{idkey=7546b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2787-partido-abo-chichi-ta-observa-y-comenta-3%3FItemid%3D101][title=Partido+ABO%3A+Chichi+ta+observa+y+comenta...][desc=E+siman+aki+ta+celebra+dia+di+SAN+VALENTINO.+Chichi+cu+Buchi+ta+corda+tempo+nan+a+conoce+otro+anto+Buchi+tabata+bin+frey+na+cas+di+Chichi+no+tabata+tin+tur+e+beheit+cu+tin+awe.+Buchi+tabata+bin+bishita+Chichi+bon+bisti%2C+semper+cu+un+flor+pa+regala+Chichi.+Mama+tabata+sinta+den+sala+cu+nos.+Nos+dos+tabata+combersa+anto+ora+mama+cuminsa+cabisha+Buchi+tabata+ha%C3%B1a+chens+di+horta+un+sunchi.+Ay+esey+tabata+un+tempo+dushi.+Regalo+caro+of+sali+bay+come+na+un+restaurant+%E2%80%98chique%E2%80%99+no+tabata+existi.+AM]}
E siman aki ta celebra dia di SAN VALENTINO. Chichi cu Buchi ta corda tempo nan a conoce otro anto Buchi tabata bin frey na cas di Chichi no tabata tin tur e beheit cu tin awe. Buchi tabata bin bishita Chichi bon bisti, semper cu un flor pa regala Chichi. Mama tabata sinta den sala cu nos. Nos dos tabata combersa anto ora mama cuminsa cabisha Buchi tabata haña chens di horta un sunchi. Ay esey tabata un tempo dushi. Regalo caro of sali bay come na un restaurant ‘chique’ no tabata existi. AMOR y AMISTAD tabata manda, e cosnan chikito cu ta haci e otro persona asina importante den bo bida, anto henter aña.

Te poco tempo pasa Chichi tabata gusta bay Playa. Tin ora tabata dificil pa haña un luga di para e auto, pero esaki nunca a haci cu Chichi a keda sin bay. Ma for di dia cu Aruparking a bin den existencia cu e meternan poni tur caminda, Chichi a haña un disgusto. Chichi sa bay si, pero Chichi no ta contribui na e proyecto Aruparking cu ta algo di haragan cu a daña pa Playa. Bo ta DRECHA Caya Grandi pa despues bo mes MAT’ E. Awo ta sali na cla cu tin mas problema cu comercio mes. Manera un comerciante ‘miembro obliga’ di Aruparking a skirbi, e proyecto aki ‘NO LO SOBREVIVI DEN e mundo di COMERCIO’!

E ta tristo pa mira con cada dia cu pasa mas y mas atras Aruba ta bay. E candela riba DUMP tabata uno ‘intencional’. Bisando esey e problema no a keda soluciona. Unda control ta keda? Con por papia di ‘sostenibilidad’ y di ‘green’ uzando Aruba como ehemplo di mundo, ora bo sa cu e dumpnan di Aruba ta manera YAGA YEN DI PUS cu ta caba cu salud di pueblo y nos medio ambiente. E ta un berguensa nacional ora bo pensa con e turista ta wordo gaña. Con por papia ainda di ONE HAPPY GREEN SUSTAINABLE ISLAND??!

Hablando di control, e ‘carchi berde’ ta bon pero no ta controla SMAAK di producto. Chichi no sa si Minister y Parlamentarionan ta importa nan beleg, fruta y berdura separa of cu nan lenga no tin smaak. Ta increibel con pa TANTO AÑA caba pueblo tin cu come productonan cu smaak di INSECTICIDA ora cumpra den supermercadonan Chines. Ora bo reclama e Chines, diripiente e no ta compronde Papiamento mas. Aparentemente, ta un producto contra insecto cu nan ta spray den e airconan y cu ta penetra den tur producto cu no ta den bleki of glas. GOBIERNO: tuma paso, controla, boet of cera e supermercadonan (y e doñonan!) cu ta ATENTA CONTRA SALUD di pueblo!

ZIKA ta birando tremendo NEGOSHI. Ya cu no tin un vacuna contra e virus e consehonan valido ta: corda wak den bo cura y elimina awa cu ta para, apesar di e secura cu tin basta aña ta asota nos isla. Pero ta core unda no tin hende ta biba? Ta controla e dumpnan ‘ilegal’?

E siguiente negoshi grandi mes ta sinta den proteccion personal: camisa/blusa manga largo, carson largo, repelente cu mester pasa cada tanto rato na curpa etc., tur ANTI- ZIKA!

PAPIAMENTO ta nos idioma maternal y tur otro ta secundario. Esaki ta luna di Lenga Materno. Ta di spera cu tur e fundacion- y otronan ta sigui conscientisa pueblo riba e importancia di esaki. Bo IDIOMA ta un di e caracteristicanan basico di bo CULTURA. Papiamento ta identifica ARUBA (CORSOU y BONEIRO) y e ARUBIANO.

Ta di spera cu Minister di Cultura, sr. Otmar Oduber, pone mas atencion y sigur mas placa disponibel pa nos idioma: su divulgacion corecto, investigacion cientifico, otro investigacion manera por ehempel nos literatura oral y hopi mas y haci tur esaki parti oficial di e curriculum di tur scol na Aruba. Si tin placa pa arte publico, mester por tin pa nos idioma Papiamento!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co