{idkey=1781b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2559-minister-benny-sevinger-dezerzijds-akkoord-ta-nifica-cu-di-mi-banda-y-na-e-momento-ey-e-peticion-por-cana-su-proceso%3FItemid%3D101][title=Minister+Benny+Sevinger%3A+%E2%80%98Dezerzijds+akkoord%E2%80%99+ta+nifica+cu+di+mi+banda+y+na+e+momento+ey+e+peticion+por+cana+su+proceso][desc=Departamentonan+mester+investiga+y+duna+nan+consehoORANJESTAD+%E2%80%93+Minister+Sevinger+a+duna+di+conoce+cu+e+ta+compronde+cu+oposicion+tin+un+trabou+pa+haci%2C+pero+ta+kere+cu+mester+averigua+miho+y+bin+cu+argumentonan+di+mas+peso.+Cu+esaki+ta+referi+na+acusacionnan+cu+su+persona+ta+faborece+empresario+Venezolano+Roberto+Rincon+pa+haya+tereno+na+Aruba.+Mescos+cu+hopi+otro+peticion+cu+ta+yega+na+su+oficina%2C+Minister+Sevinger+ta+haci+un+evaluacion+na+e+momento+ey+pa+duna+su+opinion.+El+a+splica+cu+ora+]}
Departamentonan mester investiga y duna nan conseho

ORANJESTAD – Minister Sevinger a duna di conoce cu e ta compronde cu oposicion tin un trabou pa haci, pero ta kere cu mester averigua miho y bin cu argumentonan di mas peso. Cu esaki ta referi na acusacionnan cu su persona ta faborece empresario Venezolano Roberto Rincon pa haya tereno na Aruba. Mescos cu hopi otro peticion cu ta yega na su oficina, Minister Sevinger ta haci un evaluacion na e momento ey pa duna su opinion. El a splica cu ora e ta skirbi riba un carta ‘Dezerzijds Akkoord’ no ta un ordo di dje pa duna tereno ciegamente, pero ta notifica cu di su banda y na e momento ey, no ta wak motibo contra pa e departamentonan encarga duna atencion na e peticion.

Como titular di Infrastructura y Desaroyo Ambiental, Minister Benny Sevinger tin bou di su maneho e departamento cu ta tramita entrega y uso di tereno. E carta cu oposicion ta haci desordo cune den prensa, ta data di 2014 na momento cu no tabatin ningun acusacion contra di Sr. Rincon na ningun parti di mundo. Al contrario, e tabata ser mira como un inversionista cu kier amplia su negoshi na Aruba.

E informacion cu e mandatario ta dispone di dje na 2014 ta bisa cu Sr. Rincon a cumpra un edificio riba tereno erfpacht ubica na Balashi cu a keda otorga dor di otro Gobierno, hopi aña prome. El a desaroya esaki di un forma hopi bunita den e area industrial y ta haci un peticion pa amplia esaki cu un tereno na banda cu ta liber. Basa riba esaki, Minister ta duna su ok pa otro departamentonan di Gobierno continua cu e proceso cu ta inclui investiga cu tin algun motibo pa nenga e peticion.

Minister Sevinger ta splica cu no mester bay duna e anotacion riba e carta otro nificacion mas leu di loke e ta. “Di mi banda e ta ok, djey e ta bay pa e departamento cu mester haci su trabou. Nan por bin cu argumento y conseho cu no por honra e peticion y di mi parti, e ora ey, ta djis notifica esey,” tabata e palabranan di Minister Sevinger.

Entre loke departamentonan den DIP mester mira, ta si e tereno en berdad ta liber, si no ta un natuurgebied, si tin rooi ta pasa den dje of otro obstaculo pa su funcion y tambe ta screen e ciudadano pa mira si tin algo sospechoso. E proceso despues ta sigui caminda e ciudadano cu a haci e peticion mester bin cu carta di banco, mapa y rapport, etc. prome cu e haya opcion riba e tereno. “E peticion aki no a yega asina leu ainda,” Minister Sevinger a bisa.

“Mi no ta compronde dicon hende ta kere cu Minister a firma y mañan bo ta haya tereno!” e mandatario a expresa añadiendo cu “Si na e momentonan aki e departamentonan bisa mi cu nan a investiga y tin motibo pa duna un conseho negativo, e no lo haya e tereno tampoco.” Minister Sevinger no ta wak pakico ta haci tanto escandalo riba un carta cu no ta compromete na nada y basa riba informacion di dos aña pasa. E ta kere cu e ta haciendo su trabou manera mester ta y ta para tras di e decisio cu el a tuma.

Mescos por ta pa cualkier otro compania estableci na Aruba. Si departamento di Gobierno bisa cu nan no tin motibo pa duda riba e fuente di recursonan di e director y Banco Central of Veiligheidsdient mustra cu nan no tin obhecion, anto e como Minister no tin pia pa para riba dje y nenga e peticion. Esey lo duna e director motibo te hasta pa bay Corte.

Finalmente Minister Sevinger ta informa cu actualmente e proceso ta canando su caminda, investigacionnan ta wordo haci y e ta wardando conseho di e departamentonan concerni relaciona cu e peticion aki prome cu ta tuma un determinacion.

Expresionnan haci den e articulo aki no necesariamente ta refleha opinion di ArenaPoliti.co