{idkey=157b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2607-arubahuis-insure-to-study-ta-economico-y-cu-cobertura-amplio-pa-studiantenan%3FItemid%3D101][title=Arubahuis%3A+Insure+to+Study+ta+economico+y+cu+cobertura+amplio+pa+studiantenan][desc=Potret%3A+Nico+van+der+Ven%26amp%3Bnbsp%3BOtro+pais+di+Reino+%26amp%3Bnbsp%3Btambe+a+sigura+tur+su+studiantenan+na+e+mesun+seguro%26amp%3Bnbsp%3BVia+ITS+ta+sigura+na+Europeesche+Verzekeringsmaatschappij%2C+di+cual+Gobierno+di+Hulanda+ta+do%C3%B1o%26amp%3Bnbsp%3BDen+Haag+%26amp%3Bnbsp%3B%E2%80%93+Ya+ta+mas+cu+un+a%C3%B1a+cu+studiantenan+cu+ta+cay+bou+di+Arubahuis+ta+sigura+pa+nan+gastonan+medico+na+Insure+To+Study+%28ITS%29.+Na+a%C3%B1a+2014+Gobierno+di+Aruba+a+tene+un+destaho+publico+pa+e+seguro+di+nos+studiantenan+na+Hulanda.+Diferente+compania+a+inscribi+pa+e+destaho+]}
Potret: Nico van der Ven 

Otro pais di Reino  tambe a sigura tur su studiantenan na e mesun seguro 
Via ITS ta sigura na Europeesche Verzekeringsmaatschappij, di cual Gobierno di Hulanda ta doño 

Den Haag  – Ya ta mas cu un aña cu studiantenan cu ta cay bou di Arubahuis ta sigura pa nan gastonan medico na Insure To Study (ITS). Na aña 2014 Gobierno di Aruba a tene un destaho publico pa e seguro di nos studiantenan na Hulanda. Diferente compania a inscribi pa e destaho publico aki, entre nan e companianan di seguro Boogaard Assarantiën y ONVZ, cu ya caba tabata brinda un seguro medico pa studiantenan Arubiano na Hulanda. Un comision a traha un asina yama TOR (terms of reference) na cual e companianan di seguro mester a cumpli cu ne. E compania cu a cumpli cu e TOR, y tabata tin e miho oferta, lo haya e contract y esaki a resulta di ta ITS.

E pakete di seguro di ITS ta brinda hopi bentaha economico pa Gobierno di Aruba y e studiante. Esaki ta debi cu ITS ta brinda un pakete di seguro amplio y conforme e exigencianan di e TOR na e studiantenan cu un prima hopi atractivo. Banda di un seguro medico, e pakete tambe tin seguronan adicional, manera den caso di calamidad. Bou di esaki ta inclui entre otro cu ora un familiar di e studiante yega na fayece, e seguro ta percura pa e studiante por biaha pa Aruba mas pronto posibel. Esaki ta conta solamente pa un familiar den prome grado (cu ta mayornan y rumannan) y  den di dos grado (cu ta welanan  y welonan). Tambe e pakete ta ofrece un seguro pa responsabilidad civil (WA), un seguro di biahe, mientras cu e inventario di cas tambe ta sigura. Tur esaki pa un prima cu ta mita di loke prome tabata wordo paga. Pesey no ta nada straño cu  Gobierno di un otro pais den Reino tambe a scoge pa sigura su studiantenan na ITS.

Manera hopi biaha ta e caso, ora cambia pa un seguro nobo, na comienso por tin algun “problema di inicio” cu mester a supera. Den transcurso di e aña cu a pasa a scucha bon cua ta e problemanan cu studiantenan a enfrenta y a comunica esaki na ITS, cu a traha duro pa resolve tur e inconveniencianan. Arubahuis a tene atardi/anochi di informacion regional na Hulanda unda ITS personalmente a duna informacion tocante e pakete di seguro y di e compania mes. Despues a sigui comunica e studiantenan cu ta sigura pa medio di Arubahuis. Studiantenan cu a haya nan mes den un situacion caminda e instancia di servicio medico a bisa cu nan no ta sigura, mester a yama ITS na e momento cu esaki pasa, y esakinan a wordo resolvi. Te ainda esey ta valido pasobra tur e studiantenan, cu a opta pa e seguro via Arubahuis ta sigura. ITS ta regla e asunto aki directamente cu e dokter of cu e botica.

“Insure to Study” ta forma parti di un compania di famia bou di e nomber Jonker-Schotte Adviesgroep. Esaki ta un holding pa tres compania cu ta Jonker-Scheffers Volmacht bv, Jonker-Schotte Assurantiebedrijf bv y Insure To Study bv. Director di Jonker-Schotte Adviesgroep, señor Marco Scheffers, den un entrevista cu Antilliaans Dagblad dia 12 di november ultimo a aclaria cu e studiantenan Arubiano ta wordo atendi via di ITS, cu ta un broker, pero en realidad e studiantenan ta sigura na de Europeesche Verzekeringsmaatschappij, cu ta un compania di seguro solido. De Europeesche Verzekeringsmaatschappij ta forma parti di ASR-groep, di cual Gobierno di Hulanda ta doño dje. Ta algo comun cu companianan di seguro ta traha via di un broker.

ITS tin su oficina situa na Laan van Nieuw Oost-Indië 133 na Den Haag y nan number di telefon ta 00-31 70-2051860.

Arubahuis ta spera cu e informacion aki por ta util pa tur asegurado y nan famianan.

Expresionnan haci den e articulo aki no necesariamente ta refleha opinion di ArenaPoliti.co