{idkey=7987b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2245-evelyn-wever-croes-mep-gremionan-no-ta-contento-con-gobierno-ta-introdusi-cambio-di-ley-di-belasting-den-parlamento-diaranson%3FItemid%3D101][title=Evelyn+Wever-Croes+%28MEP%29%3A+Gremionan+no+ta+contento+con+Gobierno+ta+introdusi+cambio+di+ley+di+belasting+den+Parlamento+diaranson][desc=ORANJESTAD+--+Parlamento+dialuna+ultimo+a+reuni+cu+gremionan+ATIA%2C+Camara+di+Comercio+y+Ahata.+E+Asociacion+di+Conseheronan+Fiscal+tambe+tabata+invita%2C+pero+no+a+asisti.+E+tema+tabata+e+reunion+publico+den+Parlamento+diaranson+awor%2C+cu+tin+riba+agenda+cambio+di+ley+di+belasting.Por+cierto%2C+mester+cuminsa+cu+remarca+cu+ta+danki+na+e+presion+di+oposicion%2C+MEP+y+PDR%2C+cu+e+reunion+aki+a+wordo+yama%2C+pasobra+e+mayoria+den+Parlamento+tabata+kier+a+aproba+e+ley+siman+pasa+caba.Sinembargo+durante+e+reuni]}
ORANJESTAD -- Parlamento dialuna ultimo a reuni cu gremionan ATIA, Camara di Comercio y Ahata. E Asociacion di Conseheronan Fiscal tambe tabata invita, pero no a asisti. E tema tabata e reunion publico den Parlamento diaranson awor, cu tin riba agenda cambio di ley di belasting.
Por cierto, mester cuminsa cu remarca cu ta danki na e presion di oposicion, MEP y PDR, cu e reunion aki a wordo yama, pasobra e mayoria den Parlamento tabata kier a aproba e ley siman pasa caba.
Sinembargo durante e reunion tanto Atia, Ahata y Camara di Comercio a trese puntonan hopi valido dilanti cu mester tene cuenta cune ainda den e ley.
Atia ya un tempo pasa a manda nan observacionnan y sugerencianan pa minister di finansas, pero e minister no a duna ningun reaccion.
Camara di Comercio a añadi cu nan a wordo envolvi mucho laat, y e ora bo no por prepara bon pa cambionan asina. 
Ahata a finalisa bisando cu ya 3 anja pasa Ahata a yega na palabracionnan cu gobierno den Dialogo Social, y cu ta lamenta cu te awor numa ta pone esakinan den ley, y ademas, ta desvia di e palabracionnan ey tambe riba puntonan crucial.
Nan tabata hopi agradesido cu Parlamento si a trata di envolvi nan.

CAMBIO DI TARIFA DI WINSTBELASTING Y VAS
Ta trata di cambio di tarifa di belasting riba ganashi di compania, cu ta bai baha di 28% pa 25%. 
Tambe e incentivonan pa hotelnan ta wordo amplia.
Un cambio cu tin efectonan serio ta e cambio den pago di winstbelasting, cu e ley aki ta stipula, ta pone cu tur compania mester paga mesora, den e ley di VAS. Si antes un compania mester a warda te ora e ricibi e cobransa pa e paga, despues di e cambio di ley e compania mester paga mesora cu e entrega su formulario di declaracion di ganashi. Pa loke ta trata e anja 2014, prepara e pago pa 1 di december, pues dentro di dos siman. Esaki ta algo cu gremionan ta mira como casi imposibel.

PROMESANAN LUBIDA NA SAN NICOLAS
Lamentablemente den e ley aki gobierno a lubida completamente riba tur su promesanan hasi na San Nicolas den porta di eleccion den e asina yama 'begunstigend beleid'. Ta bin cu leynan di e beleid ey, pero nada di haber cu San Nicolas. 

DISPUTA TOCANTE TIME SHARE HOTELS
Pa locual ta trata time share hotel, tin discrepancianan bastante serio entre locual gobierno a acorda cu gremionan 2 anja pasa, y locual a bin den e ley awor, cual por trese hopi confusion, casonan den corte, y cu finalmente por afecta e stabilidad di e sectro di time share.

"Nos di fraccion di MEP ta comparti e preocupacionnan di gremionan y mi ta lamenta cu e minister no a tuma nan na serio. Varios fiscalista tambe a expresa nan preocupacion serca mi, pa e forma con kier introdusi e cambionan. E gremionan tur a expresa cu nan lo a prefera di mira cu gobierno ta tene cuenta cu nan preocupacionnan, y duna tempo pa introdusi e cambionan aki.
Ami personalmente no ta kere cu gobierno por bulldoze e ley di e forma aki. Nos preocupacion ta e cuidadano, e trahador, con e ta bai wordo afecta den e cambionan aki, y e pregunta ey minister Bermudez mester contesta ainda", lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co