{idkey=8873b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2413-booshi-wever-upp-e-cambio-na-aruba-tambe-por-esey-por-solamente-den-union-awor-y-hunto%3FItemid%3D101][title=Booshi+Wever+%28UPP%29%3A+E+cambio+na+Aruba+tambe+por%21+Esey+por+solamente+den+UNION.+Awor+y+hunto%21][desc=Dia+6+di+december+u.p.+tabata+tin+eleccionnan+pa+e+poder+legislativo+na+Venezuela.+Nos+a+mira+un+cambio+radical+den+e+constelacion+di+e+Asamblea+Nacional.+Y+esaki+por+a+pasa+solamente+door+cu+e+oposicion+a+sera+cabez+y+a+pone+nan+diferencianan+un+banda%2C+y+a+bay+un+campa%C3%B1a+cu+hopi+obstaculo.+Sinembargo+e+UNION+ey+a+duna+resultado%21+E+UNION+aki+a+ofrece+e+pueblo+un+alternativa+viabel+y+real%2C+aunque+cu+e+partido+di+gobierno+tabata+haci+masha+hopi+propaganda+pa+nan+proyectonan%2C+y+cu+un+prensa+cu+tab]}
Dia 6 di december u.p. tabata tin eleccionnan pa e poder legislativo na Venezuela.
Nos a mira un cambio radical den e constelacion di e Asamblea Nacional. Y esaki por a pasa solamente door cu e oposicion a sera cabez y a pone nan diferencianan un banda, y a bay un campaña cu hopi obstaculo.
Sinembargo e UNION ey a duna resultado!
E UNION aki a ofrece e pueblo un alternativa viabel y real, aunque cu e partido di gobierno tabata haci masha hopi propaganda pa nan proyectonan, y cu un prensa cu tabata pasa solamente cosnan positivo defendiendo e gobierno. Aunque cu e pueblo tabata pasa den momentonan dificil.

Na Aruba nos tin un gobierno cu a endeuda nos pais na un forma fenomenal y a hipoteca nos pais pa e proximo 30 añanan.
E gobierno Arubiano ta priva nos pueblo di cosnan basico, manera un cuido medico cu a deteriora formalmente; no tin placa pa nos grandinan, no tin placa pa nos hendenan special; ta deal cu companianan mafioso y di baho mundo; ta sera acuerdonan cu e pueblo mes no ta sinti e beneficionan; ta caba cu nos medio ambiente; no tin placa pa nos educacion, etc. etc.
Pues nan prioridadnan ta completamente robez poni.

Pa por financia e Mal Gobernacion aki a endeuda nos pais sin misericordia y a hipoteca nos pais. Y nos a compronde cu Mike Eman no ta entrega e presupuesto 2016, pasobra e ta wardando noticia di CITGO y e rapport final di Repsol pa sa cuanto ta e cantidad di gas cu tin rond nos subsuelo.
Si esakinan ta positivo, e lo bay hunga e salbador atrobe, y lo no introduci ningun ahustacion cu CFT a propone, cu e consequencia cu e fiesta di mal gobernacion por sigui. Y e lo bay MALGASTA placa cu ainda nos no tin, pasobra si tin gas mes, no lo por saca ni un liter ainda, pasobra ta te aki por lo menos 5 aña esaki lo por pasa.

Alabes nos a bin compronde cu tin varios edificio den Playa cerca di Bestuurskantoor ta cla pa ser bendi cu un financista di AVP. Y tur esaki cu un prensa cu lo sigui manipula pa tene e gobierno anti-pueblo na bida. Pues Aruba cu turismo, un refineria y cu gas cu ya caba a ser bendi pa por sigui cu mal gobernacion.

Awor nos por sigui señala e asuntonan aki, pero kiko realmente por salba nos pais?
Pa 16 aña largo tabata tin un oposicion fuerte contra loke tabata pasa na Venezuela, pero un oposicion cu tabata fragmenta.


Recientemente a bin un cambio den esaki.
E oposicion a realisa nan mes cu nan lo no por sigui lucha dividi contra un poder dictatorial y cu un prensa comprometi.
Ta hustamente esaki UPP a realisa for di aña pasa juli caba, y nos a haci e prome intento pa yega na un UNION pa lucha contra e poder cu ta hibando un maneho anti-pueblo.
Despues cu e prome intento a fracasa, nos a bolbe purba na september aña pasa, pero sin exito.

UPP a sigui trata di mustra cu e unico forma cu nos por trece un CAMBIO FUNDAMENTAL Y REAL, ta pa medio di un UNION den e partidonan di oposicion cu e meta pa yega na un Compromiso Nacional pa ofrece e pueblo Arubiano un ALTERNATIVA.
E Compromiso aki lo exigi di esnan cu ta forma parti di e UNION, pa compromete nan mes cu nan lo garantisa pueblo cu nos pais lo bay ser goberna bow di e reglanan y principionan di Good Governance.
Na september di aña aki, nos a bolbe purba, y atrobe nos no a logra.
Kizas partidonan no ta convenci cu nos mester di e UNION aki.
Kizas nan ta kere cu nan so lo por cu e Poder destructivo cu ta goberna nos Pais y cu ta wordo grandemente yuda pa un prensa comprometi?
Diezcinco (15) aña pasa tampoco ningun hende por a kere cu na Venezuela e partidonan den oposicion lo por a uni. Y ta door di e esaki, e gobierno actual na Venezuela por a goberna na nan antoho.

Nos tambe kier warda 15 aña pa realisa cu nos mester uni pa core cu un gobierno anti-pueblo??
UPP ta kere cu nos no por warda ni un minuut mas.
Nos lo no cansa pa hiba un lucha cu tin como proposito pa trece e partidonan hunto pa yega na un compromiso nacional, cu mester caba cu mal gobernacion y politica di patronahe y corupcion. Y esaki solamente por pasa ora partidonan compromete nan mes cu nan lo trece proposicionnan cu lo garantisa cu e proximo gobierno lo goberna nos pais conforme reglanan di Good Governance.
Ta p’esey nos ta anuncia cu proximamente nos lo bay haci un invitacion atrobe na partidonan politico pa nos bin hunto pa trata na yega na dicho compromiso, cu den nos opinion lo ta un alternativa pa caba cu e era di añanan di mal gobernacion door di varios gobiernonan.
Nos no tin tempo pa perde, e CAMBIO mester ta AWOR Y HUNTO!!!!

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 9, 2015

Expresionnan haci den e articulo aki no necesariamente ta refleha opinion di ArenaPoliti.co