{idkey=3506b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2057-ministerio-di-turismo-a-pesar-di-ciere-di-refineria-a-sigui-mira-un-crecemento-economico-dependiendo-casi-90-riba-turismo%3FItemid%3D101][title=Ministerio+di+Turismo%3A+A+pesar+di+ciere+di+refineria%2C+a+sigui+mira+un+crecemento+economico+dependiendo+casi+90%25+riba+turismo][desc=Esey+ta+e+refleho+real+di+e+situacion+di+nos+turismo%26amp%3Bnbsp%3BMinister+di+Turismo+Otmar+Oduber+comentando+riba+e+situacion+di+nos+turismo+a+presenta+varios+punto+di+interes+pa+e+pilar+economico+principal+di+nos+isla.Mirando+e+situacion+di+e+mercado+di+Venezuela+el+a+bisa+cu+mester+separa+e+grupo+di+Venezolanonan+cu+ta+bin+nos+isla+y+cu+no+ta+contribui+manera+e+resto+di+turismo+na+Aruba+for+di+e+bishitantenan+Venezolano+cu+a+mantene+nos+turismo+pa+a%C3%B1anan+largo%2C+a+contribui+grandemente+cu+nos+economi]}
Esey ta e refleho real di e situacion di nos turismo 

Minister di Turismo Otmar Oduber comentando riba e situacion di nos turismo a presenta varios punto di interes pa e pilar economico principal di nos isla.
Mirando e situacion di e mercado di Venezuela el a bisa cu mester separa e grupo di Venezolanonan cu ta bin nos isla y cu no ta contribui manera e resto di turismo na Aruba for di e bishitantenan Venezolano cu a mantene nos turismo pa añanan largo, a contribui grandemente cu nos economia y cu ta sigui bin. El a bisa cu mester mira e posibilidadnan pa limita e grupo cu ta contribui na un menor forma na nos economia, pero sin cu ta afecta esnan cu pa añanan largo a contribui cu nos turismo.
Pa loke ta e mercado Mericano, cual ta nos mercado principal, Minister Oduber a bisa cu esaki a aumenta cu casi 10% den e ultimo 9 lunanan di 2015. E crecemento aki ta un refleho di e desaroyo di nos turismo, contrario na loke oposicion ta purba presenta.
Oposicion a expresa cu AHATA a bisa cu grado di ocupacion a cay y cu esey ta muestra cu turismo na Aruba ta bay malo y cu Venezolanonan ta dañand’e. “Mi ta kere cu esey ta un percepcion totalmente robes di e situacion cu tin”.
E mandatario ta bisa cu en berdad mester pone atencion riba e fenomeno di e Venezolano cu ta bin Aruba pa raspa carchi of ta purba saca Dollar pa hiba bek su pais y tambe esunnan cu ta keda atras pa purba haya un trabou. Pero e situacion aki no por wordo mira den e contexto como si fuera cu nos turismo ta wordo strategicamente maneha pa atrae e turista ey.
Cifranan ta demostra hustamente lo contrario. A pesar di e ciere di e refineria algun aña atras, a sigui mira un crecemento economico cu un dependencia di practicamente 90% riba nos turismo y esey ta e mihor refelho cu tin di e situacion di nos turismo.
Cantidad di bishitante a crece cu mas di 31% for di 2009 te cu 2014, e tourism receipt (placa cu turistanan ta laga atras) a aumenta den e mesun periodo aki cu 31.7%. RevPar (entrada pa camber disponibel) entre 2009 pa 2014 a subi di for di 127 Dollar te na 190 Dollar cu ta representa un incremento di 50% den 5 aña di tempo. Mescos por bisa di e ADR (prijs averahe pa camber) cu a aumenta cu 32% den e mesun periodo di 5 aña, for di 176 Dollar na 2009 te na 233 Dollar na 2014.
“Oposicion mester haci su trabou di critica na momento cu e ta sinti cu mester critica, pero mi ta kere nos mester keda serio den nos rol cu nos tin como gobernante y como parlamentario cu tin cu controla”, Minister Otmar Oduber a indica.

Expresionnan haci den e articulo aki no necesariamente ta refleha opinion di ArenaPoliti.co