{idkey=5292b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2901-partido-abo-confirmacion-cu-populismo-y-corupcion-a-pone-gobierno-na-rudia-di-hulanda%3FItemid%3D101][title=Partido+ABO%3A+Confirmacion+cu+populismo+y+corupcion+a+pone+gobierno+na+rudia+di+Hulanda][desc=E+inkt+no+a+seca+riba+e+aprobacion+di+e+presupuesto+2016%2C+cu+diferente+parlamentario+a+core+sali+gaba+cu+awor+si+e+presupuesto+ta+cumpli+cu+locual+a+wordo+palabra+cu+Hulanda.+Parce+cu+realmente+e+parlamentarionan+aki+no+sa+lesa%2C+compronde+kico+nan+trabou+ta+of+simplemente+nan+kier+mustra+con+incondicional+nan+lealtad+ta+na+e+lider+supremo.Cu+hopi+ciudadano+sa+cu+e+gobierno+aki+no+por+conta+e+berdad%2C+a+pesar+cu+e+tin+e+signatura+di+ta+cristian+democrata%2C+ainda+e+ta+persisti+cu+e+mal+custumber+aki]}
E inkt no a seca riba e aprobacion di e presupuesto 2016, cu diferente parlamentario a core sali gaba cu awor si e presupuesto ta cumpli cu locual a wordo palabra cu Hulanda. Parce cu realmente e parlamentarionan aki no sa lesa, compronde kico nan trabou ta of simplemente nan kier mustra con incondicional nan lealtad ta na e lider supremo.

Cu hopi ciudadano sa cu e gobierno aki no por conta e berdad, a pesar cu e tin e signatura di ta cristian democrata, ainda e ta persisti cu e mal custumber aki. Den e articulo aki nos lo bay discuti e calidad di e cifranan, pasobra discuti cu hende cu a aproba diferente presupuesto pa despues resulta cu nan tabata un mentira grandi, no tin sentido. Mas importante ta pa analisa locual e minister di Finansas a declara y e carta di ‘College Aruba financieel toezicht (CAft)’.

Den e carta di 2 di december 2015, CAft ta bisa: ‘..constateert het CAft dat gezien de significante afwijkingen in deze begrotingswijziging de Arubaanse regering zich niet houdt aan het eigen vastgestelde Balanced Budget Akkoord (BBA) van 2013. Het financieringstekort komt na wijziging..uit op 4,5%’. Tambe CAft ta declara: ‘Het CAft is echter van mening dat het realiteitsgehalte van de voorgenomen aanpassingen niet toereikend is’ y ‘wederom duidelijk maakt dat de groei van de publieke uitgaven niet beheerst wordt’.

Siman pasa e minister di Finansas a declara: ‘..tur hende sa cu tin un asina yama Witte Donderdag akkoord caminda Hulanda di su banda a priminti cu nan lo habri e posibilidad ey y e facilidad kiermen cu nan lo inscribi na momento cu Aruba mester fia atrobe’.

Cu esaki, e minister kier refresca Hulanda su memoria riba e acuerdo aki. Pero kisas el’a lubida cu e acuerdo aki a wordo firma na 2013 prome cu eleccion y a pesar  cu esaki a wordo firma y cu gobernador a pidi gobierno pa no hinca Aruba den mas debe, gobierno a haci’e toch djis pa gana eleccion. Gobierno no a respeta e palabracion haci.

Manera e minister di Finansas a referi na un acuerdo di 2013, CAft (lesa Hulanda) tambe ta referi na un palabracion haci na 2013. Aki CAft ta referi cu gobierno tampoco ta cumpli cu locual e mes a propone cu e BBA. Aki CAft ta papia di e ahustacionnan despues di e presupuesto 2015 y su efectonan pa esun di 2016. Pues a pesar cu algun parlamentario cu no sa/por lesa kier canta victoria, ainda esaki ta leu di berdad. Algo cu tambe e minister di Finansas ta confirma: ‘..mester por sinta cu Hulanda na mesa y convence nan cu nan por cuminsa di duna e facilidad pa e parti di financiamento..’ (Bon Dia, 26 februari 2016).

Observacion

Desde e ‘Witte Donderdag akkoord’, gobierno nunca a cumpli cu ningun palabracionnan haci cu Hulanda. Awor e ta hopi straño pa scucha e minister di Finansas refresca Hulanda su memoria riba locual a wordo palabra. Actualmente gobierno ta campañando feroz atrobe, anunciando diferente proyectonan y partiendo placa publico pa loco, net manera el’a haci na 2013. Di unda e placa aki ta bini? Exacto, di e ‘publieke uitgaven’. Un punto di constante preocupacion pa CAft. Pues, con sincero algun mandatario y parlamentario ta cu pueblo ora nan kier bende pueblo cu awor tur cos ta na ordo cu e situacion financiero di Aruba? El’a bira custumber pa gobierno entrega cada aña un ‘begrotingswijziging’ cu ta solamente aumenta e debe nacional. Manera nan ta bisa na Hulandes ‘het kan verkeren’. Aña 2016, ta nada diferente cu un ripiticion di aña 2013. Solo e biaha aki, gobierno ta na merced y rudia di Hulanda!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co