{idkey=9543b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3031-minister-otmar-oduber-un-festival-cu-a-demostra-di-percura-pa-un-promocion-incomparabel-pa-nos-isla%3FItemid%3D101][title=Minister+Otmar+Oduber%3A+Un+festival+cu+a+demostra+di+percura+pa+un+promocion+incomparabel+pa+nos+isla][desc=Aruba+Summer+Music+Festival+den+su+di+dos+edicion+Aruba+Summer+Music+Festival+2015+a+demostra+di+tabata+un+exito+rotundo+y+awor+ta+cla+pa+e+di+dos+edicion.+Durante+un+rueda+di+prensa+diamars+anochi+Minister+Otmar+Oduber+tabata+presente+y+a+hiba+palabra+elogiando+e+organisadonan+pa+nan+contribucion+pa+locual+ta+e+cantidad+grandi+di+turista+cu+a+biaha+pa+Aruba+specificamente+pa+atende+e+festival+aki+a%C3%B1a+pasa.+E+mandatario+ta+indica+cu+Gobierno+di+Aruba+y+como+tambe+Oficina+di+Turismo+ta+evalua+ca]}
Aruba Summer Music Festival den su di dos edicion

Aruba Summer Music Festival 2015 a demostra di tabata un exito rotundo y awor ta cla pa e di dos edicion. Durante un rueda di prensa diamars anochi Minister Otmar Oduber tabata presente y a hiba palabra elogiando e organisadonan pa nan contribucion pa locual ta e cantidad grandi di turista cu a biaha pa Aruba specificamente pa atende e festival aki aña pasa. E mandatario ta indica cu Gobierno di Aruba y como tambe Oficina di Turismo ta evalua cada un evento, cada aña di nobo, apesar cu por tin contractnan di varios aña envolvi.  Ta evalua entre otro e logro di cada evento compara cu e expectativa cu tabata tin prome cu evento. Sr. Oduber ta comparti cu ASMF 2015 tabata uno sumamente exitoso basa riba tur e criterianan di e evaluacion, cu ta pone cu e confiansa di Gobierno atraves di ATA Sui Generis ta wordo deposita den e evento pa un di dos edicion cu e meta pa atrae un gran cantidad di bishitantenan for di exterior.

E di dos edicion di ASMF ta wordo amplia cu 3 anochi di espectaculo. Mirando e exito aña pasa unda no menos cu 3mil turista a bin pa e festival aki, expectativa ta grandi pa e aña aki.

Banda di e cantidad di turista cu ta spera pa ASMF 2016, Minister Oduber a menciona e balor di e "return on investment"  cu ta e aspecto di mercadeo cu Aruba ta logra internacionalmente cu Aruba Summer Music Festival. Un festival cu a demostra di percura pa un promocion incomparabel pa nos isla. E promocion di e propio artistanan riba nan rednan social cu nan fanaticada ta uno enorme. Cada un artista tin un gran cantidad di "followers" cu posiblemente ta haya e curiosidad pa bishita nos isla pa bin mira presentacion di nan artista preferi of sino pa despues pasa nan vacacion na Aruba basa riba tur e potretnan y mensahenan cu nan a mira riba tur e diferente formanan riba rednan social manera ta Facebook, Twitter, Instagram of Snapchat djis pa menciona algun . Por agrega tambe cu ASMF ta atrae un gran cantidad di prensa internacional cu nan na nan turno tambe ta haci un promocion grandi pa nos isla. E mandatario ta splica cu e "return on investment"  cu ta haci como Oficina di Turismo y Gobierno ta haci cu cada un florin, cada un dollar cu ta wordo inverti ta hustifica den e tipo di eventonan aki.   

Aruba Summer Music Festival a presenta nan line up pa 2016 cual lo ta Chino y Nacho, Enrique Iglesias, Destra, Tito Nieves, Gente de Zona y Wisin! Sigur un line up cu hopi peso cu lo percura ainda pa mas bishitante, mas promocion internacional y sigur un otro exito mas pa ASMF.

Promocionnan den exterior a inicia mas tempran e aña aki pa garantisa cu Aruba un biaha mas ta wordo poni riba e pedestal halto cu ta representa tambe e calidad di Aruba como Producto. Cu e ambiente y mas cu tur e calor di nos propio hendenan ta percura pa cada un bishitante tin un experiencia unico riba nos isla y lo garantisa cu nan ta bolbe bek. 

Expresionnan haci den e articulo aki no necesariamente ta refleha opinion di ArenaPoliti.co