{idkey=3750b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2842-minister-otmar-oduber-concentracion-di-fondonan-di-turismo-lo-ta-riba-diversificacion-di-mercado-mericano%3FItemid%3D101][title=Minister+Otmar+Oduber%3A+Concentracion+di+fondonan+di+turismo+lo+ta+riba+diversificacion+di+mercado+Mericano][desc=Minister+Otmar+Oduber+den+reunion+cu+comisionnan+di+Parlamento%26amp%3Bnbsp%3BDiamars+atardi+Minister+Otmar+Oduber+a+reuni+cu+e+comisionnan+di+turismo+y+economia+di+Parlamento+pa+splica+riba+e+cambio+di+strategia+pa+sector+turistico.E+mandatario+a+splica+tur+e+miembronan+di+Parlamento+presente+riba+e+cambio+di+strategia+pa+diversifica+nos+turismo+den+mercado+Mericano+mirando+e+retonan+cu+tin+na+e+mercado+di+Latino+America+y+teniendo+na+cuenta+cu+e+mercado+Europeo+ta+mustrando+un+crecemento+flat.+Intencion]}
Minister Otmar Oduber den reunion cu comisionnan di Parlamento 

Diamars atardi Minister Otmar Oduber a reuni cu e comisionnan di turismo y economia di Parlamento pa splica riba e cambio di strategia pa sector turistico.
E mandatario a splica tur e miembronan di Parlamento presente riba e cambio di strategia pa diversifica nos turismo den mercado Mericano mirando e retonan cu tin na e mercado di Latino America y teniendo na cuenta cu e mercado Europeo ta mustrando un crecemento flat. Intencion di concentra y diversifica den e mercado Mericano no ta encera cu no lo continua cu e mercadeo den e otro areanan, pero lo kier inverti den un forma hopi mas fuerte na Merca y den e cuadro ey e fondonan di emergencia lo por wordo usa.
El a enfatiza cu esaki no ta un grito di alarma, al contrario e ta un forma proactivo pa evita cu lo por tin un situacion negativo pa nos pilar economico. Mercado Mericano tin 14 luna consecutivo ta respondiendo positivo y ta creciendo, siendo Aruba e di dos destinacion den Caribe cu mas a crece for di e mercado aki. E situacion exitoso aki mes ta esun cu ta conduci na bisa pa reafirma y pone un presencia mas amplio den e mercado aki.
A papia tambe riba e intencion pa cera acuerdonan cu plataformanan manera entre otro airbnb, home away y flipkey. Minister Oduber a bisa cu no por bringa e tendencia di ‘other accomodations’ y mester gare pa yega na acuerdonan manera por ehempel Amsterdam a haci.  Eynan a crea un sistema di categoriza e diferente acomodacionnan cu no ta hotel y esaki lo por yuda pa Aruba por encamina, hunto cu e decision di inclui e parti di ‘otro acomodacionnan’den e maneho pa por bira partner cu nan, pa por coop cu nan, percura pa nan tambe ta exitoso y cumpli cu un nivel minimo di exigencianan di calidad y compromiso di paga impuestonan manera e otro hotelnan tambe ta haci.
Minister Oduber a enfatiza cu e creencia cu ‘other accomodations’ ta apartamentnan of casnan di menor calidad no ta cuadra cu e realidad. En berdad tin acomodacionnan cu ta asina, pero, bou di e categoria aki ta haya condominionan, casnan y apartamentonan cu varios biaha ta hasta mas caro y luhoso cu hotelnan mes. Importancia di reglamenta e tipo di acomodacionnan aki ta pa nan tambe cumpli cu e rekisitonan y paga belasting y asina e por ta mas husto pa tur actor den e ramo aki.
E mandatario a indica cu e tendencia mundial ta cu hendenan ta bayendo den e direccion di ‘other accomodations’ y mester adapta na e tendencia aki continuando cu e maneho di crecemento paulatino, concentrando riba e turistanan afluente.
Pa loke ta e uzo di e fondonan di emergencia di ATA, Minister Otmar Oduber a bolbe bisa cu esakinan ta pa evita un crisis. Si no reacciona awor aki e lo por tin consecuencia pa sector laboral y no por lubida cu Aruba ta e pais number 1 na mundo cu ta dependiente di turismo y  mester ta proactivo. Mester prepara pa evita cu un dia yega y hendenan lo por perde trabou.
Minister di Turismo tambe a informa parlamentarionan cu e ley all inclusive ta bayendo MR e siman aki pa despues bay Parlamento y cu ta wardando e plan strategico di 2016 for di ATA cu e cambionan den dje pa asina sinta cu AAA y conhuntamente traha pa busca e extra stulnan for di e mercado Mericano.

Expresionnan haci den e articulo aki no necesariamente ta refleha opinion di ArenaPoliti.co