{idkey=3421b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1070-gabinete-me-ii-inversionnan-den-mehoracion-centro-di-ciudad-ta-continua%3FItemid%3D101][title=Gabinete+ME+II%3A+Inversionnan+den+mehoracion+Centro+di+Ciudad+ta+continua][desc=Prome+Minister+Mike+Eman+ta+elogia+trabou+di+DOW%26amp%3Bnbsp%3B+ORANJESTAD+%E2%80%93+Prome+Minister+Mike+Eman+y+su+colega+encarga+cu+infrastructura+a+bishita+e+area+di+Hendrikstraat+y+Middenweg+caminda+tin+trabounan+di+embeyecemento+ta+tumando+luga.+Meta+di+e+bishita+tabata+pa+pone+nan+mes+na+altura+di+e+ultimo+desaroyonan+den+embeyecemento+di+centro+di+ciudad.+Den+e+area+a+cuminsa+caba+cu+algun+proyecto%2C+cu+ta+haci+producto+Aruba+mas+bunita+pa+nos+bishitantenan%2C+pero+tambe+pa+localnan+cu+ta+haci+uzo+di+e+cent]}
Prome Minister Mike Eman ta elogia trabou di DOW 

ORANJESTAD – Prome Minister Mike Eman y su colega encarga cu infrastructura a bishita e area di Hendrikstraat y Middenweg caminda tin trabounan di embeyecemento ta tumando luga. Meta di e bishita tabata pa pone nan mes na altura di e ultimo desaroyonan den embeyecemento di centro di ciudad. Den e area a cuminsa caba cu algun proyecto, cu ta haci producto Aruba mas bunita pa nos bishitantenan, pero tambe pa localnan cu ta haci uzo di e centro di Oranjestad pa haci nan compranan. Inspeccionando e trabounan, e Ministernan a tuma tempo tambe pa gradici e trahadonan di DOW pa e trabounan cu nan ta haciendo. Esaki ta algo cu e departamento ta haciendo riba nan mes. E trabou aki ta di un grandura cu DOW mes por traha riba dje sin mester di busca un compania pa haci esaki, loke ta spaar Gobierno placa.

Minister encarga cu Infrastructura a splica cu ta laga Departamento di Obranan Publico haci e trabounan di e cayanan mas chikito panort di Caya Principal ya cu ta conta cu e experticio y material den cas. Otro proyectonan mas grandi cu ta na caminda, manera Wilhelminastraat y Welcome Plaza, si lo cana caminda di destaho publico pa un compania priva ehecuta. “Na final nos lo mester tin un caya cu ta vibrante, un caya cu ta nobo,” asina Minister Sevinger a bisa, comentando cu ya caba el a tuma nota di comentarionan sumamente positivo for di esnan cu tabatin algun tempo sin bishita nos isla.

Di su banda, Minister President Mike Eman a confirma cu e inversionnan den mehoracion di nos isla ta bay continua. “Espacionan publico ta un di e cosnan di mas grandi den desaroyo di infrastructura fisico cu un gobierno por haci pa percura pa un calidad di bida di ciudadanonan,” e mandatario a señala. Fondonan ta bin di entre otro, Fondo Desaroyo Aruba, di Gobierno mes y tambe di proyectonan manera Renobacion Aruba N.V. cu ta fondo den cual tur instituto financiero di Aruba, fondo di pension y Gobierno ta uni forsa. E ultimo aki ta keda concretisa den e simannan nos dilanti.

Adicionalmente, Prome Minister a felicita su colega di infrastructura pa su dinamismo y director di Departamento di Obranan Publico, ing. Marlon Croes pa e trabou incansabel cu e y su ekipo ta realisando. “Esey ta un contribucion na rapidez y costo pa pais Aruba.” Mas cu nunca, e lider di Gobierno ta convenci di a tuma e miho rumbo pa nos  isla creando un ambiente total di renobacion caminda a pone prioridad pa pueblo y pais na luga di pone prioridad na otro cosnan, manera tabata den pasado.

Expresionnan haci den e articulo aki no necesariamente ta refleha opinion di ArenaPoliti.co