{idkey=2984b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2387-booshi-wever-upp-e-inociencio-schwengle-atrobe-ta-laba-su-man-manera-pontius-pilatus%3FItemid%3D101][title=Booshi+Wever+%28UPP%29%3A+E+%E2%80%9Cinociencio%E2%80%9D+Schwengle+atrobe+ta+laba+su+man+manera+Pontius+Pilatus][desc=Parlamento+di+Aruba+a+debati+dialuna+7+di+december+2015+riba+e+maneho+di+minister+Schwengle+encuanto+e+cuido+pa+nos+Grandinan.Mi+no+sa+si+mester+hari+of+yora+ora+mi+scucha+e+minister+responsabilisa+su+maneho%2C+na+unda+e+ta+presenta+su+mes+como+e+gran+victima+y+atrobe+ta+tira+culpa+riba+tur+otro+hende+cu+tin+como+meta+perhudica+su+persona.Lagami+refresca+e+minister+su+memoria+cu+e+veredicto+cu+Raad+van+Advies+specificamente+a+duna+e+ministerio+di+Salubridad+a+base+di+e+presupuesto+2014%3A+%E2%80%9CTen+aan]}
Parlamento di Aruba a debati dialuna 7 di december 2015 riba e maneho di minister Schwengle encuanto e cuido pa nos Grandinan.
Mi no sa si mester hari of yora ora mi scucha e minister responsabilisa su maneho, na unda e ta presenta su mes como e gran victima y atrobe ta tira culpa riba tur otro hende cu tin como meta perhudica su persona.

Lagami refresca e minister su memoria cu e veredicto cu Raad van Advies specificamente a duna e ministerio di Salubridad a base di e presupuesto 2014:
“Ten aanzien van de in de memorie van toelichting gepresenteerde beleidsvoornemens is de Raad van oordeel dat deze veelal een algemeen karakter dragen. Meestal wordt verwezen naar meerjaren beleidsdoelstellingen, zonder dat concrete beleidsvoornemens worden geformuleerd die betrekking hebben op het dienstjaar 2014. Met name het onderdeel van de memorie van toelichting dat betrekking heeft op de begroting van het Ministerie van Volksgezondheid, Ouderenzorg & Sport, is hiervan een voorbeeld”.

Despues di 2 aña cu e minister aki a wordo huramenta, te ainda nada concreto a sali for di su man.
A priminti cu lo bin cu Inspectie, y te ainda nos ta wardando, pero e minister sí ta declara den parlamento cu mester bin un "klachten commissie" pa e.o. SABA .
E minister no ta na altura cu keho por, y mester wordo entrega na departamento di Salubridad?

A duna di conoce cu no mester gasta mucho recurso na nos grandinan manera remedi, pasobra nan tin un edad halto caba, y pa completa e obra a hañe confronta cu problema na SABA na unda su unico defensa tabata cu e ex -director a falte respet.

Hasta awor den parlamento e minister atrobe ta tira culpa riba e ex -director cu no t’ey mas y no por defende su mes contra e acusacion di e minister.
Tambe ta tira culpa di un mal maneho di SABA riba e Raad van Toezicht cu a duna e minister di conoce cu e no tin nada di bisa nan.

E lista di espera na SABA tin di haber cu e hecho cu mas y mas patient cu malesanan manera demencia, ta wordo admiti, y esey ta evita admision di personanan sin malesa (bejaardenzorg).
E minister no ta na altura di e “versnelde vergrijzing” cu CBS a pronostica na Aruba?
E minister no ta na altura di e hecho cu diabetes, presion halto y obesidad ta e causa di un aumento fenomenal di malesanan cronico cu lo afecta nos Grandinan di tal forma cu admision den un centro specialisa lo ta necesario?
Minister ta na altura di e hecho cu departamento di Sociale Zaken a haci intento pa purba mantene e Grandinan sano na cas, y cu esey a trese bastante problema?
Minister a considera e hecho cu famianan a bira mas chikito y cu ambos mayor ta traha of e famia ta consisti di un mayor?

Asina mi por sigui menciona con e minister aki ta keto bay hiba un maneho sin pia y sin cabes, na unda ta priminti cielo riba tera, pero ta keda desapunta cu e forma cu e kier tira culpa riba tur hende pa sconde su incompetencia.
Raad van Advies ya caba a haña ta necesario pa hala su atencion, pero lamentablemente e no ta siña su les, y e gran perdedor ta e pueblo di Aruba cu ta sigui wordo confronta cu un servicio medico deteriora y particularmente nos Grandinan cu ta wordo laga pa nan cuenta.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 7, 2015

Expresionnan haci den e articulo aki no necesariamente ta refleha opinion di ArenaPoliti.co