igualdad, exihi y hiba bon gobernacion y duna enseñanza y formación un rol mucho mas grandi.
Na prome lugar ta tristo pa mensiona cu desde Gabinete Mike Eman I, ta na mando Gobierno di Reino a kita e organización di Corte di Husticia for di nos pais na aña 2012. Na di dos lugar Gobierno di Reino a kita e derecho pa’ intern appel’ for di nos Gevolmachtigde Minister  na Hulanda. Y Gobierno di Aruba no a entrega keho na Raad van State y ningún instancia of Universidad di tur isla den Caribische a protesta. Nos ta orguyoso di ta forma parti di  Fraccion di MEP cu a entrega na aña 2013 un documento ‘Feestvierend ten ondergang’ caminda nos a pone tur instancia den Reino na altura cu prome Ministro Mike Eman ta violando tur regla di bon gobernacion y ta abusa di su poder door di fia y gasta hopi placa. Tur esaki como resultado cu  e debe di nos país a redobla di 40% pa 80% di nos GDP según IMF, Fitch rating y Standard & Poors. Despues CFT tambe  a confirma esaki den su notanan relaciona cu e presupuesto 2014.
Na di tres lugar ta prome biaha den historia nos a mira cu dia 11 juli 2014 Prome Minister Mike Eman, a tene un welga di hamber y campa 10 dia bao di un tent banda di Willem de Drie Toren dilanti oficina di Gabinete di Gobernador pasobra Gobierno di Reino a pone un KB ariba cabez di tur Ministro di Aruba. Den e KB a duna instrucción na Gobernador pa no firma e presupuesto 2014 prome cu CFT di Korsou controla e presupuesto 2014 di nobo cu tabata irrealistico según Raad van Advies. Segun Prome Ministro Mike Eman ela bay den welga di hamber pasobra e Gobierno di Reino a ‘viola, trapa y secuestra gobierno di Aruba’ door di no firma e presupuesto 2014. Dianan a pasa y nos pais a pasa momentonan di tencion nacional caminda Prome Ministro Mike Eman  a hasi un jamada na su activistanan pa bini na oficina di Gabinete di Gobernador pa hunto manifesta y exihi pa Gobernador Refunjol firma e Presupuesto 2014.  Tur hende por a mira con e activistanan di AVP tabata tira awa y webo ariba auto y cas di Gobernador. Pa stranjo cu e por zona ni Polis y ni Ministerio Publico a actua. Loke si a sali na cla ta e hecho cu Prome Ministro a viola e derecho y respet pa e Organo di Gabinete di Gobernador. Ta un grupo di cuidadano balente a cuminsa cu un accion di firma y a logra mas di 10 mil firma y entrega esaki na representante di Gobierno di Reino. Den un carta e firmantenan ta protesta y condena e violación aki, e acto cruel y brutal aki di Prome Ministro Mike Eman y su activistanan contra Oficina di Gabinete di Gobernador y contra e bida di señor Fredis Refujol. Despues varios grupo di cuidadanonan precupa a manifesta contra e mal maneho di Gobierno y mustra ariba e Presupuesto 2014 cu tabata fout cu a conduci na e crisis constitucional. Door cu Gobierno Mike Eman den 5 aña a hiba un mal maneho y gasta hopi placa dunado contractnan na famia, amigo y compinchinan e situación financiero a bira pesimo. A fia mas cu 1000 mil miyon florin, a gasta hopi placa na tram, conferencianan, a fiesta y viaha. Y awor cu Gobierno no tin placa ta corre tuma hopi medida den pura y ta corta den tur beneficio di e tata y mama cu ta traha duro pa cria nan famia. A hisa BBO na 2,5% y hisa tarifa di coriente cu 15%, a hisa edad di pensioen pa 65 aña pa sector priva y pa ambtenaar. Tur e medidan aki tin como resultado cu costo di bida a bira impagabel.
Na final nos kier pa nos pueblo para keto na e ‘samenwerkingsakkoord’ cu a wordo aproba den Rijksministerraad dia 12 di december 2014 caminda Prome Ministro Mike Eman a bolbe entrega parti di nos autonomía y a bolbe traciona nos pueblo. E la scohe pa entrega nos autonomía financiero y esaki ta debi na su maneho irresponsabe cu e la hiba. Ta asina cu segun Gobierno di Reino ta Prome Ministro Mike Eman a pidi pa e control financiero cay bao di e ‘Rijkswet Financieel Toezich’t, mescos cu esun di Curacao,  Sint Maarten y BES eilanden entrante aña 2015 y pa tur presupuestonan den futuro. Cu e acto baho, vil y bergonzoso aki a keda comproba cu Prome Ministro Mike Eman  a ‘traisiona, viola y trapa’ ariba autonomía di nos pais. Ningun dia Prome Ministro Mike Eman a mustra respet y consulta cu nos pueblo pa tuma tal desicionnan asina drástico contra nos autonomia. Cu esaki Prome Ministro Mike Eman ta violando e derechonan di nos pueblo. Cu hopi indignacion nos a lesa con Gobierno di AVP ta entregando nos autonomía mientras ta conmemorando 60 aña di Statuut. Mirando e situación difícil cu nos pais ta pasando aden nos ta exihi pa Prome Ministro Mike Eman baha su mal gobierno y yama elección awor!

Expresionnan haci den e articulo aki no necesariamente ta refleha opinion di ArenaPoliti.co