{idkey=2380b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1685-parlamentario-mr-xiomara-maduro-tur-hende-ta-keto-riba-e-mal-gobernacion-cual-ta-e-motibo-cu-awe-tin-supervicion%3FItemid%3D101][title=Parlamentario+mr.+Xiomara+Maduro%3A+Tur+hende+ta+keto+riba+e+mal+gobernacion+cual+ta+e+motibo+cu+awe+tin+supervicion][desc=Nos+a+tuma+nota+di+un+cantidad+di+exprecionnan+den+prensa+cu+ta+condena+e+manifestacion+cu+tabata+tin+dia+27+di+augustus+2015+dilanti+di+Parlamento+di+Aruba.+Tur+ta+papia+di+e+danio+haci+na+nos+turismo+y+e+glasnan+kibra+di+Parlamento.+Pero+ningun+di+esnan+cu+a+duna+nan+opinion+a+sa+di+sali+sikiera+cuestiona+dicon+a+bin+un+escalacion+na+nos+Pais.+Tur+hende+a+keda+keto+riba+e+mal+gobernacion+cu+ta+e+motibo+cu+awe+tin+supervicion+financiero+di+CFT+na+nos+Pais.+Esey+ta+un+lastima+ya+cu+a+keda+concen]}
Nos a tuma nota di un cantidad di exprecionnan den prensa cu ta condena e manifestacion cu tabata tin dia 27 di augustus 2015 dilanti di Parlamento di Aruba. Tur ta papia di e danio haci na nos turismo y e glasnan kibra di Parlamento. Pero ningun di esnan cu a duna nan opinion a sa di sali sikiera cuestiona dicon a bin un escalacion na nos Pais. Tur hende a keda keto riba e mal gobernacion cu ta e motibo cu awe tin supervicion financiero di CFT na nos Pais. Esey ta un lastima ya cu a keda concentra riba glas kibra enves di condena con Gabinete Eman a haci deshaci y con Parlamento di Aruba a faya drasticamente den su trabou di control.

Gabinete Eman a haci deshaci
E motibo cu awe tin supervicion financiero di CFT ta debi na e mal gobernacion cu Gabinete Eman a hiba desde cu nan a sinta. Tur rapport a mustra cu e direccion cu e gobierno aki ta bay lo trece nos Pais den problema. Gabinete Eman a haci deshaci te na e extremo cu Hulanda mester a interveni manera Statuut ta prescirbi. Ta e mal gobernacion aki mester wordo cuestiona. Tambe mester condena con por ta posibel cu ainda Minister Eman ta na mando apesar di a haci tanto danio na nos Pais su finanzas publico. Pasobra ora bo redobla e debe di bo Pais den un tempo record di 4 aña, bo ta hinca bo Pais y su economia den problema serio. E autonomia cu nos Status Aparte ta brinda nos ta un instrumento financiero economico di nos Pais y una ves cu bo ta torno na bo Status Aparte y ta entrega bo autonomia bo ta mishi cu bo economia. Pesey ta hopi stranio cu nos no a scucha esnan di gremio cuestiona y condena e mal gobernacion di Gabinete Eman cu ta trece nos economia den problema serio y nos Pais bou supervicion financiero.


Parlamento faya den controla
Un otro motibo pakiko awe nos Pais ta conoce supervicion financiero di CFT ta debi cu Parlamento di Aruba a faya drasticamente den su trabou pa controla Gabinete Eman. E mayoria di AVP a vota pro pa tur e presupuestonan di Gabinete Eman sin worry cu e hecho cu debenan grandi a wordo haci siendo cu entrada di gobierno tabata keda atras. Nos Pais a bay den un desbalansa grandi y e mayoria enves di a para e gobierno a bira duna nan carta blanco pa haci deshaci cu fondo publico. Ta pa falta di e control di Parlamento awe nos ta haya supervicion financiero. Pesey ta incomprendibel cu gremio ta vocifera nan preocupacion pa e manifestacion y ta keda sin cuestiona y condena e falta di control aki di Parlamento.


A condena sin investiga
E ta remarcabel cu a condena e manifestacion, sin cu a bin un investigacion kiko a conduci na e escalacion. Pasobra kende por sigura nos cu no ta Minister Eman mes a manda su hendenan pa kibra bentana, pa bolter lessenaar, pa tira sushi abou y pa tira botter for di paden riba manifestante pafor? No tin ningun investigacion, ni rapport di polis pa sigura nos esey. Pero asina mes tin gremio cu a sali condena e manifestacion a base di locual media cumpra pa Minister Eman a sali publica. Esaki ta un lastima. E enfasis no mester ta riba glas kibra, pero riba e mal gobernacion cu a trece nos Aruba bou supervicion financiero y cu a provoca e escalacion na nos Pais.

1 september 2015

Expresionnan haci den e articulo aki no necesariamente ta refleha opinion di ArenaPoliti.co