{idkey=1336b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3457-rene-herde-avp-a-haci-proposicion-pa-sali-di-empasse-riba-areglo-di-conflicto%3FItemid%3D101][title=Rene+Herd%C3%A9+%28AVP%29%3A+A+haci+proposicion+pa+sali+di+empasse+riba+areglo+di+conflicto+][desc=Durante+di+e+reunion+entre+parlamentarionan+di+Aruba%2C+Corsow%2C+Sint+Maarten+y+Hulanda+riba+e+leynan+presenta+pa+crea+un+%26quot%3Bareglo+di+conflicto%26quot%3B+%28%26quot%3Bgeschillenregeling%26quot%3B%29+a+parse+ayera+mainta+cu+partidonan+lo+a+pega+riba+con+ta+duna+forma+y+contenido+na+e+areglo+aki.+Pa+evita+cu+e+deliberacionnan+pega%2C+den+nomber+di+e+delegacion+di+Aruba+y+despues+di+consulta+cu+tur+hende+den+e+delegacion+di+Aruba%2C+Rene+Herde%26%23039%3B+a+presenta+un+proposicion+pa+sali+di+e+empase+y+hiba+e+discucion+un+stap+mas+serca+di+un+solu]}
Durante di e reunion entre parlamentarionan di Aruba, Corsow, Sint Maarten y Hulanda riba e leynan presenta pa crea un "areglo di conflicto" ("geschillenregeling") a parse ayera mainta cu partidonan lo a pega riba con ta duna forma y contenido na e areglo aki. Pa evita cu e deliberacionnan pega, den nomber di e delegacion di Aruba y despues di consulta cu tur hende den e delegacion di Aruba, Rene Herde' a presenta un proposicion pa sali di e empase y hiba e discucion un stap mas serca di un solucion. E proposicion cu Rene Herde a haci ta ensera un elaboracion mas concreto di e condicionnan cu cua un areglo di conflicto mester cumpli. Como alternativa pa e Corte Supremo di Reino (Hoge Raad) como e organo cu lo ta encarga cu e areglo di conflicto, a propone e seccion di Raad van State cu ta duna veredicto final den caso di conflictonan den maneho. E seccion aki lo por trata conflictonan riba e interpretacion strictamente legal di Statuto. Pa loke ta e conflictonan riba maneho, a propone pa enbez di laga un huez dicta sentencia den asuntonan di maneho, pa laga e seccion di conseho di Raad van State duna conseho. E proposicion aki a wordo bon ricibi. Cu esaki a logra saca e discucionnan for di e empase. Awor tur delegacion ta bay studia e proposion aki pa wak si e ta cumpli cu e condicionnan y si e ta practico. Si logra haya tur delegacion di e cuatro paisnan pa sostene e proposicion aki, lo por hinca esaki den e ley y asina haya suficiente sosten pa e ley den Parlamento Hulandes.

SOSTEN POLITICO
Pa aproba un ley cu ta formalisa un "areglo di conflicto" entre paisnan di Reino, mester haya suficiente sosten den Parlamento Hulandes. Ayera mainta a surgi e situacion cu e proposicion di ley di e tres parlamentonan di Aruba, Corsow y Sint Maarten, manera presenta e siman aki, no lo haya suficiente sosten den parlamento Hulandes. Cu e proposicion cu Rene Herde a presenta den nomber di e delegacion di Aruba, tin mas chens pa haya suficiente sosten. Si no a haci e proposicion y si a keda den e empase cu a surgi, ta e proposicion di Minister Plasterk lo a haya sosten y wordo aproba. Rene Herde': "Ya cu e proposicion di minister Plasterk no ta cumpli cu e exigencianan palabra aña pasa, nos lo a haya un a reglo di conflicto cu no lo a yuda nos den niun forma. Nos lo a keda den e mes un situacion cu no ta funciona. Pesey a haci e proposicion. Cu e proposicion cu nos a haci, e concepto di ley di Aruba, Corsow y Sint Maarten, tin mas chens di haya sosten den Parlamento Hulandes y bira e ley cu lo ta mas manera no ta desea."
E delegacion di Aruba tambe a poropone pa trata e proposicion di ley aki prome cu fin di aña 2016. Si logra esey, lo tin un areglo di conflicto na vigor, prome cu eleccion na Hulanda na maart 2017. Rene Herde': "Ta importante pa trata e ley aki prome cu eleccion. Awor aki nos por logra haya un majoria den Parlamento Hulandes. Nos no sa con e constelacion di Parlamento lo ta despues di eleccion." Asina Rene Herde' a informa for di Den Haag, Hulanda.

Expresionnan haci den e articulo aki no necesariamente ta refleha opinion di ArenaPoliti.co