{idkey=8198b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2597-parlamentario-mr-xiomara-maduro-mep-cu-union-y-determinacion-nos-ta-logra-biba-den-libertad%3FItemid%3D101][title=Parlamentario+mr.+Xiomara+Maduro+%28MEP%29%3A+Cu+union+y+determinacion+nos+ta+logra+biba+den+libertad][desc=Dia+25+di+januari+2016+nos+ta+recorda+e+fecha+natalicio+di+un+gran+estadista%2C+lider+y+Libertador+di+nos+Pais%2C+Sr.+Gilberto+Fran%C3%A7ois+%28Betico%29+Croes.+E+persona+cu+gracias+na+su+lucha+y+determinacion+awe+nos+Pueblo+por+biba+den+e+libertad+cu+ta+permiti+nos+tin+un+Aruba+desaroya+na+unda+nos+solamente+e+yuinan+di+e+tera+aki%2C+pero+tambe+tur+cu+a+bin+duna+nos+un+man%2C+a+sa+di+disfruta+di+e+fruto+di+e+trabou+inmenso+cu+sr+Betico+Croes+a+haci+pa+nos.+Na+Aruba+nos+tin+hopi+pa+ta+agradecido+na+Betico+y+tur]}
Dia 25 di januari 2016 nos ta recorda e fecha natalicio di un gran estadista, lider y Libertador di nos Pais, Sr. Gilberto François (Betico) Croes. E persona cu gracias na su lucha y determinacion awe nos Pueblo por biba den e libertad cu ta permiti nos tin un Aruba desaroya na unda nos solamente e yuinan di e tera aki, pero tambe tur cu a bin duna nos un man, a sa di disfruta di e fruto di e trabou inmenso cu sr Betico Croes a haci pa nos. Na Aruba nos tin hopi pa ta agradecido na Betico y tur cu a yude firmemente den e lucha pa nos libertad cu awe nos Status Aparte ta brinda nos. Betico a laga un legado unico pa e generacionnan di nos Pais, ela sinia nos cu union y determinacion nos ta logra biba den libertad. 

Union na bienestar di nos Pais
Betico Croes a laga nos cu e ehempel cu nos por logra hopi pa nos Pais si nos por ta uni. Sigur na e momento aki den historia, e ehempel di union por yuda nos Pueblo grandemente. Betico a mustra nos cu e voz di un Pueblo uni por logra cosnan grandi, manera entre otro nos Status Aparte cu a trece tanto bienestar pa nos Pueblo. Si nos keda keto nada lo cambia. Pues nos mester sigi e ehempel di resona nos voz den union si nos kier logra cambionan na bienestar di nos Pais.

Determinacion pa logra
E lucha di Betico pa Status Aparte no tabata facil y a conta cu hopi sacrificio. Pero Betico a laga e ehempel atras cu si bo ta determina bo ta logra. Betico den su lucha a topa hopi contratiempo y a lucha contra contrincante poderoso, pero e no a perde fe of sintie intimida. Su determinacion pa logra bienestar pa su Pais a yude logra. Nos mester sigi e ehempel aki di no cansa di lucha pa nos bienestar y di nos yuinan. Cu determinacion nos ta logra.

Libertad ta bale la pena
Danki na Betico y tur esnan cu a yude den su lucha, awe nos por sa kiko kiermeen biba den Libertad cu e Status Aparte ta brinda nos. E libertad pa nos por dicidi pa nos mes, no ta algo asina comun. Pero Betico a mustra nos cu ta bale la pena e esfuerso pa tuma e responsabilidad pa por biba den libertad. Pesey na momento cu mishi cu e libertad aki nos mester uni pa stop cualkier cu ta menasa di kite for di nos.

Ban sigi Betico su ehempel
Aki poco dia cu nos ta recorda Dia di Betico, laga nos refleciona riba e ehempelnan cu ela laga atras pa nos. Ban percura pa como Pueblo nos sigi su ehempelnan y conserva tur locual ela logra pa nos cu su lucha incansabel. Ban uni cu e determinacion pa biba den libertad. Di antemano, un Felis Dia di Betico!

19 januari 2016

Expresionnan haci den e articulo aki no necesariamente ta refleha opinion di ArenaPoliti.co