{idkey=2484b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1238-evelyn-wever-croes-mep-no-por-culpa-mep-pa-locual-cu-mike-eman-mes-a-sembra-y-cosecha%3FItemid%3D101][title=Evelyn+Wever-Croes+%28MEP%29%3A+No+por+culpa+MEP+pa+locual+cu+Mike+Eman+mes+a+sembra+y+cosecha][desc=Nos+a+haya+basta+comentario+riba+e+manifestacion+cu+a+tuma+lugar+diadomingo+ultimo+na+Linear+Park+na+unda+cu+un+grupo+di+cuidadano+preocupa+di+e+Pais+aki+a+manifesta+nan+malcontento+den+presencia+di+Minister+Eman.+Y+ta+haya+na+su+lugar+pa+duna+e+sigiente+declaracion.Cada+ken+ta+liber+pa+manifestaNa+Aruba+te+ainda+nos+conoce+e+libertad+di+por+manifesta+nos+malcontento+dentro+di+locual+ley+ta+permiti+cada+cuidadano.+Pesey+e+pesamento+cu+cada+manifestacion+cu+tuma+lugar+na+Aruba+ta+wordo+pensa%2C+org]}
Nos a haya basta comentario riba e manifestacion cu a tuma lugar diadomingo ultimo na Linear Park na unda cu un grupo di cuidadano preocupa di e Pais aki a manifesta nan malcontento den presencia di Minister Eman. Y ta haya na su lugar pa duna e sigiente declaracion.

Cada ken ta liber pa manifesta

Na Aruba te ainda nos conoce e libertad di por manifesta nos malcontento dentro di locual ley ta permiti cada cuidadano. Pesey e pesamento cu cada manifestacion cu tuma lugar na Aruba ta wordo pensa, organisa y ehecuta pa MEP ta uno eroneo. Y cu esaki nos ta bisa cu no ta MEP a organisa e manifestacion di diadomingo pasa. Si nos ta aplaudi e hecho cu tin cuidadano na e Pais aki cu ta sali manifesta nan malcontento na un manera pasifico.
Nos ta condena e provocacion di parti di Minister Eman For di e video cu a wordo graba di e manifestacion, nos por a mira cu e grupo di manifestantenan a manifesta na un manera trankilo. Ta ora cu Minister Eman a aserca e grupo y a provoca nan pidiendo e manifestantenan un pa un pa nan dale, na e momento ey palabranan malo a wordo lansa den direccion di e mandatario. Algo cu ta ponebo pensa con Minister Eman siendo un politico y mandatario di e Pais aki por a hinca den su cabes pa bay provoca un grupo di manifestante di e manera directo aki. E provocacion aki di parti di Minister Eman ta di condena.

Awe Minister Eman ta cosecha locual ela sembra. Hopi ta critica e hecho cu a usa palabra insolente den direccion di Minister Eman. Pero nos mester puntra nos mes dicon a bay asina lew. No solamente e hecho cu Minister Eman mes a provoca e manifestanan ta hunga un rol, pero no lubida cu Minister Eman awe a cosecha locua ela sembra cu su mal maneho, cu su mentiranan y cu su oprecion di e Pueblo aki. Pasobra ainda ta fresco den memoria di nos Pueblo e manera cobarde y cruel cu e mandatario aki a manda riot commando pa bati homber, muher y hoben inocente dilanti bestuurskantoor na momento cu nan a manifesta na un manera pacifico contra e abuso di hisa prijs di awa y coriente. Pa no lubida e manifestacion di Minister Eman mes contra nos Gobernador gritando palabra insolente su direccion, fomentando un odio riba Gobernador, terorisando e cas di Gobernador y su famia. E simiya yena cu odio aki cu Minister Eman a sembra, awe a dune su cosecha. Pesey bo no por culpa MEP pa locual cu Mike Eman mes a sembra y cosecha.

Duna respet pa bo wordo respeta

Nos Pueblo ta conoci pa su cordialidad y respet cu nos ta brinda na otro. Nos mandatarionan ta wordo respeta. Pero na momento cu mandatarionan mes ta faya y ta falta respet na e Pueblo cu nan ta sirbi, nan ta habri caminda pa Pueblo falta nan respet. Pesey di nos banda nos ta haci un apelacion na Minister Eman pa caba cu su falta di respet, provocacion y oprecion di e Pueblo di Aruba. Nos ta recorde cu e mester duna respet pa e por wordo respeta.

Expresionnan haci den e articulo aki no necesariamente ta refleha opinion di ArenaPoliti.co