{idkey=222b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2948-partido-abo-aki-si-tin-trabou-pa-ministerio-publico-ban-wak-si-e-lo-actua%3FItemid%3D101][title=Partido+ABO%3A+Aki+si+tin+trabou+pa+Ministerio+Publico.+Ban+wak+si+e+lo+actua%21][desc=Mientrastanto+tur+hende+sa+cu+pa+30+a%C3%B1a+caba+nos+parlamento+no+ta+funciona+y+esaki+ta+wordo+admiti+anual+na+apertura+di+e+a%C3%B1a+parlamentario+pa+e+mesun+parlamentarionan.+Pero+toch+bo+ta+keda+asombra+pa+mira+cu+ki+facilidad+con+cada+biaha+e+mesun+parlamentarionan+ta+duna+pueblo+mas+prueba+con+parlamento+no+ta+funciona.Siman+pasa+den+e+ansha+pa+defende+e+minister+di+Infrastructura+cu+e+minister+no+ta+haci+nada+contra+ley+cu+su+krabbeltje+%E2%80%98Akkoord%2C+gaarne+uw+medewerking%E2%80%99+riba+peticionnan+cu+ta]}
Mientrastanto tur hende sa cu pa 30 aña caba nos parlamento no ta funciona y esaki ta wordo admiti anual na apertura di e aña parlamentario pa e mesun parlamentarionan. Pero toch bo ta keda asombra pa mira cu ki facilidad con cada biaha e mesun parlamentarionan ta duna pueblo mas prueba con parlamento no ta funciona.

Siman pasa den e ansha pa defende e minister di Infrastructura cu e minister no ta haci nada contra ley cu su krabbeltje ‘Akkoord, gaarne uw medewerking’ riba peticionnan cu ta wordo entrega na su oficina prome cu nan yega e departamentonan concerni, un parlamentario a declara (Bon Dia, 4 Maart 2016):

‘Si kier papia di acto coruptivo cu lo ta tumando luga cu tereno di pueblo, e informante di partido MEP aki mester splica un pida tereno di su famia cu el a pasa man pa esaki y bende..Esaki MI persona ta na altura di dje’.

Un declaracion haci publicamente asina, ta insinua cu un infraccion contra ley a wordo cometi. Segun nos leynan, si un persona sa di un infraccion contra ley, e tin cu haci un denuncia oficial. Sino e tambe lo ta actuando contra ley y cu e ta haci’e culpabel. Awor den e caso specifico aki, nos ta papiando di un parlamentario cu sa di un supuesto infraccion di ley, pero cu e parlamentario a scoge di keda keto te ora e por uza e informacion aki pa hustifica un otro supuesto infraccion di ley di e minister di Infrastructura.

Preguntanan esencial pa haci publicamente:

1. Cuanto mas informacion e miembro di parlamento aki (of otronan) tin of sa di posibel infraccionnan cu ta wordo cometi, pero pa motibonan politico (of pa defende nan mes of partido) ta prefera di keda keto?
   
   
2. Cuanto tempo e miembro di parlamento aki tabata tin of sa di e informacion aki di un posibel infraccion di ley?
   
   
3. Si ainda e miembro di parlamento aki, lo haci un denuncia oficial di e posibel infraccion di locual e tabata sa di dje na Ministerio Publico?
   
   
4. Si e miembro di parlamento aki cu a sali pa para hende y medionan cu ta ‘trata di tacha bon nomber y integridad di representantenan di pueblo den parlamento’, ta pensa cu scondiendo informacion di un posibel infraccion di ley, ta integro?

Tur miembro di parlamento a huramenta conforme articulo III.11 di e Staatregeling pa ‘defende e bienestar general di Aruba’. Un declaracion duna asina pa un miembro di parlamento, ta ilustra claramente cu aki e bienestar general no ta wordo sirbi, pero e interes propio y esun di e partido. E comportacion aki, riba su mes ta un otro infraccion contra su huramento y un insulto pa pueblo.

Den diferente parti di Reino, e Ministerionan Publico ta activo investigando varios supuesto actonan di fraude, corupcion y soborno bou di politiconan, parlamentarionan y gobernantenan. Pero aki na Aruba, parce cu nos Ministerio Publico ta prefera di wak e otro banda, ta prefera di referi tur asunto asina bek na e mesun parlamento cu no ta funciona of ta prefera di ocupa su mes cu cobramento di boetnan. E conducta aki di nos Ministerio Publico, solamente ta pone mas hende cuestiona e imparcialidad y credibilidad di e organo importante aki.

E no por ta asina cu diferente miembro di parlamento den Reino ta wordo investiga y persigui pa corupcion, fraude, soborno y cumpramento di voto, pero aki na Aruba nada ta wordo haci. Tur hende riba e isla aki (y den Reino) sa cu e mesun actonan cu ta wordo investiga y persigui den otro partinan di Reino, ta pasando aki tambe. Y e ultimo añanan na gran escala. Palabranan manera ‘WODC-rapport’, ‘Brug di madushi’, ‘Rapport Koerten’ y ‘Roversbende’ ta ilustra cu tin huma. Pero nunca nos Ministerio Publico tin tempo pa haci un investigacionnan profundo, nunca e ta haya algo castigabel pa ley of semper e ta haya un ‘argumento legal’ pa nunca detecta e candela.  Esunnan (incluso Hulanda) cu ta kere cu na Aruba e asuntonan di fraude, corupcion y soborno no ta pasa den politica, a scoge pa practica e politica di Avestruz enbes di acepta e realidad. Desde 1995 tur hende a confirma esaki durante e koninkrijkssymposium: ‘Het grabbeltonscenario is alom bekend..Eerst ben ik met mijn vrienden aan de beurt terwijl ik mijn vijanden achteraan de rij laat staan. Om dit soort menselijke mechanismen tegen te gaan formuleert de wet spelregels waar burgers bestuurders aan kunnen houden en andersom. Kleinschaligheid maakt die regels extra noodzakelijk’.

Pues Ministerio Publico, bo no ta kere cu e la bira tempo pa despues di 30 aña Status Aparte y 21 aña despues di e koninkrijkssymposium, cuminsa duna contenido real na e sistema di Trias Politica? No pasobra cu pa 30 aña largo e podernan legislativo y ehecutivo no ta funciona, esun hudicial no por funciona. No pasobra cu pa añanan largo gobierno tin Ministerio Publico secuestra di no nombra un Procurador, pueblo tin cu sufri. Pueblo di Aruba mester haya e mesun derechonan y trato cu tanto e la lucha pe y cu ta wordo aplica na tur otro parti di Reino. Ban mira si Ministerio Publico lo bay haci un investigacion riba e declaracion serio aki, haci pa un miembro di parlamentario cu a prefera di keda keto te na e momento oportuno.

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co