{idkey=1012b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2975-partido-abo-no-tin-un-vakminister-pero-un-zaken-minister-cu-defacto-ta-un-politico%3FItemid%3D101][title=Partido+ABO%3A+No+tin+un+%E2%80%98Vakminister%E2%80%99%2C+pero+un+%E2%80%98Zaken-minister%E2%80%99+cu+defacto+ta+un+politico][desc=Tin+algun+hende+riba+e+isla+aki%2C+ta+kere+cu+locual+nan+bisa+ta+asina+e+ta+y+cu+tur+hende+tin+cu+acepta+esaki+manera+%E2%80%98e+unico+berdad%E2%80%99.+En+realidad+e+personanan+aki+ta+gusta+uza+palabranan+grandi+pa+impresiona+y+manipula+pueblo%2C+cu+cada+dia+ta+lesa+menos.+Despues+di+maluza+e+palabranan+%E2%80%98Sostenibilidad+y+Duradero%E2%80%99%2C+awor+e+beurt+ta+na+%E2%80%98Vakminister%E2%80%99.+Gobierno+a+introduci+e+palabra+%E2%80%98Vakminister%E2%80%99+pa%3A+pasa+algun+miembro+di+partido+cu+si+a+bay+eleccion+un+%E2%80%98fastball%E2%80%99%2C+pa+no+admiti+cu+]}
Tin algun hende riba e isla aki, ta kere cu locual nan bisa ta asina e ta y cu tur hende tin cu acepta esaki manera ‘e unico berdad’. En realidad e personanan aki ta gusta uza palabranan grandi pa impresiona y manipula pueblo, cu cada dia ta lesa menos. Despues di maluza e palabranan ‘Sostenibilidad y Duradero’, awor e beurt ta na ‘Vakminister’. Gobierno a introduci e palabra ‘Vakminister’ pa:

1. pasa algun miembro di partido cu si a bay eleccion un ‘fastball’, pa no admiti cu nan a wordo uza pa solamente haya voto;
2. ‘spaar’ e imagen di algun politico cu si a redobla e debe cu proyectonan cuestionabel, pero cu no tin e curashi pa tuma e medidanan doloroso;
3. crea un falso impresion cerca pueblo cu gobierno ta goberna serio;
4. intimida pueblo of cualkier opositor, pasobra e ‘vakminister’ ta un ‘profesional y experto’ riba su tereno. Dus tur locual e bisa, ta basa riba su experticio y no tribi di cuestion’e.
   
   

Conclusion amargo: e ‘vakminister’ mester sirbi como ‘boeman’. Asina gobierno por tin e excuus pa bende pueblo cu ta un ‘profesional’ a sut’e y no un ministro (politico). Pero en realidad, no por distingui e ‘vakminister’ aki for di e otro ministernan. No lubida cu e ‘vakminister’, tambe tabata un politico. Pero ban wak kico e ‘vakminister’ a logra pa drecha e situacion financiero.

Te ainda ningun presupuesto por a wordo entrega na tempo, manera stipula den nos Constitucion. Tur aña, ainda mas placa ta wordo gasta na proyectonan miyonario cu no tin prioridad. Cada aña, gobierno ta entrega na december un ‘suppletoire begroting’ pa legalisa diferente infraccion di ley. Parlamento (Aruba) a perde su control financiero (Budgetrecht) cu e introduccion di e ley ‘College Aruba financieel toezicht (CAft)’. A pesar cu hopi medida a wordo tuma riba lomba di pueblo, ainda gobierno mester uza diferente triki fiscal pa camufla e debe real y asina laga aparenta cu e ta gastando menos placa. E ‘vakminister’ no a logra convence Hulanda pa cumpli cu e ‘Witte Donderdag Akkoord’ y ta p’esey e ta awor na Merca buscando mas placa pa fia. Cada biaha cu e ‘vakminister’ kier demostra su experticio profesional, e ta wordo ‘over ruled’ of ‘gemuilkorfd’ pa e prome minister.

Pues e ta obvio cu e palabra ‘vakminister’ a wordo introduci solamente pa cubri un otro deal politico. Un profesional cu no mag eherce su trabou basa riba su experticio, experencia y e berdad, ta wordo simplemente uza. Kico ta necesario pa pone un profesional bira asina? E contesta ta simpel. Unda placa ta e unico cu ta conta, esaki ta ‘djis un otro trabou’ pa cual e ta wordo paga. Pues nada di ‘vakminister’, pero un simpel ‘zaken-minister’ cu a haya un bon deal.

Despues di cu nos a aclaria e asunto di ‘zaken-minister’, ainda e ta keda remarcabel pa mira cuanto esfuerso y energia ta wordo uza pa laga pueblo kere cu e ta un ‘vakminister’. Semper ora tanto esfuerso, energia y manipulacion wordo uza pa convence pueblo, anto pueblo por ta sigur cu algo hopi grandi mester wordo tapa. Esfuersonan asina grandi, special ora tin un ‘profesional’ envolvi, no ta barata. Pregunta ta: Cua recompensa a(lo) wordo paga e biaha aki, pa pueblo?

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co