{idkey=6785b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2932-partido-abo-tur-dia-ta-dia-di-hende-muhe-pero-ainda-tin-hende-cu-no-ta-compronde-esaki%3FItemid%3D101][title=Partido+ABO%3A+Tur+dia+ta+dia+di+hende+muhe.+Pero+ainda+tin+hende+cu+no+ta+compronde+esaki++][desc=Riba+8+di+Maart%2C+mundo+ta+recorda+e+ser+femenino+cu+un+dia+special.+Tin+un+dicho+cu+ta+bisa%3A+%E2%80%98Tin+un+muhe+na+e+comienso+di+tur+cos+grandi%E2%80%99.+A+pesar+cu+tur+hende+sa+esaki%2C+toch+tin+algun+persona+cu+no+kier+compronde+esaki.+E+solo+hecho+cu+abo+lector+ta+lesa+e+articulo+aki%2C+ta+e+confirmacion+di+e+dicho+aki.+Nos+tur+tin+un+mama+y+p%E2%80%99e%2C+no+tin+nada+mas+grandi+den+e+mundo+aki+cu+abo.Na+tur+parti+di+mundo+e+ser+femenino+no+ta+wordo+respeta%2C+manera+debe+ser.+Si+e+ta+na+cas%2C+trabou+of+den+famia%2C+de]}
Riba 8 di Maart, mundo ta recorda e ser femenino cu un dia special. Tin un dicho cu ta bisa: ‘Tin un muhe na e comienso di tur cos grandi’. A pesar cu tur hende sa esaki, toch tin algun persona cu no kier compronde esaki. E solo hecho cu abo lector ta lesa e articulo aki, ta e confirmacion di e dicho aki. Nos tur tin un mama y p’e, no tin nada mas grandi den e mundo aki cu abo.

Na tur parti di mundo e ser femenino no ta wordo respeta, manera debe ser. Si e ta na cas, trabou of den famia, den cierto situacionnan e no ta wordo mira como igual di e hende homber. Y esaki ta un paradox. Tur hende sa cu e ser femenino den hopi aspecto ta mas fuerte y sabi cu un homber, pero toch ta existi un desigualdad social entre hende homber y hende muhe.

E argumento cu varios persona semper ta uza, cu nos ta biba den un mundo ‘machista’, no ta valido mas. Hasta e ta mustra un ignorancia di marca mayor. Hopi tristo pa mira cu ainda machismo ta wordo uza como hustificacion. Desigualdad, maltrato, abuso, violacion, intimidacion, insulto of ‘intercambio di fabornan sexual pa yega na algo’, nunca por ta un hustificacion pa mantene un situacion di desigualdad y di discriminacion intacto. Y si nos kier ta honesto cu nos mes, e no ta e ‘machonan’ so cu ta percura pa e situacion negativo aki prevalece. Tin hopi muhe cu ta ‘prefera’ e situacion di desigualdad y discriminacion sigui existi. Pa algun di muhenan aki, e ta manera sin un homber, nan no por existi y p’esey nan ta dispuesto pa acepta tur tipo di abuso di e hende homber. Pa e actitud aki, sigur lo tin un monton di argumento ‘valido’, pero esey no ta haci cu e ta bon of ‘normal’. Mi ta sigur cu cada un di nos, conoce casonan asina. Solo e hecho cu Nacionnan Uni mester declara un dia special pa pone atencion riba desigualdad y discriminacion di hende muhe, ta bisa cu e fenomeno aki ainda ta existi, cu e no ta bon y cu e mester para.

Hopi biaha nos mes no ta mira mas e importancia, e contribucion, e balor of e rol cu un hende muhe tin den e bida diario di cada un persona y e sociedad. Su rol ta hopi mas grandi cu nos ta kere y e no ta keda limita na e cas so. Semper tabata tin mas hende muhe cu hende homber y e ultimo añanan e diferencia entre nan, solamente a bira mas grandi. Awendia tin mas hende muhe ta traha cu hende homber (hasta den construccion). Mayoria di e alumnonan y e graduadonan, ta hende muhe. Conclusion, hende homber ta den un minoria den tur seccion di e sociedad y esey lo keda asina tambe den futuro. Dus esunnan, hende homber y hende muhe, cu no kier reconoce e rol importante cu un hende muhe ta eherce cada dia den e sociedad, ta bobo.

E articulo aki, no mag di wordo interpreta tampoco manera un provocacion. E articulo aki tin e pretension pa stimula e discusion unda tur tipo di discriminacion lo wordo rechasa y reemplasa cu respet pa otro. Tambe pa nos sociedad cuminsa realisa cu hopi cos negativo cu a bira ‘normal’ den nos sociedad chikito, no ta ‘normal’ y cu esaki no mester wordo tolera ni acepta! Nos sociedad ta asina chikito, cu mayoria di e desaroyonan negativo cu nos conoce awendia, por wordo soluciona facil y lihe. No mester di mas wega politico, comision of investigacion cu ta costa hopi placa of tempo pa soluciona nan. Un simpel ‘NO. Nos no kier esaki mas’, ta locual ta necesario pa cuminsa para e desaroyonan negativo cu nos sociedad conoce awendia.

Tampoco mester di un dia special di hende muhe of uno di dia di mama, pa duna e ser femenino su respet y balor. Mi ta sigur cu mayoria di e  personanan femenino lo aprecia mas e simpel gesto chikito di dun’e su respet tur dia, enbes di un bouquet di flor riba e dos dianan aki.

Mi ta hopi contento y gradici cu mayoria di e hendenan cu ta yudando partido ABO, ta hende femenino. Sin nan, nos lo no por haci locual nos ta trata di haci tur dia pa conscientisa y yuda e pueblo di Aruba. Na nan, danki y na henter e comunidad: duna contenido real na e palabranan bunita y respeta e hende muhe tur dia!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co