{idkey=3774b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1313-rene-herde-avp-si-mep-no-kier-bin-traha-no-ta-nifica-cu-parlamento-no-por-reuni-y-tuma-desicion%3FItemid%3D101][title=Rene+Herd%C3%A9+%28AVP%29%3A+Si+MEP+no+kier+bin+traha+no+ta+nifica+cu+Parlamento+no+por+reuni+y+tuma+desicion][desc=MEP+ta+sigui+protesta%2C+pero+nan+no+ta+bisa+cu+ta+nan+mes+no+a+bay+traha%21+Parlamento+ta+reuni+y+traha+tur+dia.+Pa+facilita+tur+21+miembro+di+parlamento+den+nan+trabou+den+edificio+di+Parlamento%2C+cada+uno+di+nan+tin+un+oficina+completamente+ekipa.+Pa+algun+a%C3%B1a+caba+cada+fraccion+tin+un+asistente+di+fraccion.+Un+persona+cu+ta+wordo+paga+for+di+presupuesto+di+Parlamento+pa+yuda+e+fraccionnan+den+nan+trabou.+Tur+documento+y+tur+notificacion+di+reunionnan+ta+wordo+manda+pa+cada+miembro+di+Parlamento]}
MEP ta sigui protesta, pero nan no ta bisa cu ta nan mes no a bay traha!

Parlamento ta reuni y traha tur dia. Pa facilita tur 21 miembro di parlamento den nan trabou den edificio di Parlamento, cada uno di nan tin un oficina completamente ekipa. Pa algun aña caba cada fraccion tin un asistente di fraccion. Un persona cu ta wordo paga for di presupuesto di Parlamento pa yuda e fraccionnan den nan trabou. Tur documento y tur notificacion di reunionnan ta wordo manda pa cada miembro di Parlamento riba su computer y telefon. Kier men cu e miembronan di Parlamento cu mester ta traha 24 ora y 7 dia pa siman, no tin niun motibo pa no atende reunionnan di Parlamento. Asina mes e ausencia di specialmente e miembronan di MEP ta halto. Hopi biaha a publica esaki den prensa. Cada biaha e reaccion di pueblo ta cu mester tin sancion pa ausencia di miembronan di Parlamento.

Diabierna mainta un reunion di Comision Central cu a wordo palabra un dia prome, a wordo yama pa trata e relato di Parlamento riba e ley pa baha e prima di AZV cu tur trahado tin cu paga y hisa e BAZV pa sigura cu tur hende - tambe turistanan - ta contribui pa cubri e costonan medico di tur hende na Aruba. E reunion a wordo yama pa 1'or di diabierna merdia. E notificacion a sali 11'or di mainta. Tres ora adelanta. Asina mes ta miembronan di e fraccion di AVP so tabata presente. No tabata necesario pa tur miembro ta presente pa e reunion aki. Pero e biaha aki atrobe niun miembro di e fraccion di MEP tabata presente. No tabata prome biaha!

E reunion di Comision Central a wordo teni segun reglamento di ordo di Parlamento y a tuma desicionnan riba e procedura pa e leynan pendiente pa tratamento sigui cana nan caminda. Pa loke ta e ley pa introduci zonanan den cua lo pone machin pa registra paramento di auto (= parkeermeters) e reunion a dicidi pa no manda pregunta por escrito, pero pa laga esaki pa ora di trata e ley den e reunion publico.

Awor e fraccion di MEP ta protesta cu no a duna nan oportunidad pa haci pregunta y nan kier bay protesta internacionalmente contra di e forma cu segun nan parlamento ta funciona. E realidad ta cu Parlamento mester sigui funciona hasta ora un of mas miembro no tey. Si un miembro a wordo notifica di un reunion na tempo pero scohe pa no asisti na e reunion, e no por bisa cu Parlamento a tuma desicion incorecto djis pasobra e no tabata presente. Esaki a bira e caso, vez tras bez, di e fraccion di MEP. Constantemente nan ta ausente. Tanto den reunionnan di comisionnan como di reunionnan publico. Pero despues nan ta critica cu nan no a haya chens pa haci pregunta of duna nan punto di bista. Esey ta loke a sosode awe atrobe. Pero nan por ta trankilo, pasobra niun miembro di parlamento a perde niun oportunidad pa haci pregunta. Durante di tratamento di e ley den reunion publico cada miembro tin e mes un cantidad di tempo pa haci pregunta y duna su opinion. Esey lo sosode den e caso aki tambe. Ta lamentabel si cu e miembronan di e fraccion di MEP kier sigui tapa nan falta di presencia na trabou door di tira culpa riba otro y hasta acusa miembronan di AVP di ta actua incorecto. Esaki ta otro muestra di e inmadurez y insinceridad di MEP.

Expresionnan haci den e articulo aki no necesariamente ta refleha opinion di ArenaPoliti.co