{idkey=6082b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2873-partido-abo-chichi-ta-puntr-abo-3%3FItemid%3D101][title=Partido+ABO%3A+Chichi+ta+puntr%E2%80%99abo...][desc=Siman+cu+a+pasa+atrobe+tabata+yen+di+badabada.+Chichi+su+bisi%C3%B1a+tambe+tin+un+yiu+muhe+cu+tin+mas+di+15+a%C3%B1a+ta+warda+riba+un+pida+tereno+erfpacht+pa+traha+su+casita.+Ta+bisto+cu+reinado+ta+cabando+y+desesperacion+ta+coy+curpa.+Ey+Buchi%2C+entrega+bo+peticion+y+bay+para+den+rij%21Atrobe+diferente+protesta+cu+ta+mustra+cu+cana+a+yena.+Tabata+Parke+Nacional+Arikok%2C+Elmar%2C+Serlimar%2C+Aura+Casino+y+tin+mas+cu+ta+riba+un+alerta.+Chichi+ta+kere+cu+e+indiferencia+y+falta+di+respet+di+gobernantenan+pa+cu+pue]}
Siman cu a pasa atrobe tabata yen di badabada. Chichi su bisiña tambe tin un yiu muhe cu tin mas di 15 aña ta warda riba un pida tereno erfpacht pa traha su casita. Ta bisto cu reinado ta cabando y desesperacion ta coy curpa. Ey Buchi, entrega bo peticion y bay para den rij!

Atrobe diferente protesta cu ta mustra cu cana a yena. Tabata Parke Nacional Arikok, Elmar, Serlimar, Aura Casino y tin mas cu ta riba un alerta. Chichi ta kere cu e indiferencia y falta di respet di gobernantenan pa cu pueblo ta hibando nos pais na anarkia.

Cerca nos bisiñanan riba tera firme tambe Chichi ta mira hopi cambio. Ata Evo Morales di Bolivia a haya sorpresa ora cu nan a vota contra su postulacion pa un siguiente eleccion. Ta evidente cu corupcion, fraude y otro practicanan mafioso no ta paga. Despues di Argentina, Venezuela awo ta Bolivia. Kico Aruba ta warda?

Na Aruba tambe Chichi a ripara cu ora e mesun gobierno sinta mas cu 1 mandato, tin problema. Lo ta bon pa cambia e sistema unda cu e partido na mando ta salta e eleccion siguiente anto despues di 4 aña por participa atrobe. Asina ta evita cu cosnan ta wordo haci ‘blindeloos’.

Tambe ta bon pa scrap e 'inmunidad' cu parlamentario y minister ta gosa di dje. Chichi ta haya cu ora un persona drenta politica e mester asumi e responsabilidad cu esey ta trece cu’ne. Ta pa pueblo su prosperidad bo ta traha toch? Awel, ora bo faya bo mester haya!

No mester ta recherche ni minister di husticia pa sa cu riba nos pais tin mafia ta actua. Atrobe a haya un curpa sin bida cu parce a wordo kima cu gasolin. Tur hende sa cu esey ta e forma cu mafia ta ahusta cuenta of manda mensahe. Pueblo no por drumi trankil, minister Dowers.

Chichi ta wardando keto bay riba e reunion cu parlamentario Donny Rasmijn a pidi pa trata e dump di Parkietenbos. Mas tempo pasa, mas problema tin. Di con ta tarda tanto asina? Ademas, e bario awo ta haya molester di e trucknan grandi cu ta bay Barcadera. Cuanto mas?

‘Vergrijzing' na Aruba, palabra malo! Ta parce cu niun hende ta bira bieu y cu esunnan cu yega edad madura ta stroba. Tur hende ta igual y merece un trato igual. Di con tin pura pa deshaci di nos grandinan? Acaso nan no merece gosa di bida despues di a traha duro pa e pais aki?

Bo sa, si tabata na Hulanda, e rector di Colegio Arubano lo a wordo kita for di trabou masha tempo caba. Di con gobierno ta wanta tanto baina di e meneer aki? Unda e maestro-, mama- y tatanan a keda awo?

'Grandeza di un nacion y su progreso moral por wordo husga pa e manera con e ta trata su animalnan' - Mahatma Gandhi. Esaki ta un berdad hopi grandi. Aki na Aruba e cachonan riba caya supuestamente sin doño, ta mustra na ki nivel e pais a yega.

Ya cu a desvia placa y a cumpra camara pa instala tur rond di nos isla, Chichi ta spera cu lo pone camara tambe na Santana di Cacho. Tanto bal controla movecion y invadi privacidad di e ciudadano local, anto keda sin vigila y aresta e ilegal cu tur hende sa masha bon ta unda nan ta drenta.

Chichi a ripara cu diripiente algun parlamentario a lanta for di soño, y a cuminsa cuestiona e maneho di nan mesun gobierno. Kico, e parlamentarionan aki a realisa porfin cu nunca tabatin un maneho bon of cu nan tambe kier presiona nan colega pa haya un pida tereno pa bira cunukero,manera un minister a haci?

Ultimo tempo atrobe hopi fanfaria cu anuncio di proyecto p'aki y p'aya. Seis aña di solamente djodjo y enrikecimento personal cu placa di pueblo. Pero awor un aña prome eleccion, hala di anuncio di proyecto cu tin cu termina net prome eleccion. Y..AINDA FALTA. Trinta aña, e mesun forma di hiba campaña. Y trinta aña, e mesun resultado. Dus ken ta bobo, pueblo of e politico tradicional? Chichi si sa e contesta. Abo tambe?


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co