{idkey=5934b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2083-gerick-croes-mep-minister-di-labor-lo-crea-e-scenario-ideal-pa-casonan-di-bullying-aumenta-cu-eliminacion-di-articulo-1613x%3FItemid%3D101][title=Gerick+Croes+%28MEP%29%3A+Minister+di+labor+lo+crea+e+scenario+ideal+pa+casonan+di+%26quot%3Bbullying%26quot%3B+aumenta+cu+eliminacion+di+articulo+1613x%21][desc=Ta+hopi+ironico+pa+mira+un+Minister+di+asuntonan+sociaal%2C+labor+y+hubentud+crea+e+impreshon+bou+nos+comunidad+cu+e+ta+contra+bullying+siendo+cu+su+intencionan+cu+eliminacion+di+articulo+1613x+ta+demostrando+lo+contrario.+E+anuncio+cu+e+Minister+a+hasi+relaciona+cu+cambionan+den+ley+laboral+na+caminda+ta+netamente+demostra+cu+e+ta+abusando+di+su+poder+como+mandatario+y+asina+lo+por+converti+su+mes+den+un+bully.+Si%2C+esaki+por+sona+hopi+directo+pero+eliminacion+di+articulo+1613x+ta+netamente+habri+]}
Ta hopi ironico pa mira un Minister di asuntonan sociaal, labor y hubentud crea e impreshon bou nos comunidad cu e ta contra bullying siendo cu su intencionan cu eliminacion di articulo 1613x ta demostrando lo contrario. E anuncio cu e Minister a hasi relaciona cu cambionan den ley laboral na caminda ta netamente demostra cu e ta abusando di su poder como mandatario y asina lo por converti su mes den un bully. Si, esaki por sona hopi directo pero eliminacion di articulo 1613x ta netamente habri e porta hancho pa trahadornan por wordo abusa di tur forma na antoho di e dunador di trabou.

Cu kier trata na busca un balansa entre gremio y sindicatonan pa por logra trece cambionan den e leynan laboral ta comprendibel PERO bou ningun circumstancia esaki no mester nifica cu e proteccion laboral pa e trahadornan lo mester wordo kita!! Kiko a pasa cu "e ser humano mester ta central"? Na Aruba diariamente trahadornan ta wordo abusa y varios caso ta bai den "doofpot" pasobra ta ignoranan. Den e dianan aki a sosode un caso hopi lamentabel caminda un persona na forma inhusto a wordo kita siendo cu e ta pasando den tempo dificil. Imaginabo e trahador a wordo retira for di trabou pasobra e ta sufri di un enfermedad. Otro casonan conoci como ehempel ta e abuso cu a tuma lugar na un supermercado unda cu un video a bai viral riba media sociaal. Preguntanan ta: How low can you go? Unda abo como Minister di labor a keda? Kiko bo a hasi of cual plan bo a bin cune pa frena abusonan di e magnitud aki? Nada no a sosode te cu awor y pa colmo awor cubo intencion e lo hasi'e pero. Esaki ta hasibo complice tambe di abuso di no kier brinda un maneho pa mehoracion caminda cu e trahador como ser humano y su derechonan por wordo respeta.

Awor imaginabo cubo ta den situacion financiero precario y cu bo mester garantisa e pan di tur dia pabo jiunan. Cu e cambio aki Minister Paul Croes ta hasi'e super facil pa e dunador di trabou por menasa , maltrata y abusa e trahador emocionalmente pasobra e sa cu no tin otro caminda pa bai y probablemente si e haya un otro trabou mes ta pa un periodo cortico sin garantia. Dus e incertidumbre lo continua te dia e por bira vast. Esaki por resulta cu un biaha mas e lo tin cu soporta tur clase di abuso na pia di trabou pasobra keda cas sin placa pa alimenta su famia NO ta un opcion.

Den casonan di "bullying" un bully no ta solamente esun cu ta abusa pero tambe e bystander cu ta wak of permiti esaki. Den e caso specifico aki Minister di labor malusando su posicion lo bai habri porta na un forma directo y indirecto pa bullying na pia di trabou tuma lugar cu mas frecuencia y asina conberti su mes den un bully tambe! Loke mas ta di lamenta ta e hecho cu no ta bai tin UN solo victima sino un pueblo completo pasobra tur hende den nos comunidad sea ta un persona cu bijstand, un 50 plusser of un recien graduado lo por wordo abusa pa via cu lo kier elimina e articulo 1613x.

Den un discurso cu Minister Croes a duna e la enfatisa cu "E gravedad di bullying mester bira conoci. E daño permanente cu bo ta causa na un mucha y hoben y tambe adultonan ta grave. E daño aki por ta fisico, mental, psicologico, emocional y social". Awor sea bo ta "naïef" of bo ta play cu bo no sa. Ta obvio cu e intencion di elimina articulo 1613x su accion ta demostra lo contrario pasobra e ta crea e scenario perfecto pa un dunador di trabou por abusa. Enbes di pensa con di berdad lo crea oportunidadnan y riba un "win-win situation" cu lo por ta beneficioso pa nos pais su productividad a opta pa abusa di su autoridad y duna doñonan di trabou "carte blanche" (e poder pa hasi y deshasi cu empleadonan). Realidad ta cu nos leynan laboral mester wordo optimalisa pero no mester lubida cu tur e tempo asina mes a keda trapa trahadornan. Esaki hustamente nifica cu nos mester bira mas creativo cu solucionan pa asina incentiva sector priva pa asina por tuma hende na trabou mas facil. Por a pensa riba adaptacion di e ley door di agrega algun inciso pero no pa elimine. Ta hopi lamentabel cu hustamente Minister di labor ta esun cu na un forma directo of indirecto lo crea e atmosfera ideal pa bullying na pia di trabou tuma lugar. Basa riba e hecho cu e mandatario tin intencion di bai kita e proteccion aki di e futuro trahador y circumstancianan di abuso cu por presenta como consecuencia e Minister por wordo considera como un bully!

Expresionnan haci den e articulo aki no necesariamente ta refleha opinion di ArenaPoliti.co