{idkey=7903b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F148-minister-bermudez-den-2015-aruba-lo-conoce-un-moneda-nobo%3FItemid%3D101][title=Minister+Bermudez%3A+%E2%80%9CDen+2015+Aruba+lo+conoce+un+moneda+nobo%E2%80%9D][desc=Siman+pasa+diaranson+den+Staten+a+wordo+trata+un+cambio+den+e+ley+cu+ta+regla+nos+monedanan.+E+cambio+aki+segun+Minister+Bermudez+a+informa+ta+encera+e+dos+monedanan+esta+di+5+florin+y+esun+di+2%2C50+florin%2C+caminda+e+cara+di+la+reina+lo+wordo+reemplasa+cu+esun+di+rey+Willem+Alexander+cu+desde+2013+a+bira+e+rey+di+nos+reino.+Den+e+cuadro+aki+e+cambio+a+wordo+proponi+y+consecuentemente+parlamento+a+bay+di+acuerdo+di+forma+unanime+cu+e+cambio+aki.+E+mandatario+di+finanzas+ta+enfatisa+cu+esaki+no+]}

Siman pasa diaranson den Staten a wordo trata un cambio den e ley cu ta regla nos monedanan. E cambio aki segun Minister Bermudez a informa ta encera e dos monedanan esta di 5 florin y esun di 2,50 florin, caminda e cara di la reina lo wordo reemplasa cu esun di rey Willem Alexander cu desde 2013 a bira e rey di nos reino. Den e cuadro aki e cambio a wordo proponi y consecuentemente parlamento a bay di acuerdo di forma unanime cu e cambio aki.

E mandatario di finanzas ta enfatisa cu esaki no ta encera cu lo bay saca e monedanan existente cu e cara di la Reina for di circulacion, pues nan lo permanece den circulacion te proximo aviso sin embargo Gobierno no ta mira cu esaki lo tuma luga pues tanto e monedanan bieu como esunnan nobo lo keda den circulacion.

Pa loke ta trata cambio di moneda, den pasado Aruba a enfrenta varios caso di falsificacion principalmente pa cu e moneda cuadra di cinco florin sin embargo Minister Bermudez ta indica cu esaki tambe a wordo tuma na cuenta pa cu e moneda nobo, “en berdad den cuminsamento di e siglo aki tabata tin falsificacion di e moneda cuadra cu despues  na 2006 a wordo cambia formalmente pa e moneda rondo cu nos tin awendia, p’esey mes den e moneda nobo aki tin cierto efectonan microscopico cu a wordo  agrega riba e moneda pa evita su falsificacion” e mandatario a splica.

Di mesun forma Minister Bermudez a tuma su tempo pa informa tocante e situacion actual tocante nos divisanan unda cu e ta sigura cu esaki ta stabiel. “Despues cu Valero a cera, nos reservenan a baha paso Valero tabata zorg pa un prosaldo aproxima di un fluho di 300 miyon na divisa extra. Esey no t’ey mas desde 2009 pero keto bay nos ta riba un nivel di 1.2 biyon cual ta mas of menos 200 miyon florin riba en norma cu ta wordo manteni pa institutonan internacional pa loke ta trata reserve di divisas” Minister a informa.

E mandatario di finanzas no ta mira ningun disputa of discusion tocante e divisanan pues nos reservanan ta suficiente pa cubri un importacion pa mas cu 8 luna, por lo tanto Minister Bermudez ta sigur y tin e confianza cu Banco Central sa di maneha nos divisanan di tal manera cu e balor di nos floring ta permanece seya.

Mientras tanto e monedanan nobo aki lo wordo traha den e proximo lunanan na Hulanda y segun e produccion di e monedanan aki, e mandatario ta calcula cu pa cuminsamento di otro aña nan lo ta disponibel pa circulacion sin embargo Minister Bermudez ta indica cu Banco Central lo anuncia ora cu e proceso ta asina leu.

FIN

Expresionnan haci den e articulo aki no necesariamente ta refleha opinion di ArenaPoliti.co