{idkey=2371b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4707-parlamentario-mr-xiomara-maduro-mep-nos-ta-contra-cu-dow-y-fcca-ta-wordo-usa-pa-cumpli-cu-e-campania-politico-di-eman-y-sevinger%3FItemid%3D101][title=Parlamentario+mr.+Xiomara+Maduro+%28MEP%29%3A+Nos+ta+contra+cu+DOW+y+FCCA+ta+wordo+usa+pa+cumpli+cu+e+campania+politico+di+Eman+y+Sevinger][desc=+Siman+pasa+Parlamento+a+trata+e+presupuesto+di+DOW+pa+2017+y+hunto+cune+a+trata+un+ley+pa+regla+e+debenan+cu+ta+existi+entre+FCCA+y+Gobierno.+Nos+a+bay+encontra+di+tur+dos+e+leynan+aki.+E+motibo+ta+simpel%2C+nos+ta+contra+cu+DOW+y+FCCA+ta+wordo+usa+pa+cumpli+cu+e+campania+politico+di+Ministernan+Eman+y+Sevinger.DOWE+ta+bisto+cu+e+Gobierno+aki+tin+prioridad+robes+cu+no+ta+cuadra+cu+e+nesecidad+di+e+Pueblo+aki.+Hopi+enfasis+ta+poni+riba+caretera+grandi+manera+Green+Corridor+y+Watty+Vos+Bouleva]}

Siman pasa Parlamento a trata e presupuesto di DOW pa 2017 y hunto cune a trata un ley pa regla e debenan cu ta existi entre FCCA y Gobierno. Nos a bay encontra di tur dos e leynan aki. E motibo ta simpel, nos ta contra cu DOW y FCCA ta wordo usa pa cumpli cu e campania politico di Ministernan Eman y Sevinger.

DOW
E ta bisto cu e Gobierno aki tin prioridad robes cu no ta cuadra cu e nesecidad di e Pueblo aki. Hopi enfasis ta poni riba caretera grandi manera Green Corridor y Watty Vos Boulevard siendo cu Pueblo lo kier a mira mihor caminda den nan propio bario y mantencion na camindanan existente, manera por ehempel e caminda na Sabana Basora cu tin añas sin por conoce mehoransa. Ta algun bario a wordo dorna cu klinker obviamente pa por yuda sponser di e Gobierno aki, y otronan cu mas necesidad ainda ta keda sufri na man di santo y buraco den asfalt. Banda di esaki e inundacion di poco dia ey despues cu nos Pais a haya hopi awacero ta demostra cu e prioridad na DOW no tabata pa haci algo pa trece alivio pa e necesidad cotidiano di nos Pueblo. E prioridad na nos opinion tabata simplemente dirigi na cumpli cu e agenda politico di Eman y Sevinger cu proyectonan miyonario pa cual companianan internacional di contruccion manera Odinsa y Mota Engil lo mester fungi na un of otro manera como front pa sostendornan di e mandatarionan aki y nan partido.

FCCA
Nos a observa cu na FCCA por ehempel no tabata tin construccion di casnan popular pa e periodo di 7 aña, siendo cu esey mester ta un ‘core business’ di e instituto aki. Nos a wak cu FCCA a haci hopi renobacion pa casnan cu ta pertenece na Gobierno, te cu Gobierno a haye ta pasa e casnan aki over pa FCCA por sigi inverti den nan. Y ultimo nos a wak con FCCA a tuma e tereno na Kibaima over pa asina por hiba acabo e proyecto di Smart Community, algo cu den nos concepto no ta e core business di FCCA. E proyecto aki na nos opinion ta djies pa cumpli cu e propaganda y agenda politico di Ministernan Eman y Sevinger pa asina nan por haya algo pa gaba cune den Green Conference y den foro internacional na momento di haci trabou di loopjongen pa Reino. Pasobra si di berdad kier a haci un diferencia, FCCA por a scohe pa entre esnan cu a haya un permiso pa construccion di cas, pa yuda nan construi na un manera sostenibel, sin cu mester a bay inverti den full un comunidad djies pa complace Eman manera cu e ta awor.

Drecha balansa pa fia placa
Durante e reunion Minister Sevinger a indica tambe cu awor cu e debe a keda regla entre FCCA y Gobierno, FCCA su balansa ta drecha y ta habri caminda pa e instituto por bay fia mas placa. Cu esaki ta bira bisto pa nos cu e unico meta pa cual ta regla debe ta pa FCCA por bay fia mas placa pa por cumpli cu e campania politico di Eman y Sevinger. Den e wega aki nos no ta participa y pesey nos a bay contra e dos leynan presenta.

11 december 2016

Expresionnan haci den e articulo aki no necesariamente ta refleha opinion di ArenaPoliti.co