{idkey=1966b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1311-parlamentario-mr-xiomara-maduro-ta-di-lamenta-y-condena-cu-minister-de-meza-no-ta-dunando-informacion-riba-web%3FItemid%3D101][title=Parlamentario+mr.+Xiomara+Maduro%3A+Ta+di+lamenta+y+condena+cu+Minister+De+Meza+no+ta+dunando+informacion+riba+WEB][desc=E+asunto+di+hedging+tin+full+nos+comunidad+perhudica+cu+prijsnan+halto+pa+awa+y+coriente.+Na+unda+cu+mundo+henter+a+haya+rebaho+riba+prijsnan+di+utilidad+door+di+bahada+di+prijs+di+crudo%2C+na+Aruba+si+nos+Pueblo+no+a+conoce+e+alivio+aki.+Tin+hopi+pregunta+ta+reina+den+Pueblo%2C+pero+Gabinete+Eman+ta+den+un+silencio+total+riba+e+tema+aki.+Ta+di+lamenta+y+condena+cu+Minister+De+Meza+no+ta+dunando+informacion+riba+WEB.+Un+crimen+sin+investigacionUn+crimen+a+wordo+cometi+na+e+cartera+di+e+Pueblo+aki+cu]}
E asunto di hedging tin full nos comunidad perhudica cu prijsnan halto pa awa y coriente. Na unda cu mundo henter a haya rebaho riba prijsnan di utilidad door di bahada di prijs di crudo, na Aruba si nos Pueblo no a conoce e alivio aki. Tin hopi pregunta ta reina den Pueblo, pero Gabinete Eman ta den un silencio total riba e tema aki. Ta di lamenta y condena cu Minister De Meza no ta dunando informacion riba WEB.

Un crimen sin investigacion
Un crimen a wordo cometi na e cartera di e Pueblo aki cu e contractnan di hedging na WEB cu no a wordo haci cu e cautela necesario y cu a wordo haci djies pa complace cu e locura berde di Gabinete Eman. Te cu awor no tin un rapport di investigacion completo pa duna claridad kiko a bay robes y kendenan ta responsabel pa e crimen aki contra nos Pueblo. Ya ta dos siman cu a manda e director di WEB cas, pero ningun hende sa kiko ta e motibo real di su retiro. Locual ta stranio tambe ta cu e otro complicenan den e acto criminal aki di hedging, si a keda den nan pocicion manera nada no a pasa. Dicon ta e director so mester a bay cas? Pakiko no kier investiga e rol di e Hedging Team, di Hunta di Supervicion, di Utilities y di e Ministernan De Meza y Eman den e crimen di hedging aki?

WEB den rood ehecutando proyecto
Mientrastanto WEB ta den rood, pero keto bay proyectonan ta wordo ehecuta y no tin claridad con esaki nan ta wordo paga y si esaki lo significa cu prijs di awa y coriente lo bolbe subi. Na mei 2015, Minister De Meza a indica cu ta trata aki di e proyecton di B2P cual ta e proyecto di Ecogas y e Mobile SWRO cual ta un planta di awa situa den WEB cu ta produci awa pa bende cu WEB. Remarcabel ta cu na cuminsamento di juni 2015, Minister Eman a firma un MOU cu Banco Mundial cu ta concerni energia renobabel y e pregunta ta si ta placa Gabinete Eman a bay fia na Banco Mundial pa por paga pa e proyectonan cu WEB mester ehecuta pa complace e vision di Mike Eman. Pasobra di unda otro WEB ta haya placa pa paga pa e proyectonan aki?

Hopi pregunta, ningun contesta
Tin hopi pregunta riba kiko ta pasando na WEB. Minister De Meza di Utilidad mes no ta dunando ningun informacion. Ultimo biaha cu ela bin duna cuenta na Parlamento tabata di 5 di mei 2015 y asina mes di baina por a contesta pregunta. Segun e mandatario tin un investigacion andando pa saca afor kiko a pasa den e asunto di hedging na WEB. Pero ya dos luna ta bay pasa y Minister De Meza no ta dunando ningun informacion riba WEB y esaki ta di lamenta y condena. Nos di Fraccion di MEP a manda pidi un reunion publico cu e mandatario pa e bin splica Pueblo di e retiro di e director di WEB y tambe riba e situacion cu WEB ta aden, pero lamentablemente Presidente di Parlamento NO kier yama e reunion aki.

26 juni 2015

Expresionnan haci den e articulo aki no necesariamente ta refleha opinion di ArenaPoliti.co