{idkey=7577b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2384-parlamentario-chris-romero-mep-nos-pueblo-pasando-den-necesidad-y-partido-avp-ta-menosprecia-esnan-menos-afortuna%3FItemid%3D101][title=Parlamentario+Chris+Romero+%28MEP%29%3A+Nos+pueblo+pasando+den+necesidad+y+partido+AVP+ta+menosprecia+esnan+menos+afortuna][desc=Ultimamente+riba+diferente+plataforma+informativo+y+social%2C+nos+por+a+mira+con+integrantenan+di+partido+AVP+ta+categorisa+pobresa+na+aruba+como+%E2%80%9Cflohera%E2%80%9D+of+%26quot%3Bsinberguensura%26quot%3B.Por+ehempel%2C+nos+por+a+lesa+comentarionan+manera%3A+%E2%80%9CNo+ta+pobresa+tin%2C+ta+sinberguensa+e+arubianonan+ta%E2%80%9D.Otro+ehempel+cu+por+refresca+nos+memoria+ta%2C+ora+cu+nos+corda+expresionnan+manera%3A+%E2%80%9CNo+por+tin+pobresa+na+Aruba+si+5+mil+hende+a+bay+un+concierto.%E2%80%9DPero+e+mesun+hendenan+aki+no+ta+bisa+cu+mas+cu+25+mil+otro+hend]}
Ultimamente riba diferente plataforma informativo y social, nos por a mira con integrantenan di partido AVP ta categorisa pobresa na aruba como “flohera” of "sinberguensura".
Por ehempel, nos por a lesa comentarionan manera: “No ta pobresa tin, ta sinberguensa e arubianonan ta”.
Otro ehempel cu por refresca nos memoria ta, ora cu nos corda expresionnan manera: “No por tin pobresa na Aruba si 5 mil hende a bay un concierto.”
Pero e mesun hendenan aki no ta bisa cu mas cu 25 mil otro hende, kisas, tambe kier a bay pero no tabatin fondo pa cubri nan gasto.

Poniendo tur intento di manipulacion un banda, nos realidad actual ta mustranos tur dia e decadencia social cu nos pais ta pasando aden. Maestronan ta bati alarma cu tin demasiado mucha bayendo scol sin come mainta. Instancianan cu ta purba yuda, no por cu e cantidad di famia cu mester ayudo. Departamento di Asunto Social ta man yen cu tantisimo peticion pa sea bijstand, of cualkier otro forma di ayudo social cu nan por brinda.
Pero miembronan di partido AVP ta sigura cu na Aruba no tin pobresa. Segun e politiconan ciego di partido AVP, ta floho e cabesantenan di famia ta. Sin sa cu awendia hopi mama y tata ta hayanan mes ta tuma dos bus pa yega nan trabou pa por cria nan yiunan manera cu por.

WEB Aruba NV a anuncia cu 12 mil cas a cay atrasa den nan pago, y Minister De Meza a presenta na Parlamento bisando cu tin un cantidad di mas o menos 8 mil cas cu cuenta habri na ELMAR.
E datonan aki ta alarmante y ta demostra cu na Aruba pobresa ta aumentando drasticamente. E cifranan cu e companianan nacional di utilidad ta dunando di hendenan cu debe habri serca nan, mester actua como un yamada urgente na Mike Eman y su Gobierno, pa finalmente nan cuminsa pone e ser humano central y stop di gasta fondonan publico den asuntonan menos urgente.

Aparentemente integrantenan di partido AVP ta midi pobresa na Aruba segun e cantidad di hende local cu bay casino of concierto, como cu esey ta loke nan ta uza constantemente como argumento pa defende nan partido.
Pero realmente, y contrario na nan mesun custumbernan, tin un gran cantidad di hende na Aruba cu nunca a pone pia den un casino, of tin masha tempo sin bay un concierto, pasobra nan ta mucho bezig trahando diferente trabou pa por cria nan famia.

Cuanto famia lo pasa Pasco y aña nobo sin awa y sin coriente? Pero segun AVP no ta pobresa tin, ta floho e hendenan den necesidad ta.
Cuanto cabes di famia ta sin trabou y sin por yega na un bijstand, mirando nan famia pasa hamber, pidiendo bisiñanan copera pa nan yiunan por baña? Mirando con nan yiunan mester hasi huiswerk na lus di bela, mientras cu miembronan di AVP ta tilda nan di ta sinberguensa.
Pero nos por compronde cu pa Prome Minister esaki ta un dolor cu nunca e lo tin di sinti mirando e bon bida cu e ta biba, y teniendo na cuenta cu nunca e tabata sa e balor di tin un yiu.

Si nos para keto un rato y analisa, nos por ripara cu awendia na Aruba e asina yama "middle class" ta birando minimo, como cu pobresa ta aumentando drasticamente. E riconan ta birando di clase medio, mientras esnan cu tabata pober caba ta bibando den miseria.
Esaki ta e plan cu Mike Eman tabatin pa Aruba. Plan pa hasi nos isla pober, pa asina e y su consorcio por bira rico riba costo di nos pueblo.

Expresionnan haci den e articulo aki no necesariamente ta refleha opinion di ArenaPoliti.co