{idkey=3366b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1569-gabinete-me-ii-conexion-entre-pueblo-y-minister-president-mike-eman-ta-mes-fuerte-cu-semper%3FItemid%3D101][title=Gabinete+ME+II%3A+Conexion+entre+pueblo+y+Minister+President+Mike+Eman+ta+mes+fuerte+cu+semper][desc=ORANJESTAD+%E2%80%93+E+mas+reciente+edicion+di+Accion+di+Bario+na+Madiki+a+demostra+cu+e+programa+tin+su+derecho+di+existencia+y+no+ta+tempo+perdi%2C+manera+cu+contrincantenan+politico+ta+pensa.+Pueblo+ta+contento+di+tin+un+Prome+Minister+cu+ta+cana+den+tur+e+cayanan+di+su+pais+a%C3%B1a+aden+y+a%C3%B1a+afo%2C+y+no+solamente+ora+di+campa%C3%B1a.+Bisi%C3%B1anan+ta+habri+porta+di+nan+cas+y+nan+brasa+pa+ricibi+e+mandatario.%E2%80%9CCu+hopi+placer+amor+y+cari%C3%B1o%2C+semper+e+ta+bon+bini+na+mi+cas%2C%E2%80%9D+asina+Sra.+Christina+Harrigan+a+bi]}
ORANJESTAD – E mas reciente edicion di Accion di Bario na Madiki a demostra cu e programa tin su derecho di existencia y no ta tempo perdi, manera cu contrincantenan politico ta pensa. Pueblo ta contento di tin un Prome Minister cu ta cana den tur e cayanan di su pais aña aden y aña afo, y no solamente ora di campaña. Bisiñanan ta habri porta di nan cas y nan brasa pa ricibi e mandatario.

“Cu hopi placer amor y cariño, semper e ta bon bini na mi cas,” asina Sra. Christina Harrigan a bisa diahuebs mainta. El a combersa cu Premier Mike Eman, kende a splik’e cu e ta den e bario hunto cu Bus di Salud caminda e por check su presion, etc. gratis. Di su banda, Sra. Harrigan a expresa su satisfaccion pa cu tur loke Gabinete Mike Eman ta haciendo pa Aruba. “Mi no por keha, e luga ta birando bunita mas y mas.”

Tambe e mandatario ta compaña pa trahadonan di Serlimar y GKMB haciendo accion di limpieza y control pa muskita. Ta e detayenan aki tin e hendenan di Madiki y hopi otro bario contento; barionan antes tabata sinti nan mes ignora dor di Gobernantenan. Sra. Harrigan ta duna un ehempel: “Ora otronan cu tabata sinta, mi a pidi nan drecha e caya pa mi paso awa ta core, auto ta pasa susha pero ningun a haci esey.

Pesey frecuentemente Minister President ta wordo ricibi na un cas cu bendicionan, manera tabata e caso cu e habitante aki di Madiki kende a expresa cu “e ta haciendo un bon trabou y Dios tin pa bendicione ricamente pa e sigui dilanti den su trabou.”

E tempo, amor y dedicacion cu Minister President ta dedica na e maneho di e pais, mescos cu na e contacto individual cu e pueblo, ta loke ta hacie e lider grandi cu e ta y asina stima. Amareto Bermudez ta ripara esey. Despues di a topa cu e mandatario, el a expresa cu e “ta haya hopi great cu e ta pasa den e barionan pa e wak kico ta pasando cu nos hendenan na Aruba. Semper bon bini akinan.”

E topiconan di combersacion ta varia enormemente di cas pa cas. Na un nan tin deseo di wak miho infrastructura, esta luz y caminda; mientras cu na otro nan mester falta di informacion pa procesa algun peticion of tramite ta di tereno, pension, etc. Aki e mandatario ta splica y guia nan den e proceso of ta asigna caso na un persona di su Ministerio pa duna nan conseho.

Den e caso di Sr. Bermudes, nan a combersa riba e agenda Green di Gabinete Mike Eman I y II. Esaki ta algo cu e ciudadano ta completamente de acuerdo cune. Su mes, ya a instala panelnan solar riba su cas. El a papia cu Premier Eman riba ideanan di con pa haci e sistema aki mas accesible na un y tur. “Mi ta kere cu nos tur mester bay den e direccion ey,” el a bisa añadiendo cu “e ta bayendo den bon caminda.”

Prome Minister Mike Eman a disfruta hopi di su recorido na Madiki, un luga semper special den su curazon y den e historia di su famia. E trabounan di embeyecemento den e bario aki lo continua pronto, mescos cu na otro districtonan di Aruba. E programa di Accion di Bario ta continua pasobra e pueblo ta pidi p’e y Premier Eman t’aki pa complace e pueblo di Aruba.

Expresionnan haci den e articulo aki no necesariamente ta refleha opinion di ArenaPoliti.co