{idkey=8888b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1230-xiomara-maduro-mep-gabinete-eman-su-mal-maneho-financiero-ta-pone-cu-bbo-ta-bay-subi-mas-cu-4-den-2015%3FItemid%3D101][title=Xiomara+Maduro+%28MEP%29%3A+Gabinete+Eman+su+mal+maneho+financiero+ta+pone+cu+BBO+ta+bay+subi+mas+cu+4%25+den+2015][desc=Dia+4+di+juni+2015+CFT+a+duna+Minister+Bermudez+nan+conseho+riba+e+presupuesto+pa+2015+di+nos+Pais%2C+riba+e+plan+di+Gabinete+Eman+pa+drecha+finanzas+publico+y+riba+e+peticion+di+Gobierno+di+Aruba+pa+presta+placa+riba+mercado+internacional.+Locual+a+resalta+di+e+conseho+aki+ta+cu+CFT+ta+recomenda+Gabinete+Eman+pa+hisa+e+BBO+mas+cu+4%25+den+2015+pa+asina+por+drecha+nan+mal+maneho+financiero.E+deficit+lo+ta+mas+grandiSegun+CFT+mirando+e+cifranan+di+realisacion+di+e+presupuesto+2015+ta+mustra+cu+Gabine]}
Dia 4 di juni 2015 CFT a duna Minister Bermudez nan conseho riba e presupuesto pa 2015 di nos Pais, riba e plan di Gabinete Eman pa drecha finanzas publico y riba e peticion di Gobierno di Aruba pa presta placa riba mercado internacional. Locual a resalta di e conseho aki ta cu CFT ta recomenda Gabinete Eman pa hisa e BBO mas cu 4% den 2015 pa asina por drecha nan mal maneho financiero.

E deficit lo ta mas grandi
Segun CFT mirando e cifranan di realisacion di e presupuesto 2015 ta mustra cu Gabinete Eman lo tin un deficit mas grandi cu e 3,7% cu a wordo premira. Pero como cu Minister Bermudez a bisa durante e debate publico cu elo bin cu mas medida si ta necesario, CFT a keda trankilo. CFT a keda satisfecho tambe den mira cu e Fraccion di AVP a purba baha e deficit door di hisa e BAZV cu 1% mas cu ta pone cu Pueblo lo mester bay paga 3,5% na BBO y BAZV.

Hisa BBO cu 1% no ta suficiente
CFT a duna su opinion riba e amienda di Fraccion di AVP pa hisa BAZV cu 1%. Segun CFT esaki no ta suficiente pa asina por drecha e finanzas y keda den margen di locual Gobierno mes a priminti di haci. Y pesey a recomenda pa ora cu traha e ley pa hisa e BAZV, pa haya pone 0.5% aserca y hisa e BAZV e ora na 2.5% enves di 2%. Cu e subida aki Pueblo lo paga 4% na BBO y BAZV.

Prepara pa hisa BBO mas cu 4%
Na mesun momento CFT a conseha Gabinete Eman pa haci preparacion politico y traha riba e ley necesario pa hisa e BBO mas cu 4% ainda den 2015, ya cu nan ta premira caba cu e medidanan proponi pa Gabinete Eman no lo yuda pa cumpli cu e meta proponi den e presupuesto di 2015.

Pueblo perhudica pa mal maneho
Mester remarca cu tanto cu Gabinete Eman a demonisa BBO, awe nos ta mira cu ta na BBO mes nan ta recuri pa por drecha e desastre cu nan a haci cu e finanzas publico di nos Pais. Na unda cu AVP a gana un eleccion cu e promesa di elimina e 3% di BBO, awe e mesun AVP aki ta bay hisa BBO mas cu 4 % y sin miras cu esaki lo ta suficiente pa drecha e desastre cu nan a haci. Tristo ta cu ta e Pueblo di Aruba ta esun cu ta keda perhudica pa e mal maneho aki. Si Gabinete Eman a goberna na drechi, nunca e Pueblo lo mester a wordo perhudica di e forma aki.

16 juni 2015

Expresionnan haci den e articulo aki no necesariamente ta refleha opinion di ArenaPoliti.co