{idkey=1512b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3458-gabinete-me-ii-tedx-ta-un-plataforma-cu-ta-yuda-fomenta-y-reflexiona-riba-miho-ideanan-pa-aruba%3FItemid%3D101][title=Gabinete+ME+II%3A+TedX+ta+un+plataforma+cu+ta+yuda+fomenta+y+reflexiona+riba+miho+ideanan+pa+Aruba][desc=Prome+Minister+Eman+presente+na+anuncio+di+Tedx+Aruba+2016%26amp%3Bnbsp%3BORANJESTAD+%E2%80%93+Prome+Minister+Mike+Eman+ta+e+persona+responsabel+pa+trece+Aruba+e+plataforma+di+TedX+unda+cual+mentenan+briyante+ta+pone+audiencia+pensa+riba+solucion+pa+problemanan+existente+of+cambionan+riba+terenonan+tecnologico%2C+entretenimento%2C+educacion+y+dise%C3%B1o.ORANJESTAD+-+Stichting+TEDx+Aruba%2C+a+yama+un+encuentro+cu+prensa+pa+anuncia+fecha+di+TEDxAruba+2016.+Despues+di+TEDxAruba+2015%2C+a+keda+hopi+entusiasmo+pa+sigui+cu+even]}
Prome Minister Eman presente na anuncio di Tedx Aruba 2016 

ORANJESTAD – Prome Minister Mike Eman ta e persona responsabel pa trece Aruba e plataforma di TedX unda cual mentenan briyante ta pone audiencia pensa riba solucion pa problemanan existente of cambionan riba terenonan tecnologico, entretenimento, educacion y diseño.

ORANJESTAD - Stichting TEDx Aruba, a yama un encuentro cu prensa pa anuncia fecha di TEDxAruba 2016. Despues di TEDxAruba 2015, a keda hopi entusiasmo pa sigui cu evento mas grandi ainda y esaki ta priminti di ta e caso, september 23 proximo. Presente durante di e conferencia di prensa, tabata Prome Minister di Aruba, cu ta un sostenedor grandi di e evento aki na Aruba, y ta un di e motornan tras di e evento cu pa prome biaha a yega Aruba na 2015. Mas cu un evento, TEDx ta un plataforma caminda cu personanan local y internacional ta tene discursonan riba tereno di tecnologia, entretenimento y diseño pa e audiencia por pensa riba solucionnan pa problema of cambionan den e terenonan aki.

Prome Minister a splica, den su discurso durante anuncio di di TEDx 2016, cu 25 aña despues di Status Aparte a haci un inventarisacion di e desaroyo social y economico di Aruba. A yega na e conclucion, sr. Eman ta splica, cu tabata falta hopi pa por yega na un pais di 5 strea. E desaroyo economico grandi for di Status Aparte no a traduci den un bienestar social proporcional. E desaroyo economico no a traduci den un miho sistema di educacion, nos scolnan tabata deteriora, por ehempel, no a traduci den un sistema di salud adecua pa nos poblacion, entre otro nos hospital tabata uno anticua y cu no por atende e exigencianan di un poblacion cu a crece y exigencianan mas moderno. Mester yega na un nivel di 5 strea den tur sector, segun Prome Minister, y tambe mester tin un ambiente di innovacion cu ta cuadra cu e vision di un pais cu ta hopi mas cu loke nos ta orguyoso di dje, manera por ehempel, nos beachnan bunita y nos clima special.

Sr. Eman a recorda e storia di con Aruba tabata wordo describi den tur raportahenan den pasado for di temponan colonial. Semper tabata wordo bisa cu Aruba nunca a hunga un rol prominente regionalmente, pero loke si semper, esnan cu tabata haci inventario e temponan aya riba cada isla, tabata haya ora cu yega Aruba ta un poblacion chikito, orguyoso di nan pais. Nan tabata expresa cada bes cu no tin miho luga na mundo cu e pida baranca aki. “Cada un di e rapportnan aki ta bisa cu cada bes cu nan yega Aruba, nan ta topa un poblacion chikito, pero asina orguyoso di e tera caminda cu nan ta biba, cu nan tabata expresa cu no tabatin miho luga na mundo cu e pida baranca unda nan ta biba. Esaki ta wordo bisa door di esnan cu a biba 50, 100, 150 of 200 aña pasa. E ta un sentido di orguyo y conviccion cu nos tin cu nos por hiba nos pais na nivelnan mas halto. Pa nos por haci esey, nos tin cu keda pone ambicionnan grandi y nos tin cu percura pa crea plataformanan cu ta stimula innovacion, discusion, reflexion profundo cu mester tin y inspira personanan."

For di e prome gobernacion di Prome Minister Eman caba, el a trata di pone como maneho pa inspira. “Den Bureau Innovatie tin diferente persona prominente cu mi tabata topa tempo mi tabata Parlamentario. Nan a caba di studia, pero tabata na Hulanda y no tabata tin fin di bolbe Aruba. Mi tabata puntra nan di con nan no ta bolbe Aruba pa yuda, construi e pais. Mi tabata purba di transmiti e idea di un vision di un pais cu por alcansa hopi mas, si tur su miho talentonan forma parti di e pensamento di kico nos por haci na Aruba. Den Bureau Innovatie nos ta mira personanan innovativo trahando, pero nos ta mire tambe den tur sector di Aruba,” e mandatario a bisa. El a agrega cu e plataforma TEDx ta uno cu ta duna e miho cerebronan di Aruba y di otro paisnan pa yuda fomenta, alimenta, e pensamento grandi di cu por traha un sociedad hopi special di Aruba. ”Un sociedad unda no solamente e entrada economico, material, pero tambe esun di aspecto social, amor pa bisiña, ta pensa tambe riba futuro, e proteccion di medio ambiente ta importante."

Minister Eman a sigui splica, cu Aruba a gara e vision di sostenibilidad como un tema importante pa e pais, pero “mundo tambe a cumisna brasa Aruba como un ehempel, unda cu bo por demostra cu un vision basa riba sostenibilidad ta alcansabel y ta crea felicidad y un miho bienestar pa su hendenan."

Eman mes tabata un orador na TEDx Binnenhof 2014 Den Haag Hulanda y despues a logra trece un plataforma similar bek Aruba. Cu cooperacion di diferente sponsornan TEDx ta hayando su mesun nomber y luga prominente internacionalmente. E ta un plataforma importante cu ta yuda fomenta discusionnan y crea reflexion nacional riba unda mas “nos por hiba nos pais”.

Expresionnan haci den e articulo aki no necesariamente ta refleha opinion di ArenaPoliti.co