{idkey=5752b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2950-evelyn-wever-croes-mep-ban-debati-con-pa-para-tanto-corupcion-den-e-gobierno-aki%3FItemid%3D101][title=Evelyn+Wever-Croes+%28MEP%29%3A+Ban+debati+con+pa+para+tanto+corupcion+den+e+gobierno+aki][desc=EVELYN+WEVER-CROES+TA+RETA+PARLAMENTARIONAN+DI+AVP%26amp%3Bnbsp%3BLider+di+MEP+Evelyn+Wever-Croes+a+expresa+su+lamento+cu+parlamentarionan+di+AVP+kier+pretende+di+papia+di+integridad%2C+pero+ta+malusa+esaki+pa+susha+nomber+di+hende.%E2%80%9CLaga+nos+debati+con+pa+para+tanto+corrupci%C3%B3n+den+e+gobierno+aki%2C+ban+debati+riba+integridad%2C+MEP+ta+bogando+pa+esaki+pa+dos+anja+caba%2C+pero+cada+biaha+AVP+ta+haya+atake+di+panico+y+kier+stroba+esaki.+Den+nos+nota%2C+cu+nos+a+presenta+na+mei+2014%2C+nos+tin+inclui+diferente+leynan]}
EVELYN WEVER-CROES TA RETA PARLAMENTARIONAN DI AVP 

Lider di MEP Evelyn Wever-Croes a expresa su lamento cu parlamentarionan di AVP kier pretende di papia di integridad, pero ta malusa esaki pa susha nomber di hende.
“Laga nos debati con pa para tanto corrupción den e gobierno aki, ban debati riba integridad, MEP ta bogando pa esaki pa dos anja caba, pero cada biaha AVP ta haya atake di panico y kier stroba esaki. Den nos nota, cu nos a presenta na mei 2014, nos tin inclui diferente leynan y un Codigo di Conducta pa garantisa e integridad di minister y parlamentarionan, pero esaki tampoco parlamentarionan di AVP kier debati riba dje.
Awor diripiente, djis pa lastra nomber di hende drechi, kier pretende di ta papia di integridad. Mi ta reta tur parlamentario di AVP cu kier debati riba integridad, pa e debate aki. Ban debati riba e tema aki for once and for all y introdusi reglanan di integridad y codigo di conducta. E ora nos por discuti si ta aceptable, cu un persona di cual su casa ta consehero di minister, por ta parlamentario. Si otro persona cu su casa ta abogado di un proyecto miyonario di gobierno, por ta parlamentario. Si otro persona cu tin un strafblad, cu a wordo acusa den ladronicia den pasado, por ta parlamentario. Si un persona cu a yega di dal hende mata cu auto, por ta parlamentario. Si un parlamentario por ta parlamentario y ta bai scol parew.  Ban introdusi reglanan y despues ehecuta nan y stop di tira cu lodo, pasobra e no ta yuda toch”, Lider di MEP a trese padilanti.

INTEGRIDAD DEN REINO ARUBA TA PASA BERGUENSA!
Sra. Wever-Croes a lamenta tambe cu nada ta wordo hasi riba e tema aki pa Aruba por hasi un bon papel den Reino, y probablemente esey ta e motibo cu AVP a saca su persona afo di e comision di Reino anja pasa. “Aki algun siman tin un otro reunion di IPKO na Hulanda, y atrobe Aruba mester pasa berguensa cu ta nos so no tin ley ni regla riba e tereno di integridad. Esaki ta refleha malo riba henter nos pais, djis pasobra un grupito kier tapa pa e cosnan iregular cu ta pasa na Aruba cu tin asina tanto conflicto di interes. Nos di MEP si tin tur nos documentonan prepara y bon documenta pa dia nos bai e reunion ey na Hulanda, pasobra nos nota ta cla desde dos anja pasa caba.

ATAKENAN PERSONAL CONTRA PARLAMENTARIONAN DI MEP
“Mi a ripara cu awor cu e parlamentarionan di AVP mes ta hayando nan mes envolvi den un escandalo tras di otro, nan a cuminsa tira cu lodo pasobra nan no por defende nan mes di otro forma. Nan a bolbe cuminsa cu e asunto di cuenta bancario di Eris Crius, di cual tres biaha hues imparcial a bisa cu no tin nada di haber cu mi persona y cu no tin nada ilegal eynan. Otro cos cu nan ta bin cun’e awor ta e asunto di e ciere di BBA Bank. En bes di ta preocupa pa e bienestar di e empleadonan di BBA Bank, nan ta scohe weganan político infantil. Ami no tin nada di hasi cu BBA Bank, y contrario na mentiranan cu AVP a plama, BBA Bank no ta di mi tata tampoco sino di un grupo di Venezolano. Un banco cu AVP a bringa desde un principio. Mi ta reta parlamentarionan di AVP pa un debate con nos ta caba cu tanto corupcion den gobierno, especialmente cu negoshi di tereno y con nos ta crea un gobierno integro, pasobra tiramento di lodo no ta hiba nos pais padilanti”, Evelyn Wever-Croes a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co