{idkey=630b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1283-minister-oduber-aruba-summer-music-festival-ta-percura-pa-un-promocion-incomparabel-pa-nos-isla%3FItemid%3D101][title=Minister+Oduber%3A+Aruba+Summer+Music+Festival+ta+percura+pa+un+promocion+incomparabel+pa+nos+isla][desc=E+fin+di+siman+aki+Aruba+pa+prome+biaha+tin+e+festival+di+Aruba+Summer+Music+Festival%2C+un+festival+cu+sin+duda+ta+atrae+hopi+bishitante+pa+nos+isla.+Eventonan+asina+aki+ta+percura+pa+un+promocion+hopi+grandi+pa+nos+isla.+Aruba+Summer+Music+Festival%2C+segun+Minister+Otmar+Oduber%2C+ta+net+e+evento+cu+tabata+falta+den+nos+lista+di+atraccionnan+cu+ta+forma+parti+di+e+plan+di+mercadeo+pa+nos+isla.+Den+pasado+Aruba+a+sa+di+demostra+di+ta+cana+adelanta+pa+lo+cual+ta+trata+eventonan+manera+entre+otro+Aru]}
E fin di siman aki Aruba pa prome biaha tin e festival di Aruba Summer Music Festival, un festival cu sin duda ta atrae hopi bishitante pa nos isla. Eventonan asina aki ta percura pa un promocion hopi grandi pa nos isla. Aruba Summer Music Festival, segun Minister Otmar Oduber, ta net e evento cu tabata falta den nos lista di atraccionnan cu ta forma parti di e plan di mercadeo pa nos isla.

Den pasado Aruba a sa di demostra di ta cana adelanta pa lo cual ta trata eventonan manera entre otro Aruba Jazz and Latin cu a sa di engrandece e genero di musica Jazz den e region Caribense, nos a introduci Aruba Film Festival cu a resulta di tin un balor grandi den mercadeo  y den atencion den media cu nos isla a ricibi. Tambe por menciona Aruba Fashion Week, Soul Beach Festival  y Carribean Sea Jazz Festival cu tambe ta percura pa un mercado specifico. Otro islanan a tuma e festivalnan aki como ehempel y ta organisando nan propio festivalnan. Aruba tabata falta e ingrediente special pa e mercado Latino Americano, caminda nos ta atrae e bishitantenan manera e ta tumando lugar awor aki. E mandatario ta hopi contento di mira e cantidad di bookingnan online cu tin. Ticketnan a wordo bendi entre otro na Chile, Peru, Argentina, Brazil, Colombia, Panama, Corsow, Suriname y Sint Maarten.

“Mi a bisa desde un inicio cu si ta bay organisa un evento, ban organisa e evento di un calidad halto, manera Aruba ta propaganda nos producto na e momentonan aki, y nos a logra tambe.” Minister Oduber a bisa.

Aruba Summer Music Festival ta un di e produccionan di un caracter local. Pa e evento aki a uni talentonan local, produccion ta completamente den man di localnan y ta conta cu ekiponan tecnico local. E escenario ta uno gigante cu ta surpasa cualkier evento den nos region y Minister ta sigur cu e lo bira un espectaculo grandi.

Asina a menciona artistanan manera Carlos Vives, Jerry Rivera, Nicky Jam y Pittbull, esaki a hala atencion di tur media, unda cu ya caba tin ta na Aruba pa cubri e evento mientras otronan ta yegando den e dianan nos dilanti. Te hasta e propio artistanan tambe a book pa ta na Aruba algun dia prome cu e concierto demostrando nan entusiasmo pa bishita nos isla.

Cu mayoria di nos hotlenan sold out pa e fin di siman aki y aumento di pasahero den aerolineanan cu ta yega nos isla ta demostra cu Aruba Summer Music Festival tabata e ingrediente cu tabata busca den e mix di eventonan pa Aruba. Sr. Oduber a indica y a finalisa bisando cu  “E resultado cu ta bin di e evento, no solamente di e cantidad di bishitantenan pero tambe e promocion cu ta bin su tras cu lo supera e cifra di un miyon Dollar cu oficina di turismo a stipula. Si nos mira e agencianan y periodistanan cu a aserca ATA pa ta na Aruba, mi ta hopi sigur cu Aruba Summer Music Festival ta bira un di e eventonan di mas grandi pa Aruba.”

Expresionnan haci den e articulo aki no necesariamente ta refleha opinion di ArenaPoliti.co