{idkey=4122b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1003-booshi-wever-upp-banda-di-ta-mentiroso-parce-cu-gobierno-y-fraccion-di-avp-tin-cara-di-coco%3FItemid%3D101][title=Booshi+Wever+%28UPP%29%3A+Banda+di+ta+mentiroso%2C+parce+cu+gobierno+y+fraccion+di+AVP+tin+cara+di+coco%21%21][desc=Despues+cu+U.P.P.+a+tuma+nota+di+e+protocol+firma+diasabra+dia+2+di+mei+2015%2C+nos+kier+a+duna+e+siguiente+declaracion+cortico.+Den+curso+di+e+siman+aki%2C+nos+lo+bay+mas+den+detaye+riba+dicho+protocol.Definitivamente+parce+cu+cuero+di+cara+a+caba+aki+na+Aruba.Despues+cu+siman+pasa+U.P.P.+a+puntra+%E2%80%9Cwho%E2%80%99s+fooling+who%E2%80%9D%2C+e+siman+aki+ta+resulta+cu+ta+comedia+grandi+ta+wordo+hunga+aki+na+Aruba%2C+unda+cu+atrobe+ta+trata+na+tira+santo+den+wowo+di+pueblo.Siman+pasa+ainda+nos+por+a+wak+Baba+Herde%2C+lide]}
Despues cu U.P.P. a tuma nota di e protocol firma diasabra dia 2 di mei 2015, nos kier a duna e siguiente declaracion cortico. Den curso di e siman aki, nos lo bay mas den detaye riba dicho protocol.

Definitivamente parce cu cuero di cara a caba aki na Aruba.
Despues cu siman pasa U.P.P. a puntra “who’s fooling who”, e siman aki ta resulta cu ta comedia grandi ta wordo hunga aki na Aruba, unda cu atrobe ta trata na tira santo den wowo di pueblo.

Siman pasa ainda nos por a wak Baba Herde, lider di e fraccion berde, tabata implora partidonan di oposicion den Parlamento, pa hunto sera un bloke y manda un señal pa gobierno pa bini mas pronto posibel cu e ley pa implementa un organo di control (fiscal council) y asina, via di un landsverordening, mustra Hulanda cu ta Aruba kier controla su mes y cu e ley no ta bin pasobra Hulanda kier.
E realidad sinembargo a resulta di ta otro.

Nos por a mira con luna nobo ta habri, unda cu ta anuncia cu den 3 luna lo bini cu CAFT pa Aruba. Den e protocol di 2 di mei 2015 entre Aruba y Hulanda tambe a palabra cu lo pasa un ley ("landsverordening") den Parlamento pa consagra e supervision di Cft oficialmente y evita asina un ley mas halto, deriva for di un AMvR.
Sinembargo un "Landsverordening" di cua Hulanda ya a scirbi (miho bisa cu Hulanda a impone) e texto, cu ni Gobierno ni Parlamento di Aruba, por kita ni un komma.

Dialuna, 4 di mei 2015, nos por a mira un presentacion pober den Parlamento di Aruba, tanto di partido AVP cu ta sostene gobierno, como di Prome Minister, cu sin ningun tiki berguensa a entrega nos autonomia, y kier bin bende nos Pueblo cu ta trata di un logro grandi despues di discusion largo.
Awe tambe Baba Herde kier bin pretende cu nan ta urgi na gobierno pa bini cu un fiscal council, y pa no warda mescos cu ya a wordo proponi na 2008.

Entre tanto tabata tin mas cu 5 aña di signatura berde a pasa, y awor Baba Herde kier mustra siman pasa, cu no mester warda mas pa bin cu un organo di control asina.
Pero si nos wak tur e acontecimentonan, y cu Mike E. a bisa cu na Panama caba a pone e base pa e acuerdo aki, nos por comprende cu - pa no perde cara - AVP su contra-proposicion tabata ensera cu lo acepta un control di Hulanda por medio di un “CFT”, pero cu Parlamento di Aruba lo ta encarga pa bin cu e ley aki.

Si nos por comprende, Prome Minister Mike E. a bisa cu ta Hulanda, den e caso aki Ministro di Asuntonan Interior di Reino, lo ta esun, cu riba proposicion di Aruba, ta nombra e colegio aki. Esaki ta conduci na e conclusion cu gobierno di Aruba, prome cu a trata e ley den Parlamento, a entrega tambe autoridad di Parlamento, door cu Parlamento lo duna Minister Hulandes cierto poder pa institui e comision aki.
Y asina mes Prome Minister ta hasta tuma su propio miembronan di partido den parlamento haci door di a contesta preguntanan di Parlamentarionan di AVP, cu Parlamento su poder ni autoridad lo wordo entrega cu ley cu lo wordo trata aki.

Nos por mira cu cada bes ta usa como excusa, cu - pasobra mester a “boost” nos economia - gobierno a scohe pa inverti na grandi.
Y awor cu Hulanda a cuminsa duda den seriedad di e gobierno di Aruba, nan ta bisa cu awor cu nos economia a drecha, awor ta bay saca e gasto riba e ciudadano pa asina paga bek loke a wordo malgasta.

E realidad ta cu a hiba un politica descabeya di inversion riba prioridadnan robes, unda cu na 2009 nos debe nacional tabata unicamente 40% di nos GDP (entrada nacional), y awor e debe aki a subi te na 80% di nos GDP.
Y awor cu baca ta hogando na pos, kier bin haci comosifuera a bin rescata e pais aki, te cu nan ta kere cu nan ta heroenan.

Pero realidad ta cu nan ta buscando un “time delay” pa asina purba na wak kico mas por wordo chicá te cu fin di juli entrante. Despues di esey tambe lo mira cu e CAFT lo bay tin rienda di nos pais den su man; Parlamento a perde su rol di e organo mas halto di nos constitucion, y esaki danki na nan mes. Parlamento di Aruba mes a contribui na e situacion aki, door di no sa di actua independientemente.

Aruba a perde su autonomia financiero door di e traicion aki, contrario cu Corsow y St. Maarten, sin exoneracion di nos debenan. Y manera nos a bisa caba, djies pa keda sinta den e stoel di Minister y di Parlamentario, y pa evita investigacionnan penal contra varios ministernan.

Ki dia e supervision riba tereno di Husticia lo sigui, conforme e acuerdo cu Mike E. a firma caba cu Hulanda? Of aki tambe lo bay grita: "over my dead body", y bay den un welga di hamber ficticio???

Mi ta termina señalando cu probablemente Mike E. y su 13 marionetanan lo sali victorioso di e bataya aki, pasobra e pueblo ta kedando keto y Mike E. sa esey tambe. E ta sigui hunga awendia su rol di martir y di e "braafste jongen van de klas", cu e speransa cu e pueblo haña duele di dje y sigui wanta e abuso cu e gobierno ta cometiendo.

Na spaño tin un dicho cu e gobierno ta usa: "los perros ladran y la caravana pasa"!!
Laga e pueblo critica numa, pasobra lo yega e momento cu hasta e critica lo stop, y gobierno por sigui su maneho destructivo.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 5, 2015

Expresionnan haci den e articulo aki no necesariamente ta refleha opinion di ArenaPoliti.co