{idkey=7759b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1930-sr-nelson-oduber-durante-congreso-2015-di-mep-si-den-un-pais-bo-vota-pa-ken-cu-ta-kico-cu-ta-cos-ta-bay-con-cu-ta-parti-1%3FItemid%3D101][title=Sr.+Nelson+Oduber+durante+Congreso+2015+di+MEP%3A+%E2%80%9CSi+den+un+pais+bo+vota+pa+ken+cu+ta%2C+kico+cu+ta%2C+cos+ta+bay+con+cu+ta%E2%80%9D++%28parti+1%29][desc=Un+di+e+oradornan+principal+durante+Congreso+2015+di+MEP+tabata+nos+lider+honorario+sr.+Nelson+Oduber%2C+kende+den+un+forma+elocuente+a+tene+su+discurso+cu+a+capta+atencion+total+di+e+publico+presente.+Primeramente+sr.+Oduber+a+relata+e+periodo+desde+fundacion+di+MEP%2C+caminda+nos+partido+a+conoce+tres+lider%2C+esta+sr.+Betico+Croes+%281971-1986%29%2C+su+persona+sr.+Nelson+Oduber+durante+e+periodo+di+1986-2011+y+sra.+Evelyn+Wever-Croes+for+di+2011+te+cu+awor.+Nel+a+enfatisa+riba+e+hecho+cu+MEP+ta+un+partid]}
Un di e oradornan principal durante Congreso 2015 di MEP tabata nos lider honorario sr. Nelson Oduber, kende den un forma elocuente a tene su discurso cu a capta atencion total di e publico presente.
Primeramente sr. Oduber a relata e periodo desde fundacion di MEP, caminda nos partido a conoce tres lider, esta sr. Betico Croes (1971-1986), su persona sr. Nelson Oduber durante e periodo di 1986-2011 y sra. Evelyn Wever-Croes for di 2011 te cu awor. Nel a enfatisa riba e hecho cu MEP ta un partido social democrata, caminda e ser humano ta central, no placa ni material. MEP ta un partido di pueblo, cu pueblo y pa pueblo. Tin partido politico na Aruba cu ta purba goberna, train goberna, pero ora MEP ta den gobierno, ta goberna nos ta goberna.
Tambe Nel a trece padilanti cu e militancia di MEP ta hopi critico, cu MEP no ta un partido di hendenan suave y trankil, pero un partido di voz, un partido cu structura di participacion, unda su militancia, lidernan di bario, directivanan tin un voz. Pasobra tin hopi hende tin partido politico, pero nan tin voz solamente cada 4 aña. Cu MEP esaki si no t’asina. Hecho ta cu MEP semper por a keda conta riba su nucleo, den tempo bon y den tempo dificil. MEP ni se compra, ni se vende.
MEP ta un partido cu ora e ta grandi, semper e ta haci cosnan grandi pa e pueblo aki. Un partido serio y responsabel cu nunca ta cana rond fia pa loco, crea pata pata di debe y despues pidi otro pa paga e debenan pa nan. Nunca por a tende cu Betico of Nel a yega na porta di Hulanda y yora pa placa. Alcontrario, ki ora Hulanda por a stroba nos, nan a haci esaki. MEP semper a depende riba su nucleo y e pueblo Arubano pa goberna den nan nomber.
Nel Oduber den forma enfatico a trece padilanti cu MEP mester bay bek na su nucleo y mediante e nucleo hiba e mensahe pa pueblo. Cu si nos laga silencio ta un opcion y nos keda keto, nos lugar lo no haya solamente aanwijzing, KB, CFT, pero cu Hulanda lo bay poco poco cu tur cos, esta nos finansa publico, economia etc. Hamas den pasado durante gobernacion di MEP esaki a yega di sosode.
Tambe Nel den forma cla y raspa a declara cu si den un pais bo vota pa ken cu ta, kico cu ta, cos ta bay con cu ta, referiendo asina na e politiconan mediocre di AVP.
Mas aleu Nel Oduber a elabora riba e lucha estatal cu a continua desde fundacion di MEP, e cadena di esclavitud di 12-8, e sosten cu MEP a haya di Socialista Internacional, COPPPPAL, di paisnan di Caribe y Latino America. Tambe el a papia riba tur locual nos Libertador Betico Croes y MEP a logra pa nos pueblo, manera nos himno, bandera, ortografia, propio Parlamento, Gobernador, propio ministronan y propio institutonan.
Nel a para keto riba e lema nobo di MEP, esta “Solo ta sali pa nos tur”. Aki el a bay un rato den historia caminda na 1986 a ser bisa cu “Betico dood, MEP dood”. Sinembargo despues di un campañsa intensivo caminda a cana bario pa bario, den e eleccion di 1989 MEP a gana e eleccion casi den forma absoluto. E tempo ey a campaña cu e lema victorioso di “Un Futuro Briyante pa Un y Tur”.

Expresionnan haci den e articulo aki no necesariamente ta refleha opinion di ArenaPoliti.co