{idkey=1236b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2191-gabinete-me-ii-gobierno-a-reuni-cu-grupo-di-trabou-relaciona-cu-segmento-di-turista-cu-maleta-riba-caya%3FItemid%3D101][title=Gabinete+ME+II%3A+Gobierno+a+reuni+cu+grupo+di+trabou+relaciona+cu+segmento+di+turista+cu+maleta+riba+caya][desc=ORANJESTAD+%E2%80%93+Gobierno+di+Aruba+ta+atendiendo+e+fenomeno+di+turistanan+Venezolano+cu+ta+cana+cu+maleta+riba+caya+cu+tur+cautela+necesario.+Ta+trahando+riba+sugerencianan+pa+yega+na+e+miho+solucion+posibel.+Esaki+ta+loke+Prome+Minister+Mike+Eman+a+bisa+na+final+di+un+encuentro+cu+Conseho+di+Minister+tabatin+cu+un+grupo+di+trabou+consistiendo+di+ATA%2C+DIMAS%2C+Departamento+di+Labor%2C+Warda+Nos+Costa%2C+Polis%2C+y+Inmigracion.+E+Grupo+di+Trabou+a+wordo+institui+dia+prome+di+juli+ultimo+y+a+haya+e+tarea+pa]}
ORANJESTAD – Gobierno di Aruba ta atendiendo e fenomeno di turistanan Venezolano cu ta cana cu maleta riba caya cu tur cautela necesario. Ta trahando riba sugerencianan pa yega na e miho solucion posibel. Esaki ta loke Prome Minister Mike Eman a bisa na final di un encuentro cu Conseho di Minister tabatin cu un grupo di trabou consistiendo di ATA, DIMAS, Departamento di Labor, Warda Nos Costa, Polis, y Inmigracion.

E Grupo di Trabou a wordo institui dia prome di juli ultimo y a haya e tarea pa acumula cifranan di nan departamento relaciona cu e movecion di e grupo di turista en cuestion na Aruba y haci un analisis di esaki pa despues yega na posibel solucionnan pa e problema cu e grupo ta causa na Aruba. “E analisisnan aki mester duna nos e indicacionnan corecto di e diferente pasonan cu nos a bin ta tumando pa e aumento di cierto inmigracion pa Aruba.”

Eman a splica cu tur hende ta consciente di e trend di ultimo tempo, esta di gruponan di turista cu por wordo mira riba caya y den barionan. “Nos ta haya importante pa e departamentonan envolvi sinta hunto y haci un analisis di e cifranan y sa kico ta e pronosticonan pa e periodo nos dilanti. A base di esey Gobierno ta implementando varios paso mas pa sigura cu e leynan di admision di Aruba ta wordo respeta y ehecuta, cu por garantisa paz y trankilidad. Pero tambe cu e industria turistico di Aruba por sigui opera, apesar di e fenomeno aki y sigui opera cu nos hospitalidad di semper, pero cu reglanan hopi cla y estricto riba leynan di admision y estadia den e pais. Esaki ta un esfuerso cu nos ta haci den un contexto nacional pa yuda tur hende cana e caminda aki di e forma mas corecto, eficiente y sin lubida cu semper a ricibi inmigrante cu ta sigui reglanan di e pais den forma hospitalario.”

Prome Minister Eman a bisa cu ta masha importante pa haci un bon trabou na entrada di e pais caba y tur hende por ta orguyoso cu Aruba ta un di e poco paisnan den Caribe cu tin e sistema di Radex cu ta procesa e informacion automaticamente, dunando indicacion unda tur hende cu drenta Aruba ta kedando.

Pa mehora e situacion, Prome Minister Eman a splica, ta pone e rekisito cu prome cu e bishitantenan aki yega, ya caba nan mester haci cierto registracion cu ta un forma di control mas miho riba e fluho di hendenan cu ta yega Aruba. “Nos ta keda cu e realidad di desaroyonan internacional y cerca di Aruba, cu ta haci semper cu e reto pa Aruba semper ta grandi.”

Na final e mandatario a haci un apelacion na comunidad pa tene cuenta cu leynan di admision, estadia y labor. Si tur hende duna un man, pa yuda e isla ta uno sigur, pa no facilita cierto desaroyo cu ta  violacion di ley, e ora tur hende por ta sigur cu tin mas siguridad pa un y tur. Si contene e situacion te na unda e ta aworaki, Eman ta kere cu por finalisa e situacion den forma positivo, sin polarisacion y antagonismo contra cualkier nacionalidad.

Expresionnan haci den e articulo aki no necesariamente ta refleha opinion di ArenaPoliti.co