{idkey=9248b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2992-parlamentario-mr-xiomara-maduro-mep-segun-banco-central-e-deficit-di-2015-ta-dobbel-mas-grandi-cu-locual-gobierno-a-presenta-2%3FItemid%3D101][title=Parlamentario+mr.+Xiomara+Maduro+%28MEP%29%3A+Segun+Banco+Central+e+deficit+di+2015+ta+dobbel+mas+grandi+cu+locual+Gobierno+a+presenta][desc=Gabinete+Eman+no+tin+e+boluntad+pa+tene+nan+mes+na+ningun+plan+y+tampoco+no+tin+intencion+di+bay+drecha+e+desaster+cu+nan+a+haci+cu+e+finanzas+publico+di+e+Pais+aki.+Ehempel+di+esaki+atrobe+a+keda+resalta+den+locual+ta+trata+e+cifranan+di+e+ehecucion+di+e+Presupuesto+di+nos+Pais+den+e+ultimo+kwartaal+di+2015.+Gabinete+Eman+a+presenta+un+deficit+reduci+cu+ta+cumpli+y+hasta+keda+bou+di+e+norma+financiero+poni+den+e+Ley+di+supervicion+financiero+CAFT%2C+pero+awor+cu+Banco+Central+a+pasa+den+e+cifrana]}
Gabinete Eman no tin e boluntad pa tene nan mes na ningun plan y tampoco no tin intencion di bay drecha e desaster cu nan a haci cu e finanzas publico di e Pais aki. Ehempel di esaki atrobe a keda resalta den locual ta trata e cifranan di e ehecucion di e Presupuesto di nos Pais den e ultimo kwartaal di 2015. Gabinete Eman a presenta un deficit reduci cu ta cumpli y hasta keda bou di e norma financiero poni den e Ley di supervicion financiero CAFT, pero awor cu Banco Central a pasa den e cifranan aki ta sali na cla cu e deficit ta dobbel mas grandi cu locual Gobierno a presenta.

‘Too good to be true’
For di momento cu Minister Bermudez a presenta e cifranan di e ultimo kwartaal di 2015 cu un deficit basta reduci, hopi a considera esaki como algo ‘too good to be true.’ E motibo ta cu for di e cifranan di Banco Central publica dia 7 di januari 2016 ya tabata bisto cu Gobierno su deficit lo ta mas halto cu premira. Ta como cu den e ultimo luna di 2015 a core introduci e VAS pa asina cobra comercio winstbelasting adelanta y a castiga e Pueblo rancando miyones di belasting atrasa, Gabinete Eman na ultimo ora a yega na fondo publico y por a presenta un deficit mas reduci. Pero manera Minister Bermudez mes a remarca, ta te ora cu e cuenta annual di Pais Aruba keda publica, e ora ey nos lo haya sa si realmente a logra reduci e deficit manera presenta.

E deficit ta dobbel mas grandi
Remarcabel ta cu Banco Central dia 14 di maart 2016 a publica e cifranan di e ultimo kwartaal di 2015, mustrando un deficit cu ta dobbel mas grandi cu locual Gobierno a presenta. Segun Gabinete Eman e deficit pa 2015 ta 98 miyon florin y segun Banco Central e deficit pa 2015 ta 201,6 miyon. Un diferencia grandisimo cu no ta usual. Semper sa tin un diferencia den e manera cu Gobierno y Banco Central ta presenta nan cifranan, pero como cu nunca e diferencia tabata asina grandi e ta bira algo cuestionabel.

A pidi Banco Central pa duna aclaracion
Mirando e diferencia grandi aki den cifra di deficit y considerando cu Gabinete Eman lo por a tuma tur hende, incluso CFT, haci cu informacion robes, nos Fraccion di MEP a pidi un reunion cu Banco Central pa asina haya aclaracion. Ta bisto cu Gabinete Eman a hunga e wega di keda sin paga algun gasto den 2015, pa asina por presenta cifranan mas alentador. Por ehempel door di keda sin paga AZV debidamente. E ultimo aki tambe por ser constata for di e cifranan di Banco Central cu ta mustra cu di e 70 miyon cu Gabinete Eman mester a paga na AZV, solamente 44,4 miyon a wordo paga. Di e manera ey segun Gobierno tur locual bo no paga lo keda refleha den un deficit mas reduci, algo cu nos ta duda cu Banco Central ta wak mescos. Pesey ta importante pa Banco Central duna un splicacion dicon e deficit pa 2015 ta dobbel mas grandi cu locual Gobierno ta presenta.

21 maart 2016

Expresionnan haci den e articulo aki no necesariamente ta refleha opinion di ArenaPoliti.co