{idkey=6966b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2400-parlamentario-jeffrey-kelly-avp-mep-ta-tapa-wowo-pa-inversionnan-den-ensenansa%3FItemid%3D101][title=Parlamentario+Jeffrey+Kelly+%28AVP%29%3A+Mep+ta+tapa+wowo+pa+inversionnan+den+ense%C3%B1ansa][desc=Segun+Parlamentario+Kelly+opsicion+ta+keha+cada+biaha+cu+e+Gobierno+aki+no+ta+inverti+den+ense%C3%B1ansa.+Ora+ta+trata+di+desaroyonan+importante+den+ense%C3%B1ansa%2C+Mep+no+tin+e+grandesa+pa+reconoce+e+proyectonan+cu+tin+un+balor+importante%2C+no+solamente+pa+nos+hobennan+sino+tambe+pa+e+comunidad+rond+di+e+scolnan+cu+ta+wordo+renoba.+Nan+ta+lubida+cu+danki+na+e+onderwijsfonds+cu+Parlamento+di+Aruba+a+aproba%2C+caminda+a+wordo+habri+pa+maestro+y+cabesante+por+a+haya+cursonan+di+profesionalisacion.Profesional]}
Segun Parlamentario Kelly opsicion ta keha cada biaha cu e Gobierno aki no ta inverti den enseñansa. Ora ta trata di desaroyonan importante den enseñansa, Mep no tin e grandesa pa reconoce e proyectonan cu tin un balor importante, no solamente pa nos hobennan sino tambe pa e comunidad rond di e scolnan cu ta wordo renoba. Nan ta lubida cu danki na e onderwijsfonds cu Parlamento di Aruba a aproba, caminda a wordo habri pa maestro y cabesante por a haya cursonan di profesionalisacion.

Profesionalisacion

Nos por mira con Ministerio di Enseñansa a enfoca riba profesionalisacion di tanto maestro como cabesantenan. Cursonan manera e “conscious discipline”, caminda cu e maestro ta fungi como un rollmodel pa su alumnonan. E cabesantenan a sigui curso di “School Leadership Certification Programme”, caminda cu entre cabesantenan a discuti temanan manera e competencianan di liderazgo, e profiel di scolnan efectivo y e relacion y apoyo entre profesionalnan pa siña di otro.

Reconocimento di maestronan

E aña aki a premia e maestronan cu a destaca den nan trabou, durante e galardon di “appel di oro”. Esaki sin duda ta un bunita iniciativa cu lo sirbi como un extra motivacion pa maestronan. Banda di hasi e trabou di maestro cu amor, e ta un bon sintimento pa cualkier profesional ora bo ta sinti cu e trabou cu bo ta eherce ta wordo aprecia y reconoci.

Kerndoelen werkdocument

Na scolnan basico a introduci e kerndoelen y kerndoelenwerkdocument. Esaki tin como meta pa realisa e nivel minimo di conocemento y habilidadnan di diferente topico di matematica pa un bon transicion di scol basico pa scol secundario.

Lista di scolnan cu a wordo renoba/ta den fase di preparacion pa wordo renoba

Colegio San Nicolas: caminda cu a cuminsa cu e prome fase na augustus e aña aki

Graf von Zinzendorf kleuterschool: caminda cu e scol a conoce diferente reparacionnan.

Mon Plaisir kleuter y basis: caminda cu a percura pa un cura nobo

Colegio Felipe B. Tromp: despues di 15 aña a haya un cura pa nan scol. E cabesante di e scol aki a bisa cu awo tanto maestro y alumno ta sinti nan mes mas sigur, ya cu nan tin un omheining y ta preveni cu personanan cu no ta autorisa por yega subi tereno di scol. Tur esaki ta forma parti di e vision di “veilige school” caminda cu poco poco pero sigur ta poniendo mas enfasis riba seguridad na scolnan rond di Aruba.

Colegio San Augustin: e scol aki despues di casi 75 aña a conoce un renobacion completo. Esaki ta un inversion di alrededor di 3.3 miyon Florin y ta programa pa keda cla na februari 2016.

Colegio San Antonio: cu ta den pleno renobacion ta un inversion di casi 7 miyon Florin. E proyecto aki lo keda cla den luna di Maart 2016.

Prinses Amalia basisschool ta den proceso di destaho publico y proyectonan manera Arco Iris kleuterschool y biblioteca nacional di San Nicolas ta na DOW den preparacion pa wordo ehecuta.

Conclusion

Banda di no presenta na trabou ta parse cu Mep ta ciego pa e tipo di desaroyonan aki. Nan ta usa enseñansa pa saca probecho politico y ta bin cu criticanan basa riba mal interpretacion y no ta tuma tempo pa busca informacion corecto. Si di berdad Mep kier duna un aporte positivo nan mester bin cu sugerencianan con pa mehora nos enseñansa. Ta facil pa critica, pero ta un arte bin cu argumentonan valido y duna un aporte positivo.

Parlamentario Kelly ta manda un palabra di felicitacion na Minister di Enseñansa cu ta trahando duru pa mehora nos enseñansa. Nos sa cu tin hopi trabou pa hasi ainda, pero nos tin confiansa cu Minister lo sigui traha pa nos enseñansa en general.

Expresionnan haci den e articulo aki no necesariamente ta refleha opinion di ArenaPoliti.co