{idkey=4773b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2970-partido-abo-un-eventual-nombramento-di-e-actual-minister-di-finansas-como-gobernador-ta-fout%3FItemid%3D101][title=Partido+ABO%3A+Un+eventual+nombramento+di+e+actual+minister+di+Finansas+como+gobernador%2C+ta+fout%21][desc=Manera+e+no+ta+corecto+y+tampoco+eticamente+permisibel+pa+critica+e+instituto+di+gobernador+como+hefe+di+gobierno%2C+nos+di+partido+ABO+lo+kier+duna+nos+opinion+awor+prome+cu+e+actual+ministro+di+Finansas+wordo+nombra+eventual+como+gobernador.+Di+e+forma+aki%2C+nos+lo+ta+vociferando+locual+hopi+hende+ta+pensa+pero+cu+no+ta+tribi+di+bisa+publicamente+pa+medio+di+persecucion+politico.+Asina+tambe+nos+lo+ta+mustrando+respet+pa+e+instituto+di+gobernador%2C+locual+e+merece.Den+esaki+nos+lo+ta+corto%3A+un+eve]}
Manera e no ta corecto y tampoco eticamente permisibel pa critica e instituto di gobernador como hefe di gobierno, nos di partido ABO lo kier duna nos opinion awor prome cu e actual ministro di Finansas wordo nombra eventual como gobernador. Di e forma aki, nos lo ta vociferando locual hopi hende ta pensa pero cu no ta tribi di bisa publicamente pa medio di persecucion politico. Asina tambe nos lo ta mustrando respet pa e instituto di gobernador, locual e merece.

Den esaki nos lo ta corto: un eventual nombramento di e actual minister di Finansas den e funcion di gobernador, lo ta e prueba maximo con malo y deficiente nos sistema democratico ta funciona y cu esaki no lo no tin cu sosode. Alabes e ta confirma cu na Aruba no tin democracia, pero un politica di ‘awor ta nos beurt’.

Den pasado hopi hende a cuestiona con un ministro activo por a bira di un dia pa otro gobernador. Wel awor, pueblo ta haya e prueba locual hopi persona tabata sa caba di hopi tempo: Un deal politico a wordo cera entre e partidonan politico tradicional pa kibra cu e custumber pa nombra un figura no-politico den e funcion di gobernador. Awor e ora a yega pa e otro firmante di e deal politico, haya su turno. Un nombramento politico asina, automaticamente lo pone e integridad y e imparcialidad di e instituto di gobernador na discusion atrobe. Algo cu nunca mester a pasa.

Un medio di comunicacion hasta a felicita e minister di Finansas cu su candidatura, mientras cu e tambe a mustra riba e conflicto di interes, e cuestion di integridad y imparcialidad cu e nombramento aki ta encera: ‘e tin cu traha URGENTE pa termina e presupuesto 2017 pa keda cla pa September y asina drenta su funcion nobo’ (DIARIO, 12 Maart 2016). Con integro e ta pa e actual minister di Finansas, firma den algun luna su mesun trabou den ley?

E mesun minister aki, nunca por a entrega un presupuesto na tempo y asina violando nos Constitucion. E mesun minister aki, tambe ta forma parti di e mesun gobierno cu a entrega varios presupuestonan irealistico. E mesun minister aki, ta forma parti di e ekipo di e prome ministro cu a agredi y cu a insulta e Rey y e instituto di gobernador na un manera mahos, nunca antes bisto. Durante e agresion aki, e prome ministro hasta a menasa e gobernador cu e palabranan: ‘no lubida kende a pone bo persona eynan’. Awor si e actual minister di Finansas wordo nombra gobernador, e ora ey e prome ministro no tin ripiti e mesun palabranan mahos aki mas publicamente. E prome ministro lo djis tin cu ‘fluister’ e palabranan aki den gobernador su horea cada biaha cu nan ta para banda di otro na cualkier ceremonia pa recorda e gobernador na kende e debe su lealtad. Asina e instituto di gobernador lo ta sumiso tambe na su persona.

Pa hopi hende, e tabata un sorpresa ora e minister di Finansas a cambia den un frega di wowo di consehero pa ‘zaken-minister’. Pero e berdad amargo di e cambio aki tabata cu e ‘zaken-minister’ mester a sirbi como e ‘boeman’ cu lo suta pueblo cu hopi medida financiero. E por ta cu e anuncio diripiente di e ‘zaken-minister’ como candidato pa e funcion di gobernador, lo ta un recompensa pa e trabou ‘bon haci’ di ‘boeman’? Spera cu esaki no ta berdad. Sino esaki lo ta un otro prueba di si bo ta comporta bo mes manera e lider supremo kier, lo bo wordo premia. Un desaroyo tristo y patetico cu ta carece di principionan democratico, etica, integridad y moralidad. Pero bon, parce cu awendia tur hende por wordo cumpra na Aruba!

P’esey nos di partido ABO, ta yama henter pueblo pa vocifera bo opinion publicamente y fuerte, pa para e nombramento di un politico activo den e funcion di gobernador. E funcion di gobernador mester keda un funcion no-politico, pa asina mantene e imagen di imparcialidad di e instituto importante aki. 30 aña Status Aparte, y awor mas cu nunca nos sistema democratico ta na peliger. Durante e periodo aki, nunca contenido a wordo duna pa forma un nacion real. Locual si a pasa, ta e poder ehecutivo a secuestra esun legislativo (Stempel Parlement), e ministerio publico (pa añanan no tin un PG) y awor e kier haci mescos cu e instituto di gobernador. E proceso di haci nos Status Aparte gradualmente den un dictadura, mester para awor.

Riba un isla cu 100.000 habitante, mester por a haya un persona no-politico adecuado, pa eherce e funcion di gobernador: UN EVENTUAL NOMBRAMENTO DI E ACTUAL MINISTER DI FINANSAS COMO GOBERNADOR, TA FOUT!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co