{idkey=5376b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1194-xiomara-maduro-mep-abuso-contra-hende-muher-y-violencia-domestico-trata-den-tweede-kamer-di-hulanda%3FItemid%3D101][title=Xiomara+Maduro+%28MEP%29%3A+Abuso+contra+hende+muher+y+violencia+domestico+trata+den+Tweede+Kamer+di+Hulanda][desc=Siman+pasa+parlamentario+Ady+Thijsen+y+mi+persona+a+representa+Fraccion+di+MEP+na+Tweede+Kamer+di+Hulanda+como+delegado+special+representando+Aruba+den+e+debate+publico+pa+aproba+e+Ley+di+Reino+pa+preveni+y+combati+abuso+contra+hende+muher+y+violencia+domestico.+Aki+ta+sigi+e+disertacion+di+mi+persona+den+primera+tanda+di+e+reunion+aki.Se%C3%B1alnan+preocupante+den+comunidadNa+Aruba+tambe+nos+tin+di+haber+cu+abuso+contra+hende+muher+y+violencia+domestico+y+esaki+tin+efecto+negativo+pa+e+bienestar+di]}
Siman pasa parlamentario Ady Thijsen y mi persona a representa Fraccion di MEP na Tweede Kamer di Hulanda como delegado special representando Aruba den e debate publico pa aproba e Ley di Reino pa preveni y combati abuso contra hende muher y violencia domestico. Aki ta sigi e disertacion di mi persona den primera tanda di e reunion aki.

Señalnan preocupante den comunidad
Na Aruba tambe nos tin di haber cu abuso contra hende muher y violencia domestico y esaki tin efecto negativo pa e bienestar di nos hende muher y specialmente pa e desaroyo sano di nos muchanan. Señalnan cu nos ta haya di comunidad y cu diferente instancia gubernamental y particulier ta relata na violencia domestico, ta entre otro, embaraso hubenil y dropouts. Aruba ta e Pais cu mas embaraso hubenil den nos region. Violencia domestico ta stroba hobennan di studia y ta resulta hopi biaha cu e hoben ta stop di bay school. E señalnan aki ta preocupante.

Mester haci un investigacion nacional
E problema social aki ta mas grandi cu locual nos por lesa den corant of di locual nos lo por mira registra den registronan di Polis. For di e studio haci na 2013 “Aanpak huiselijk geweld in Aruba” di sra Marval, a sali na cla cu no ta tur caso di abuso domestico ta wordo registra siendo cu Polis mes ta indica cu pa dia dos pa tres biaha nan ta wordo yama pa intermedia den un situacion di violencia domestico. Un investigacion nacional riba e tema di violencia domestico ainda no a wordo haci y pa e motibo aki ningun instancia na Aruba tin un bista con serio e situacion di abuso ta na nos Pais. Si nos por menciona cu riba mesa awor tin un propuesta di sra Marval di Fundacion Pa Estudio di Genero y Famia, pa haci un investigacion nacional riba e tema aki, pero lamentablemente e fondonan pa esaki ainda no ta disponibel. Ta nos deseo pa e investigacion aki por wordo haci mas pronto cu ta posibel sea of no den cooperacion cu e otro Paisnan di Reino.

Leynan necesario no ta cla ainda
Riba e tereno di legislacion, nos por bisa, cu na e momentonan aki Gobierno ta trahando riba un plan di implementacion di e leynan necesario. Por menciona cu e Ley di Prohibicion Domestico Temporal (tijdelijk huisverbod) ainda no ta cla, ya cu nos no por cumpli ainda cu rekisitonan manera un shelter pa hende homber cu ta agredi e hende muher of ta e propio victima di violencia domestico.

Laga e Ley di Reino ta un impulso
En corto, na Aruba tin hopi trabou pa wordo haci pa asina nos por cumpli cu e Tratado di Istanbul y e Ley di Reino pa preveni y combati abuso contra hende muher y violencia domestico. Pero pa e bienestar di nos hende muher y muy special na bienestar di nos muchanan na Aruba, nos ta spera cu e Ley di Reino lo brinda un impulso na tur Pais den Reino pa sostene otro cu conocemento y experticio pa asina hunto nos por lucha contra abuso di hende muher y violencia domestico.

9 juni 2015

Expresionnan haci den e articulo aki no necesariamente ta refleha opinion di ArenaPoliti.co