{idkey=9730b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1258-evelyn-wever-croes-aruba-merece-mihor%3FItemid%3D101][title=Evelyn+Wever-Croes%3A+Aruba+merece+mihor][desc=VIOLENCIA+NO+TA+YUDA+CU+NADA%26amp%3Bnbsp%3B+ORANJESTAD+%E2%80%93+Lider+di+MEP+Evelyn+Wever-Croes%2C+despues+di+e+reuni+cu+Mando+Policial%2C+a+hasi+un+yamada+di+NO-VIOLENCIA.+Esaki+mirando+e+tension+cu+tin+awor+entre+e+grupo+di+7+y+gobierno+di+AVP.+%E2%80%9CApesar+cu+nos+di+MEP+no+tin+nada+di+haber+cu+e+problema+aki%2C+toch+mi+ta+cumpli+cu+palabracion+hasi+cu+Mando+Policial+pa+manda+un+convocaci%C3%B3n+di+no+violencia.+E+incidente+di+diadomingo+ultimo+a+spanta+hopi+hende%2C+especialmente+esnan+cu+no+tabata+conciente+di+cuanto+do]}
VIOLENCIA NO TA YUDA CU NADA 

ORANJESTAD – Lider di MEP Evelyn Wever-Croes, despues di e reuni cu Mando Policial, a hasi un yamada di NO-VIOLENCIA. Esaki mirando e tension cu tin awor entre e grupo di 7 y gobierno di AVP.

“Apesar cu nos di MEP no tin nada di haber cu e problema aki, toch mi ta cumpli cu palabracion hasi cu Mando Policial pa manda un convocación di no violencia. E incidente di diadomingo ultimo a spanta hopi hende, especialmente esnan cu no tabata conciente di cuanto dolor y rabia tin den comunidad debi na e mal maneho den nos pais. Especialmente esnan cu no tabata sa cuanto famia tin di lucha duro pa pone pan riba mesa pa nan yiunan, cu mester pasa anochinan den scuridad pasobra nan no por paga nan recibo di coriente, cu awor ta buscando placa desesperadamente pa paga schoolgeld sino nan no por haya e rapport di nan yiu. Esey ta e realidad cu miles y miles di famia ta bibando aden. Pero di otro banda nan ta mira cuanto campanjador di AVP a haya trabou den gobierno, algún te hasta a kita ambtenaar for di trabo upa pone e campanjador. Nan tin di mira con 17 miyon florin ta wordo malgasta tur anja djis pasobra nos a haya dos minister extra. Y comprende nan deseperacion, awor c unan ta tende cu e BBO no ta djis bai bek na e nivel di 2007, 3%, sino cu e ta bai bira 4% of mas te hasta! Ami si conoce e dolornan aki, ami si conoce e desesperacion aki. Locual nos a mira diadomingo mainta tabata un manifestacion cu a cuminsa na forma pacifico, pero a escala para cu e Prome Minister, cu mester tabata sa mihor, a bai busca confrontacion cu e manifestantenan. E incidente ey a shock nos comunidad y tin mi hopi preocupa.

Mas preocupa mi ta ora cu Henny Eman, den nomber di Mike Eman, a manda su hendenan bai bati hendenan di MEP riba caya. Esaki ta algo masha iresponsabel pa hasi, especialmente biniendo di un ex- prome minister di nos pais.

Sin embargo mas iresponsabel tabata e expresionnan di líder di fracción di AVP Baba Herde, cu a laga sa cu nan ta manda hende bai busca problema riba caya, pero nan no ta carga e responsabilidad. Nan kier pusha e responsabilidad riba líder di MEP. Esaki ta e acto di cobardía mas grandi cu ma scucha den mi bida.

E confrontación di diahuebs na Kurimiaw a alarmami mas aun, pasobra ta obvio cu Mike Eman no a tene su mes na palabracionnan hasi. Esey ta demostra claramente cu Mike Eman no por ta den control di tur su capacidadnan mental, pasobra si e tabata bon na tino, hamas lo ela manda 60 hende bai agredi 10 hende cu tabata manifesta na forma pacifico

Na e momentonan aki nos pais mester di lidernan cu ta atende cu e situacion aki cu cabes friew. Violencia no ta soluciona nos problemanan, violencia no ta baha nos mega debe ni e ta kita e supervisión financiero di CFT. Violencia no ta soluciona nos problemanan social tampoco. Aruba merece mihor, mucho mihor.” Palabranan di Evelyn Wever-Croes, líder di MEP.

Expresionnan haci den e articulo aki no necesariamente ta refleha opinion di ArenaPoliti.co